கறுப்பு பண பதுக்கல் குறித்த விவரம் வெளியிட முன்வருவோருக்கு மன்னிப்பு

புதுடில்லி: சட்டவிரோத பணப் பரிமாற்றம் குறித்த சட்டத் திருத்த மசோதா, நேற்று லோக்சபாவில் தாக்கல் செய்யப்பட்டது. இதன்படி, சட்ட விரோத பணப் பரிமாற்ற மோசடி தொடர்பாக குற்றம் சாட்டப்பட்டவரின் சொத்துக்களை, வழக்கு விசாரணையில் இருக்கும்போதே பறிமுதல் செய்ய முடியும். சட்ட விரோத பணப் பரிமாற்றம் குறித்த சட்டத் திருத்த மசோதாவை, நிதி அமைச்சர் பிரணாப் முகர்ஜி, லோக்சபாவில் நேற்று தாக்கல் செய்தார். சர்வதேச நிதி மோசடி தடுப்புப் பிரிவில், இந்தியா முக்கிய இடம் பெற்றுள்ளது. எனவே, நிதி மோசடிக்காக சர்வதேச அளவில் உள்ள சட்ட விதிமுறைகளுக்கு ஏற்ற வகையில், இந்தியாவிலும் அதே போன்ற விதிமுறைகளை உருவாக்கும் விதமாக, இந்த சட்டத் திருத்த மசோதா தாக்கல் செய்யப்பட்டுள்ளது. இதன்படி, சட்ட விரோத பணப் பரிமாற்றம் தொடர்பாக, ஒருவர் மீது குற்றம் சாட்டப்பட்டால், அது தொடர்பான வழக்கு, விசாரணையில் இருக்கும்போதே, அவரின் சொத்துக்களை பறிமுதல் செய்ய முடியும். நிதி முறைகேட்டில் ஈடுபட்டவர் மட்டுமல்லாமல், அவரின் ஏஜென்ட்டாக செயல்பட்டவர், பணத்தை மறைத்து வைத்தவர்கள், கையகப்படுத்தி வைத்திருப்பவர்கள் ஆகியோரும், குற்ற வரம்பிற்குள் கொண்டு வரப்படுவர். சட்ட விரோத பணப் பரிமாற்றம் தொடர்பான தகவல்களை வங்கிகள், நிதி நிறுவனங்கள் உள்ளிட்டோரிடம் இருந்து பெற முடியும். வங்கிகளும், நிதி நிறுவனங்களும் இது தொடர்பாக, தங்களின் வாடிக்கையாளரைப் பற்றிய விவரங்கள் அடங்கிய ஆவணங்களை வைத்திருக்க வேண்டும். இந்த விவரங்கள், மிகவும் ரகசியமாக வைத்திருக்கப்படும்.

பொது மன்னிப்பு : இதற்கிடையே, மத்திய நிதி அமைச்சக அதிகாரி ஒருவர் கூறுகையில், "கறுப்பு பணத்தை பதுக்கி வைத்துள்ளவர்கள், தாங்களாக முன்வந்து, அது பற்றிய தகவல்களை தெரிவித்து, கணக்கு காட்டும் பட்சத்தில், அவர்களுக்கு பொது மன்னிப்பு அளிக்கும் திட்டத்தை அமல் படுத்துவது குறித்து ஆலோசிக்கப்பட்டு வருகிறது. இவ்வாறு தகவல் தெரிவிப்போரிடம், அதற்கான வரித் தொகை மற்றும் அபராதம் வசூலிக்கப்படும். இதன் பின், சம்பந்தபட்ட நபரால், வெளி நாடுகளில் பதுக்கி வைக்கப்பட்டுள்ள பணம், இந்தியாவுக்கு கொண்டு வரப்படும்' என்றார்.

தினமலர்

எதையாவது செய்து கறுப்பு பணத்திற்கு ஒரு முற்றுப்புள்ளி வையுங்கப்பா.