காங்கிரஸின் சவாலை சந்திக்க ரெட்டி சகோதரர்கள் தயார்

சட்டவிரோத சுரங்கத் தொழில் தொடர்பாக காங்கிரஸ் மற்றும் மதச்சார்பற்ற ஜனதாதள தலைவர்கள் விடுத்துள்ள சவாலை எதிர்கொள்ளத் தயாராக இருப்பதாக கர்நாடக சுற்றுலாத் துறை அமைச்சர் ஜனார்த்தன ரெட்டி தெரிவித்தார்.
அமைச்சர்கள் கருணாகர ரெட்டி, ஜனார்த்தன ரெட்டி மற்றும் இவர்களது நெருங்கிய நண்பர் ஸ்ரீராமுலு ஆகியோர் சட்டவிரோதமாக இரும்புத்தாதுவை வெட்டி எடுத்து வெளிநாடுகளுக்கு ஏற்றுமதி செய்து வருவதாக காங்கிரஸ், ம.ஜனதாதள கட்சிகள் புகார் கூறி வருகின்றன.
இதுதொடர்பாக சிபிஐ விசாரணைக்கு உத்தரவிடக் கோரி சட்டப்பேரவையில் கடந்த வாரம் பகல்-இரவாக தர்னா போராட்டத்தையும் அக்கட்சி எம்எல்ஏக்கள் மேற்கொண்டனர். ஆனால் அரசு இதை ஏற்கவில்லை.

இதையடுத்து காங்கிரஸ் தலைவர்கள் கடந்த ஜூலை 16-ம் தேதி தில்லி சென்று பிரதமர் மன்மோகன்சிங், மத்திய உள்துறை அமைச்சர் சுஷ்மா ஸ்வராஜ், காங்கிரஸ் தலைவர் சோனியா காந்தி ஆகியோரை சந்தித்து சட்டவிரோத சுரங்கத் தொழில் தொடர்பாக சிபிஐ விசாரணைக்கு உத்தரவிட கோரி மனு அளித்தனர்.

இதே நேரத்தில் முதல்வர் எடியூரப்பாவும் மூத்த அமைச்சர்களுடன் தில்லி சென்று, பிரதமர் மன்மோகன்சிங், மற்றும் உள்துறை அமைச்சர் சிதம்பரத்தை சந்தித்து, சட்டவிரோத சுரங்கத் தொழில் புகார் தொடர்பாக விளக்கம் அளித்தார். மேலும் இரும்புத் தாதுவை வெளிநாடுகளுக்கு ஏற்றுமதி செய்வதை தடை செய்யவும் அவர் வலியுறுத்தினார்.

பிறகு பாஜக தலைவர்கள் அத்வானி, நிதின் கட்கரி ஆகியோர் கலந்து கொண்ட அக்கட்சியின் உயர்நிலைக்குழு கூட்டத்தில் இப்பிரச்னை குறித்து விவாதிக்கப்பட்டது. அப்போது அத்வானி கூறுகையில் தென் மாநிலங்களில் அமைந்துள்ள முதல் பாஜக அரசை காப்பாற்ற எல்லா வகையிலும் நடவடிக்கை எடுக்க வேண்டும். அதே சமயத்தில் கட்சிக்கு கெட்ட பெயர் ஏற்படாமல் பார்த்துக் கொள்ள வேண்டும் என தெரிவித்துள்ளார்.
இதையடுத்து ரெட்டி சகோதரர்களையும், ஸ்ரீராமுலுவையும் தில்லிவரும்படி பாஜக மேலிடம் கேட்டுக்கொண்டது. அதைத்தொடர்ந்து அவர்கள் மூவரும் தில்லி வந்தனர். தில்லியில் ஞாயிற்றுக்கிழமை காலை சுஷ்மா ஸ்வராஜை சந்தித்து தங்களது நிலையை ரெட்டி சகோதரர்களும், ஸ்ரீராமுலுவும் தெரிவித்தனர்.

அதன்பிறகு காலை 8.30 மணிக்கு தில்லியில் உள்ள கர்நாடக பவனில் முதல்வர் எடியூரப்பாவை சந்தித்து ஆலோசனை நடத்தினர். சுமார் ஒன்றரை மணி நேரம் நடந்த இந்த ஆலோசனைக்குப் பிறகு நிருபர்களிடம் ஜனார்த்தன ரெட்டி கூறியதாவது:

எங்கள் மீது காங்கிரஸ், மதச்சார்பற்ற ஜனதாதள கட்சித் தலைவர்கள் கூறிவரும் புகார் குறித்து சுஷ்மா ஸ்வராஜை சந்தித்து விளக்கம் அளித்துள்ளோம். எங்களால் கட்சிக்கு எந்தவித பிரச்னையும் ஏற்படாது. பாஜகவின் உண்மையான தொண்டர்களாக கட்சிப் பணியாற்றி வருகிறோம்.

எங்களது வளர்ச்சியை தாங்க முடியாமல் காங்கிரஸ், மதச்சார்பற்ற ஜனதாதள கட்சிகள் எங்கள் மீது உண்மைக்கு மாறான குற்றச்சாட்டுகளைக் கூறிவருகின்றன. இதுதொடர்பாக அந்தக்கட்சித் தலைவர்கள் எங்களுக்கு விடுத்துள்ள சவால்களை எதிர் கொள்ளத் தயாராக இருக்கிறோம்.
பாஜகவில் முதல்வர் எடியூரப்பா தலைமையில் அனைவரும் ஒற்றுமையாக செயல்பட்டு வருகிறோம். முதல்வர் மற்றும் பாஜக தலைவர்கள் மீது எங்களுக்கு வருத்தம் ஏதும் இல்லை. எல்லோரும் ஒன்றாகவே இருந்து செயல்பட்டு வருகிறோம்.

எங்கள் மீதான புகார்களுக்கு திங்கள்கிழமை பெங்களூரில் நடைபெறவுள்ள பத்திரிகையாளர்கள் சந்திப்பு நிகழ்ச்சியில் பதில் அளிக்கவுள்ளோம் என்றார் அவர்.