தோண்டத் தோண்ட பிணம்: தீராத பிலிப்பைன்ஸ் சோகம்

**இளமாறன்** · **இளமாறன்** Wed Dec 28, 2011 1:46 am

இலிகான்: பிலிப்பைன்சில், வெள்ளத்தில் சிக்கி உயிரிழந்தோரின் எண்ணிக்கை, ஆயிரத்து 249 ஆக அதிகரித்துள்ளது. தொடர்ந்து, காணாமல் போனோரைத் தேடும் பணிகள் முடுக்கி விடப்பட்டுள்ளன.

பிலிப்பைன்சின் தென் பகுதியில் உள்ள மிண்டானா தீவு, வாஷி சூறாவளியால் பெரும் பாதிப்படைந்தது. சூறாவளியால் ஏற்பட்ட வெள்ளத்தில் சிக்கி, பலர் காணாமல் போயினர். ககயான் டி ஓரா மற்றும் இலிகான் நகர்களில் வெள்ளத்தால் பாதிக்கப்பட்ட இடங்களில், பிணங்களைத் தேடும் பணிகள் நடந்து வருகின்றன. தோண்டும் இடங்களில் எல்லாம் பிணங்கள் கிடைத்து வருகின்றன. இதுவரை பலியானோரின் எண்ணிக்கை, ஆயிரத்து 249 ஆக அறிவிக்கப்பட்டுள்ளது. பல கிராமங்கள் வெள்ளத்தில் அடித்துச் செல்லப்பட்டுள்ளதால், பலி எண்ணிக்கை மேலும் அதிகரிக்கலாம் என எதிர்பார்க்கப்படுகிறது. எத்தனை பேர் காணாமல் போயினர் என்பது தெரியவில்லை. அவர்களைத் தேடும் பணிகள் தொடர்ந்து நடந்து வருகின்றன. இன்னும் பல இடங்களில் சோதனை நடத்த வேண்டியிருப்பதாக, அந்நாட்டின் பேரிடர் கவுன்சில் தெரிவித்துள்ளது. தற்போது, 69 ஆயிரம் பேர் தற்காலிக முகாம்களில் தங்க வைக்கப்பட்டுள்ளனர். மூன்று லட்சத்திற்கும் அதிகமானோர் பாதிக்கப்பட்டுள்ளனர்.

தினமலர்