பாதுகாப்பில்லாத பழநி! பக்தர்களே உஷார்!

-

-


தமிழ்க் கடவுள் முருகனின் மூன்றாவது படைவீடாக
போற்றப்படுகிறது பழநி. இங்குள்ள தண்டாயுதபாணியை
தரிசிக்க நாள்தோறும் பல்லாயிரக்கணக்கான பக்தர்கள்
வந்துக்கொண்டே இருக்கிறார்கள்.

தமிழகத்தில் இருந்து கேரளா சென்று ஐயப்பனை
வழிபடுவதுபோல், கேரள பக்தர்கள் அதிக அளவில்
பழநிக்கு வருகிறார்கள். இதனால் பழநியில் இருந்து
தமிழகத்தின் அனைத்துப் பகுதிகளுக்கும் பேருந்துகள்
இயக்கப்படுகின்றன.

நாளொன்றுக்கு சுமார் 800 பஸ்கள் வரை பழநி
பஸ்நிலையத்துக்கு வந்து செல்கின்றன.

இந்நிலையில், பழநி பஸ் நிலையத்தில் ஆக்கிரமிப்பு அதிகம்
இருப்பதால் பயணிகளுக்கு பல்வேறு தொந்தரவுகள் ஏற்படுகிறது.

வெளியூர் வியாபாரிகள், நரிக்குறவர்கள் பஸ் நிலையத்தை
ஆக்கிரமித்து அங்கேயே குடியிருந்து வருவதால் பயணிகள்
காத்திருப்பதிலும், நிற்பதிலும் சிரமம் இருப்பதாக புலம்புகிறார்கள்.

பலதரப்பட்ட மனிதர்களும் வந்து செல்லும் பழநி பேருந்து
நிலையத்தில் பிக்பாக்கெட், செயின் திருடர்கள் அதிகம்
உலவுகிறார்கள். இங்கு கண்காணிப்பு கேமராக்கள் பொருத்தப்
படவில்லை என்பதால் திருட்டு சம்பவங்கள் சர்வசாதாரணமாக
நடக்கின்றன.

கண்காணிப்பு கேமராக்கள் இல்லாததால் குற்றவாளிகளைக்
கண்டுபிடிப்பதிலும் பல்வேறு சிக்கல்கள் ஏற்படுகின்றன.

தற்போது ஐயப்பன் சீசன் நடந்து வருவதால், பக்தர்கள் கூட்டம்
நாளுக்கு நாள் அதிகரித்து வருகிறது. இதனால் போக்குவரத்து
நெரிசலில் சிக்கித் தவிக்கிறது பழநி.

போக்குவரத்து நெரிசலை சமாளிக்க, தனியார் வாகனங்களை
நிறுத்த தனியாக இடம் ஒதுக்கப்பட்டுள்ளது.
ஆனாலும், போக்குவரத்து நெரிசல் குறைந்தபாடில்லை.
-
பக்தர்கள் கூட்டத்தைப் பயன்படுத்தி பல்வேறு நபர்கள்
பணம் பறிப்பதில் ஈடுபட்டுள்ளனர். பஸ்நிலையத்தில்
இறங்கியவுடன், ‘கோயிலுக்கா சார்... வாங்க போகலாம்..
தரிசனத்துக்கு ஏற்பாடு செய்றேன். நீங்க பார்த்து செலவுக்குக்
கொடுங்க’ என நச்சரித்தபடி தொடர்ந்து வருவார்கள்.

இவர்களிடம் பக்தர்கள் கவனமாக இருக்க வேண்டும்.
பழநியைப் பொறுத்தவரை, யாரிடமும் எதுவும் கேட்காமல்
நேராக கோயிலுக்குச் செல்வதுதான் உத்தமம்.

இடையில் யாராவது கூப்பிடுகிறார்களே என்று பேசினால்,
உங்கள் பர்ஸ் பஞ்சராகிவிடும். இதேபோல், சூதாட்ட கும்பலைச்
சேர்ந்தவர்களும் அடிவாரப் பகுதிகளில் சுற்றித்திரிகின்றனர்.

இப்படி பக்தர்களிடம் சூதாட்டம் மூலமாக பணம் பறித்த
ஐந்து நபர்களை நேற்று போலீசார் கைது செய்துள்ளனர்.
ஆனாலும், இவர்கள் நடமாட்டம் இன்னமும் இருக்கவே
செய்கிறது.
-
-------------------------------------
ஆர்.குமரேசன்
-விகடன்