பீகார் தேர்தல் - கலவரக்காரர்களை கண்டதும் சுட உத்தரவு

பீகாரில் இன்று முதல் கட்ட தேர்தல் 47 தொகுதிகளில் வாக்குப்பதிவு; கலவரக்காரர்களை கண்டதும் சுட உத்தரவு



243 உறுப்பினர்களை கொண்ட பீகார் மாநில சட்டசபைக்கு 6 கட்டங்களாக தேர்தல் நடத்தப்படுகிறது. முதல் கட்டமாக 47 சட்டசபை தொகுதிகளுக்கு இன்று (வியாழக்கிழமை) வாக்குப்பதிவு நடைபெறுகிறது.

இந்த தொகுதிகளில் மொத்தம் 1 கோடியே 6 லட்சத்து 99 ஆயிரத்து 895 வாக்காளர்கள் உள்ளனர். இவர்கள் வாக்கு அளிப்பதற்காக 10 ஆயிரத்து 868 ஓட்டுச்சாவடிகள் அமைக்கப்பட்டு உள்ளன. வாக்குப்பதிவுக்கு 25 ஆயிரத்து 728 மின்னணு வாக்குப்பதிவு எந்திரங்கள் பயன்படுத்தப்படுகின்றன. பதற்றம் நிறைந்த ஓட்டுச்சாவடிகளில் கேமராக்கள் மூலம் வாக்குப்பதிவை படம் பிடிக்க ஏற்பாடு செய்யப்பட்டு உள்ளது.

ஓட்டுப்பதிவு காலை 7 மணிக்கு தொடங்கி மாலை 5 மணி வரை நடைபெறும். மாவோயிஸ்டுகளின் ஆதிக்கம் உள்ள தொகுதிகளில் மாலை 3 மணியுடன் வாக்குப்பதிவு முடிந்து விடும்.

47 தொகுதிகளிலும் 52 பெண்கள் உள்பட 631 வேட்பாளர்கள் போட்டியிடுகிறார்கள். ஆளும் ஐக்கிய ஜனதாதளம் 26 தொகுதிகளிலும், அதன் கூட்டணி கட்சியான பாரதீய ஜனதா 21 தொகுதிகளிலும் வேட்பாளர்களை நிறுத்தி உள்ளன. லாலு பிரசாத்தின் ராஷ்டிரீய ஜனதாதளம் 31 தொகுதிகளிலும், அதன் கூட்டணி கட்சியான ராம்விலாஸ் பஸ்வானின் லோக் ஜனசக்தி 16 தொகுதிகளிலும் போட்டியிடுகின்றன. காங்கிரசும், பகுஜன் சமாஜ் கட்சியும் 47 தொகுதிகளிலும் வேட்பாளர்களை நிறுத்தி இருக்கின்றன.

இதே போல் மற்ற கட்சிகளும் வேட்பாளர்களை நிறுத்தி இருக்கின்றன.

இன்று தேர்தலை சந்திப்பவர்களில் மாநில காங்கிரஸ் தலைவர் சவுத்ரி மெகபூர் அலி கைசர், முன்னாள் எம்.பி. பப்பு யாதவின் மனைவி ரஞ்சீத் ரஞ்சன், லவ்லி ஆனந்த் ஆகியோர் குறிப்பிடத்தக்கவர்கள் ஆவார்கள்.

ஓட்டுப்பதிவை அமைதியாகவும், சுமூகமாகவும் நடத்தி முடிப்பதற்கான ஏற்பாடுகளை தேர்தல் கமிஷன் செய்து உள்ளது. தேர்தல் கமிஷன் பார்வையாளர்களை நியமித்து இருக்கிறது.

எல்லா தொகுதிகளிலும் பலத்த பாதுகாப்பு போடப்பட்டு உள்ளது. உள்ளூர் போலீசாருடன் 45 ஆயிரம் துணை ராணுவ படையினரும் பாதுகாப்பு பணியில் ஈடுபடுத்தப்படுகிறார்கள். ராணுவ ஹெலிகாப்டர் மூலமும் கண்காணிக்க ஏற்பாடு செய்யப்பட்டு இருக்கிறது. ஆறுகளில் படகுகளில் சென்றும் பாதுகாப்பு படையினர் கண்காணிக்க இருக்கிறார்கள்.

எல்லா போலீஸ் நிலையங்களும் `உஷார்' நிலையில் வைக்கப்பட்டு உள்ளன. பதற்றம் காணப்படும் பகுதியில் பாதுகாப்பு படையினர் நேற்று கொடி அணிவகுப்பு நடத்தினார்கள். கலவரத்தில் ஈடுபடுபவர்களை கண்டதும் சுட்டுத்தள்ள உத்தரவிடப்பட்டு இருக்கிறது.

வாக்குப்பதிவை யொட்டி, போலீசார் பல்வேறு இடங்களில் சோதனை நடத்தி 577 துப்பாக்கிகள், குண்டுகள் மற்றும் ஏராளமான வெடிபொருட்களை பறிமுதல் செய்து இருப்பதாக பீகார் போலீஸ் டி.ஜி.பி.நீலமணி கூறினார். மாநிலம் முழுவதும் சட்ட விரோதமாக செயல் பட்ட 23 சிறிய துப்பாக்கி தொழிற்சாலைகள் கண்டு பிடிக்கப்பட்டு இருப்பதாக தெரிவித்த அவர், முன்னெச்சரிக்கை நடவடிக்கையாக ஏராளமான பேர் கைது செய்யப்பட்டு இருப்பதாகவும் கூறினார்.

இன்று வாக்குப்பதிவு நடைபெறும் பெரும்பாலான தொகுதிகள் பீகாரின் வட பகுதியில் அமைந்து உள்ளன. இதனால் 700 கிலோ மீட்டர் நீள நேபாள எல்லை முழுவதும் `சீல்' வைக்கப்பட்டு உள்ளது. இதேபோல் மேற்கு வங்காள மாநிலத்தில் உள்ள புருனியா மாவட்ட எல்லையும் `சீல்' வைக்கப்பட்டு இருக்கிறது.

தேர்தலை புறக்கணிக்குமாறு அழைப்பு விடுத்து முங்கர் மாவட்டத்தில் சில இடங்களில் மாவோயிஸ்டுகள் சுவரொட்டிகளை ஒட்டி இருந்தனர். அவற்றை போலீசார் அப்புறப்படுத்தினார்கள். இந்த மாவட்டத்தில் உள்ள 161 வாக்குச்சாவடிகள் பதற்றம் நிறைந்த வாக்குச்சாவடிகளாக கண்டறியப்பட்டு, அவற்றுக்கு கூடுதல் பாதுகாப்பு போடப்பட்டு உள்ளது.


பீகாரில் 6 கட்ட வாக்குப்பதிவு முடிந்ததும், நவம்பர் 24-ந் தேதி ஓட்டுகள் எண்ணப்பட்டு முடிவுகள் அறிவிக்கப்படும்.

மாலைமலர்!