சுயேச்சையாகச் செயல்படட்டும் தேர்தல் ஆணையம்!

தேர்தல் ஆணையர்கள் நியமனம் தொடர்பாக உச்ச நீதிமன்றம் கொடுத்திருக்கும் தீர்ப்பு, தேர்தல் ஆணையத்தின் சுயேச்சைத் தன்மைக்கு புதியதொரு நம்பிக்கையைக் கொடுத்திருக்கிறது.

‘இந்தியாவின் தலைமை தேர்தல் ஆணையரும், மற்ற தேர்தல் ஆணையர்களும் ஜனாதிபதியால் நியமிக்கப்பட வேண்டும். யாரைத் தேர்தல் ஆணையர்களாக நியமிப்பது என பிரதமர், மக்களவை எதிர்க்கட்சித் தலைவர் மற்றும் உச்ச நீதிமன்றத் தலைமை நீதிபதி ஆகியோர் அடங்கிய கமிட்டி முடிவுசெய்ய வேண்டும். ஒருவேளை மக்களவையில் எதிர்க்கட்சித் தலைவரே இல்லையென்றால், எதிர்க்கட்சிகளின் தரப்பில் இருக்கும் பெரிய கட்சியின் நாடாளுமன்றக்குழுத் தலைவர் இந்த கமிட்டியில் இடம்பெறலாம்’ என்பது உச்ச நீதிமன்றம் தந்திருக்கும் உத்தரவு.

இந்த வழக்கு வந்ததற்கு ஒரு விநோதமான காரணம் உண்டு. அனூப் பரன்வால் என்பவர், 2015-ம் ஆண்டு ஒரு பொதுநல வழக்கு தொடுக்கிறார். ‘அரசியலமைப்பு சட்டத்தின் 324(2) பிரிவின்படி, தேர்தல் ஆணையர்களை ஜனாதிபதி நியமிக்க வேண்டும். ஆனால், இந்த நியமனம் தொடர்பாக நாடாளுமன்றத்தில் ஒரு சட்டம் இயற்றப்படும் எனத் தெரிவிக்கப்பட்டிருந்தது. அப்படி ஒரு சட்டம் இதுவரை இயற்றப்படவில்லை. எனவே, மத்திய அரசு தன் விருப்பம்போல எவரையும் தேர்தல் ஆணையராகவும், தலைமைத் தேர்தல் ஆணையராகவும் நியமிக்கிறது. இது அரசியலமைப்புச் சட்டப்படி சரியான நடைமுறை இல்லை’ என்பது அந்த வழக்கின் சாரம்.

இந்தியா சுதந்திரம் பெற்று குடியரசாக மலர்ந்தபோது, அரசியல் நிர்ணய சபை உருவாக்கப்பட்டு அதில்தான் அரசியலமைப்புச் சட்டம் தொகுக்கப்பட்டது. அப்போது தேர்தல் ஆணையர் நியமனம் தொடர்பான சட்டம் பற்றியும் விவாதிக்கப்பட்டது. ஆனால், அப்படிச் சட்டத்தை நிறைவேற்ற நாடாளுமன்றம் மறந்துவிட்டது.

இதை, இந்த வழக்கு விசாரணையின்போது உணர்ந்த உச்ச நீதிமன்றம், அனூப் பரன்வாலின் மனுவை ஐந்து நீதிபதிகள்கொண்ட அரசியல் சாசன அமர்வுக்கு மாற்றியது. நீதிபதிகள் கே.எம்.ஜோசப், அஜய் ரஸ்தோகி, அனிருத்த போஸ், ரிஷிகேஷ் ராய், சி.டி.ரவிகுமார் ஆகியோர் அடங்கிய இந்த அமர்வுதான் இப்போது இப்படித் தீர்ப்பு தந்திருக்கிறது.

இப்போதுள்ள நடைமுறைப்படி, சட்ட அமைச்சர் தகுதியான நபர்களின் பெயர்களைப் பரிந்துரைப்பார். அதிலிருந்து பிரதமர் அறிவுரைப்படி, ஒருவரைத் தேர்தல் ஆணையராக ஜனாதிபதி நியமிப்பார். இனி இந்த நடைமுறை மாறி, உச்ச நீதிமன்றம் சொன்ன கமிட்டியே தேர்தல் ஆணையர்களைத் தேர்வுசெய்யும். கூடவே, ‘தேர்தல் ஆணையத்தின் செலவுகளை மத்திய அரசு நேரடியாகச் செய்யாமல், தனித்தொகுப்பு நிதியிலிருந்து அளித்தால், ஆணையம் இன்னும் சுயேச்சையாகச் செயல்பட முடியும்’ என்ற பரிந்துரையையும் செய்திருக்கிறது.

#தேர்தல்_ஆணையம் தன் நற்பெயரைக் காப்பாற்றிக் கொள்ள இது உதவும்.

இது மாநில தேர்தல் அதிகாரிகளுக்கும் பொதுவானதாக இருக்கவேண்டும்.

நடந்து முடிந்த தேர்தலில் வாக்காளர்களுக்கு கிடைத்த ஜாக்பாட் --கண்டுகொள்ளாத 

தேர்தல் ஆணையம் என்று செய்திகள் உலா வந்தது.