அக்னி-4 சோதனை வெற்றியில் சாதனை படைத்த கேரள பெண்-டெசி தாமஸ்

புதுடெல்லி, நவ. 17-

அணு ஆயுதங்களை ஏந்தி, 3500 கி.மீ. தூரம் சென்று தாக்கும் வல்லமை படைத்த அக்னி-4 ரக ஏவுகணையை நேற்று முன்தினம் இந்தியா சோதித்துப் பார்த்து அந்த சோதனை வெற்றிகரமாக நடந்தது.

அக்னி-4 ஏவுகணை கடந்த ஆண்டு முதன் முதலாக சோதிக்கப்பட்ட போது தோல்வியில் முடிந்தது. இதனால் அக்னி-4 ஏவுகணையை சீரமைக்கும் பொறுப்பு ராணுவ ஆய்வுத் துறையில் உயர் பதவி வகிக்கும் கேரள பெண் டெசி தாமசிடம் ஒப்படைக்கப்பட்டது.

48 வயதே ஆகும் டெசி தாமஸ் ஏவுகணை தயாரிப்பு திட்டத்துக்கு தலைமை ஏற்ற முதல் பெண் ஆவார். அவர் தலைமையிலான குழு அக்னி-4 ஏவுகணையை சிறப்பாக சீரமைத்து சோதனையில் வெற்றியை பெற்றுள்ளது. ஏவுகணை திட்ட பணிக்கு பொறுப்பு ஏற்றபோதே டெசிதாமஸ் "ஏவுகணை பெண்" என்ற சிறப்பை பெற்றார். அக்னி-4 ஏவுகணை சோதனை வெற்றியால் தற்போது அவர் "அக்னிபுத்ரி" (நெருப்பின் மகள்) என்று புகழப்படுகிறார்.

அக்னி-4 ஏவுகணை இந்திய ராணுவ ஏவுகணை தொழில் நுட்பத்தில் மிக முக்கிய பங்கு வகிக்கிறது. 20 மீட்டர் நீளம் கொண்ட இத்தகைய நவீன ஏவுகணை அமெரிக்கா, ரஷியா, சீனா, பிரான்சு ஆகிய 4 நாடுகளிடம் மட்டுமே உள்ளது. குறிப்பாக ஏவுகணை தொழில் நுட்பத்தில் சீனாவுக்கு நிகரான பலத்தை அக்னி-4 ஏவுகணை மூலம் இந்திய ராணுவமும் பெற்று விட்டது குறிப்பிடத்தக்கது. இந்த மகத்தான சாதனையைத்தான் டெசிதாமஸ் ஓசையின்றி செய்துள்ளார்.

கேரள மாநிலம் ஆலப்புழையில் பிறந்த டெசிதாமஸ் பள்ளியில் படிக்கும் போது சந்திரனில் அப்பல்லோ விண்கலம் இறங்கியதை அறிந்து ராக்கெட் தொழில் நுட்பத்தில் ஆர்வம் கொண்டார். இதனால் ஏவுகணை தொழில் நுட்பம் தொடர்பாக எம்.டெக் படித்தார். 1988-ம் ஆண்டு ராணுவ ஆராய்ச்சி மேம்பாட்டுப் பிரிவில் சேர்ந்தார். ஏவுகணை திட்ட பிரிவில் டெசி தாமஸ் 20 ஆண்டுக்கும் மேலான அனுபவம் பெற்றவர். முன்னாள் ஜனாதிபதி அப்துல்கலாமின் வழிகாட்டுதலின் பேரில் பல ஏவுகணை திட்டப்பணிகளை இவர் சிறப்பாக நிறைவேற்றி உள்ளார்.

அப்துல் கலாமிடம் பெற்ற படிப்பினை இவரை ஏவுகணை பெண் என்ற புகழுக்கு உயர்த்தி உள்ளது. டெசிதாமஸ் இது பற்றி கூறுகையில், அறிவியலுக்கு ஆண்-பெண் என்ற வித்தியாசம் எல்லாம் கிடையாது. இந்த துறையில் நான் ஒரு விஞ்ஞானியாக கருதப்படுகிறேன். பெண் என்று செல்லப்படுவது இல்லை.

இந்த துறை மிகவும் முக்கியத்துவம் வாய்ந்தது. இதில் நான் மட்டுமல்ல. என் பிரிவில் இன்னும் 6 பெண் விஞ்ஞானிகள் உள்ளனர். அக்னி-4 ஏவுகணை சோதனை வெற்றியில் அவர்கள் எல்லாருக்கும் முக்கிய பங்கு உள்ளது என்றார்.

மாலைமலர்