டெல்லியில் தமிழக வாலிபர்கள் 10 பேர் பரிதவிப்பு

புதுடெல்லி,

படித்த இளைஞர்கள் வேலைவாய்ப்புக்காக அரசு வேலை வாய்ப்பு
அலுவலகங்கள் மட்டுமின்றி, பல்வேறு இணையதளங்களிலும்
பதிவு செய்கிறார்கள்.

இப்படி பதிவு செய்தவர்களில் பலரை ஒரு தனியார் நிறுவனம்
தொடர்பு கொண்டது. அந்த நிறுவனம் டெல்லி ரமேஷ் நகரில்
இயங்குவதாக இணையதளத்தில் முகவரி தெரிவித்து இருந்தது.

இந்த நிறுவனத்தை நம்பிய பல வாலிபர்கள் வேலைவாய்ப்புக்காக
தொடர்ந்து அந்த நிறுவனத்தை தொடர்பு கொண்டனர்.
அதைத்தொடர்ந்து அந்த வாலிபர்களுக்கு அவரவர் கல்வித்தகுதிக்கு
ஏற்ப ‘ஸ்டோர் கீப்பர்’ ‘கம்ப்யூட்டர் ஆபரேட்டர்’ உள்ளிட்ட
பணியிடங்களை நார்வே, கனடா, மொரீசியஸ் உள்ளிட்ட நாடுகளில்
ஏற்படுத்தித் தருவதாக அந்நிறுவனத்தின் நிர்வாகி கூறினார்.

இதற்காக குறிப்பிட்ட பணம் செலுத்தும்படியும் அவர் கேட்டுக்
கொண்டார்.

அதன் அடிப்படையில் வாலிபர்கள் ரூ.30 ஆயிரம் முதல் ரூ.1 லட்சம்
வரை மேற்கண்ட நிர்வாகியின் வங்கிக்கணக்குக்கு பணம்
அனுப்பினர். தொடர்ந்து தொலைபேசி மூலம் நேர்காணல் நடந்தது.

அதன்பின்னர் முதல்கட்டமாக ஒரு பிரிவினர் வெளிநாடு
செல்வதற்காக டெல்லி வரவழைக்கப்பட்டனர். இதில் தமிழ்நாட்டில்
இருந்து 10 பேர் இடம்பெற்றனர்.

இவர்கள் நேற்று முன்தினம் டெல்லிக்கு வந்து சம்பந்தப்பட்ட
நிறுவனத்தை தொடர்பு கொண்டபோது, வெளிநாட்டுக்கு அனுப்பும்
முயற்சியெல்லாம் மோசடி என்பது தெரியவந்தது. தாங்கள்
ஏமாற்றப்பட்டதை உணர்ந்த வாலிபர்கள் செய்வதறியாது திகைத்தனர்.

பின்னர் டெல்லி மோதிநகர் போலீசில் புகார் அளிக்கப்பட்டது.

ஏமாற்றம் அடைந்த தமிழக வாலிபர்கள் 10 பேர் தற்போது
டெல்லியில் பரிதவித்து வருகிறார்கள்.
-
--------------------------------------
தினத்தந்தி

_________________