எஸ்.எஸ்.எல்.சி. தேர்வில் முறைகேடு: தனியார் பள்ளி மீது கடும் நடவடிக்கை- அமைச்சர் சிவபதி

சட்டசபையில் இன்று திருவண்ணாமலை தனியார் பள்ளியில் நடந்த எஸ்.எஸ்.எல்.சி. தேர்வு முறைகேடு பற்றி உறுப்பினர்கள் பிரச்சினை எழுப்பினார்கள்.

குணசேகரன் (இந்திய கம்யூ):- திருவண்ணாமலை தனியார் பள்ளியில் 100-க்கு 100 தேர்ச்சி பெற வேண்டும் என்பதற்காக பள்ளி நிர்வாகத்தினரும் ஆசிரியர்களும் இணைந்து கேள்விக்கான பதிலை ஜெராக்ஸ் எடுத்து மாணவர்களிடம் கொடுத்துள்ளனர்.

காப்பி அடிப்பதை பள்ளி நிர்வாகம் ஊக்குவித்துள்ளது. எனவே பள்ளியின் அங்கீகாரத்தை ரத்து செய்ய வேண்டும்.

கலையரசன் (பா.ம.க.):- மாணவ- மாணவிகளுக்கு ஆசிரியர்களே காப்பி அடிக்க சொல்லிக் கொடுப்பது மிகவும் வெட்கப்படக்கூடியது. இதுபோல் வேறு எங்கும் நடக்காத அளவுக்கு நடவடிக்கை எடுக்க வேண்டும்.

சவுந்தர்ராஜன் (மார்க்சிஸ்டு):- இன்றைக்கு கல்வி தொழிற்சாலை போல் மாறிவிட்டதால் இதுபோன்ற முறைகேடு நடக்கிறது. தனியார் பள்ளிகளில் விரிவான சோதனையை அரசு நடத்த வேண்டும்.

டாக்டர் கிருஷ்ணசாமி (புதிய தமிழகம்):- வேலியே பயிரை மேய்ந்ததுபோல் இந்த சம்பவம் நடந்துள்ளது. 40-க்கும் மேற்பட்ட மாணவ- மாணவிகளுக்கு ஆசிரியர்களே விடை சொல்லி உள்ளனர். அரசின் கவனத்துக்கு வராமல் நிறைய இடங்களில் இதுபோல் நடக்கிறது.

பின்னர் அதற்கு பதில் அளித்த கல்வி அமைச்சர் சிவபதி கூறியதாவது:-

தமிழ்நாட்டில் 4.4.12 முதல் 10-ம் வகுப்பு தேர்வு நடக்கிறது. ஒவ்வொரு கல்வி மாவட்டத்துக்கும் குறைந்த பட்சம் 50 பறக்கும் படை வீதம் மொத்தம் 3,300 பறக்கும்படை அமைக்கப்பட்டு களம் இறக்கப்பட்டு வருகிறது. இதற்கு அந்தந்த மாவட்ட கலெக்டர் தலைவராவார். திருவண்ணாமலை மாவட்டத்தில் 70 தேர்வு மையங்கள் உள்ளன. 78 பறக்கும் படையினர் கண்காணிக்கிறார்கள். அங்கு மவுண்ட் செயின்ட் ஜோசப் மெட்ரிக் பள்ளியில் 763 மாணவ- மாணவிகள் தேர்வு எழுதினர். இதில் அந்த பள்ளியைச் சேர்ந்த மாணவர்கள் 284 பேர் மற்ற தனியார் பள்ளி மாணவர்கள் 475 பேர் பரீட்சை எழுதினர்.

நேற்று கணித பாட தேர்வு நடந்தது. இந்த தேர்வு மையத்தில் முறைகேடு நடப்பதாக கலெக்டருக்கு இ-மெயிலில் தகவல் வந்ததால் கலெக்டர் வருவாய்த்துறை அதிகாரிகளுடன் சென்று திடீர் சோதனை நடத்தினார். இதில் முறைகேடுகள் கண்டுபிடிக்கப்பட்டன. விடைகளை ஜெராக்ஸ் எடுத்து மாணவ- மாணவிகளுக்கு கொடுத்துள்ளனர். ஆசிரியர்- ஆசிரியைகள் 7 பேர் உடந்தையாக இருந்தனர். 7 பேர் மீதும் நடவடிக்கை எடுத்து தற்காலிக பணி நீக்க உத்தரவு நேற்றே வழங்கப்பட்டது.

மேலும் அந்தப்பள்ளியின் மீது மேல் நடவடிக்கை எடுக்கலாமா என அரசு அலோசித்து வருகிறது. இந்த ஆண்டு அதிக பறக்கும்படை அமைக்கப்பட்டு கண்காணிக்கப்படுகிறது. 1 கோடியே 33 லட்சம் மாணவர்கள் தேர்வு எழுதுகிறார்கள். 5 1/2 லட்சம் ஆசிரியர்கள் பணிபுரிகிறார்கள். ஒரு சில ஆசிரியர்கள் தவறு செய்கிறார்கள். அவர்கள் மீது அரசு நடவடிக்கை எடுத்து வருகிறது.

இவ்வாறு அவர் கூறினார்.

மாலைமலர்

ஆசிரியர்கள் மட்டும் அல்ல , அவர்களை 100/100 தேர்ச்சி பெற வேண்டும் நிர்பதித்த பள்ளி நிர்வாகத்தினரும் தண்டிக்கப்பட வேண்டும் .

அந்த ஆசிரியர்கள் பாவோம் நிர்வாகத்துக்கு அடிபணிந்து நடந்துள்ளனர் , நிர்வாதின் மீதே நடவடிக்கை எடுக்க வேண்டும்