வெள்ளாமையும் நாங்களே... விக்கிறதும் நாங்களே!

வேளாண் விளைபொருட்களை விவசாயிகளே விலை நிர்ணயம் செய்துகொள்ளும் திட்டம் கர்நாடகாவில் அறிமுகமாகியுள்ளது

நாட்டிலேயே முதன்முறையாக, புதிய சந்தைக் கொள்கைகள் அடங்கிய, விவசாய விளைபொருட்களுக்கான ஒருங்கிணைந்த சந்தைத் திட்டம் கர்நாடகாவில் அறிமுகமாகியுள்ளது.

இதன்படி தொழில் நிறுவனங்களைப் போல, தங்களின் விளைபொருட்களுக்கு விலையை நிர்ணயிக்கும் அதிகாரம் விவசாயிகளுக்கு வழங்கப்பட்டுள்ளது. மேலும் விவசாயிகள் தங்கள் விளைபொருட்களை ஆன்லைன் மூலம் கொள்முதல் செய்துகொள்ளலாம். விளைபொருட்களுக்கு உரிய விலை கிடைக்காவிட்டால் ஏலத்தை விவசாயிகள் நிராகரிக்கலாம். அந்தப் பொருட்களை சேமிப்புக் கிடங்கில் பாதுகாப்பாக வைத்து அதன் மீது கடன் பெற முடியும். விளைபொருட்கள் விற்பனைக்குத் தேவையான நவீன எடை இயந்திரம், இணையதளத் தொடர்பு, ஆன்லைன் வங்கிப் பரிவர்த்தனை உள்ளிட்ட வசதிகள் செய்யப்பட்டுள்ளன. இதன்மூலம் இடைத்தரகர்களின் தலையீட்டை தடுத்து நிறுத்தி விவசாயிகளின் விளைபொருட்களுக்கு நியாயமான, லாபகரமான விலை கிடைக்கச் செய்கிறது.

தமிழ்நாட்டில் ஏற்கெனவே, இடைத்தரகர்கள் இடையீட்டின்றி, விவசாயிகள் தங்கள் விளைபொருட்களை நேரடி விற்பனை செய்வதற்காக தமிழகத்தின் பல இடங்களில் உழவர் சந்தைகள் அமைக்கப்பட்டுள்ளன. ஆனால், அத்திட்டம் இன்று பல இடங்களில் செயலற்றுக் கிடக்கிறது. தமிழக உழவர் சந்தைகளில் விவசாயிகள் தங்கள் விளைபொருட்களுக்கான விலையை நிர்ணயம் செய்துகொள்ள முடியாது. மாறாக, வேளாண் விளைபொருள் விற்பனைத் துறை அலுவலர்கள் ஒரு விலையை நிர்ணயித்து, விவசாயிகளுக்கு விலைப் பட்டியல் வழங்குகின்றனர். இந்த விலை நிர்ணயம், பெரும்பாலும் காய்கறிகளின் வரத்தைப் பொறுத்தே முடிவு செய்யப்படுகிறது. சாகுபடிச் செலவு, அறுவடைச் செலவு மற்றும் இதர செலவுகளை அலுவலர்கள் கணக்கில் கொள்வதில்லை. இதனால் விவசாயிகள் உழவர் சந்தையில் நேரடி விற்பனை செய்ய ஆர்வம் காட்டாமல், வியாபாரிகளிடம் கொள்முதல் செய்துவிடுகின்றனர். இதனால்தான் பெரும்பாலான உழவர் சந்தைகளில் விவசாயிகளுக்கு மாற்றாக வியாபாரிகள் கடை விரித்து விற்பனை செய்து கொண்டிருக்கின்றனர்.

எனவே கர்நாடக அரசைப் போல, தமிழக உழவர் சந்தைகளில் விவசாயிகளே விலையை நிர்ணயித்துக்கொள்ளும் உரிமையை வழங்க வேண்டும். இதன் மூலம் விவசாயிகள் கட்டுப்படியான விலை பெறுவதுடன், உழவர் சந்தையைப் பயன்படுத்திக்கொள்ள அவர்கள் முன்வரக்கூடும். மேலும், வியாபாரிகள், இடைத்தரகர்கள் உழவர் சந்தைகளில் கடை விரிப்பதைக் கட்டுப்படுத்த முடியும். அரசு செய்யுமா?"
(சா. சின்னதுரை - புதியதலைமுறை)