டெல்லியில் இருந்து கேரளாவுக்கு விமானத்தில் வந்து நகை திருட்டில் ஈடுபட்ட 2 வாலிபர்கள்....

திருவனந்தபுரம் புறநகர் பகுதியில் தனியாக நடந்து செல்லும் பெண்களிடம் மோட்டார் சைக்கிளில் வரும் திருடர்கள் நகை பறித்து செல்லும் சம்பவங்கள் அடிக்கடி நடந்தன.

இதுபற்றி திருவனந்தபுரம் போலீஸ் கமிஷனருக்கு ஏராளமான புகார்கள் வந்ததையடுத்து நகை திருடர்களை பிடிக்க தனிப்படை அமைக்கப்பட்டது. அவர்கள் நகர் முழுவதும் சுற்றி வந்து கண்காணிப்பு பணியில் ஈடுபட்டனர்.

அப்போது இலத்தூர் போலீசார் ரோந்து சுற்றி வந்தபோது, சந்தேகப்படும் படி நின்ற வடமாநில வாலிபர்கள் முகம்மது சாகில் (வயது 30). நவுசாத் அலி (24) ஆகியோரை பிடித்தனர். போலீஸ் நிலையம் கொண்டு சென்று விசாரித்தபோது அவர்கள் இருவரும் வழிப்பறி திருடர்கள் என தெரிய வந்தது.

பிடிபட்ட முகம்மது சாகில், நவுசாத் அலி இருவரும் டெல்லி காசியாபாத் பகுதியைச் சேர்ந்தவர்கள். அவர்கள் போலீசாரிடம் கூறியதாவது:-

தென்மாநிலங்களில் குறிப்பாக கேரளா மற்றும் தமிழ்நாட்டில் உள்ள பெண்கள் அதிகளவில் தங்க நகைகள் அணிவார்கள். எனவே நாங்கள் டெல்லியிலிருந்து கேரளாவுக்கு வந்து நகை திருட்டில் ஈடுபடுவோம்.

எங்களுக்கு தலைவராக இருப்பவர் ஹாஜிஜோனி. இவர் டெல்லியில் நகைக்கடை வைத்துள்ளார். கேரளாவில் திருடும் நகைகளை உடனே தங்கக்கட்டியாக உருக்கி விடுவோம். பின்னர் அதனை டெல்லி கொண்டு சென்று புதிய நகைகளாக மாற்றி விற்று விடுவோம்.

நகை திருடுவதற்கு நகையின் அளவுக்கு ஏற்ப சன்மானம் வழங்கப்படும். மேலும் ஊக்கப்பரிசுகளையும் எங்கள் தலைவர் வழங்குவார். எங்கள் கூட்டத்தில் இன்னும் பலர் உள்ளனர். அவர்களும் கேரளாவின் பல்வேறு பகுதிகளில் சுற்றி திரிகிறார்கள்.

மோட்டார் சைக்கிளில் 2 பேராக சென்று தனியாக செல்லும் பெண்களிடம் நகைகளை பறித்து விட்டு தப்பி விடுவோம்.

இவ்வாறு அவர்கள் கூறினார்கள்.

இருவரையும் கைது செய்த போலீசார் இவர்கள் யார்? யாரிடம் கைவரிசை காட்டினார்கள் என்பதோடு, இவர்களின் கும்பல் தலைவனையும் பிடிக்க போலீசார் நடவடிக்கை எடுத்து வருகிறார்கள்.

மாலைமலர்

நகை திருடுவதற்கு நகையின் அளவுக்கு ஏற்ப சன்மானம் வழங்கப்படும். மேலும் ஊக்கப்பரிசுகளையும் எங்கள் தலைவர் வழங்குவார்