ஏன் காத்திருந்தீர்!

பல்லவ வேந்தனாகிய மகேந்திரவர்மனின் மறைவிற்குப் பிறகு நரசிம்மவர்மன் ஆட்சிக்கு வரலானான். பல்லவர்களுக்கும் சாளுக்கியர்களுக்கும் இடையே நிலவும் பகையானது தீராப்பகையாக இருந்தது. சாளுக்கிய வேந்தனான இரண்டாம் புலிகேசி பல்லவனை வெல்லக் காலம் கருதியபடி காத்திருந்தான்.

மகேந்திரனின் மறைவுக்குப் பிறகு, இதுவே சரியான காலம் என்பதால் புலிகேசி காஞ்சியை நோக்கிப் படையெடுக்கலானான். நரசிம்மன் திகைப்படைந்தான். எதிர்பார்க்காத படையெடுப்பாக இருப்பதால் அரசவையைக் கூட்டி ஆலோசிக்கலானான். நம் படைகள் மட்டும் என்றால் புலிகேசியின் படையினுக்கு ஈடாகாதே என வருந்தலானான். அமைச்சர் முதலானோர் நம்முடைய படை வெல்ல வேண்டுமானால் சோழ நாட்டின் பரஞ்சோதி தலைமை தாங்கினால் கட்டாயமாக நாம் வெல்வோம் என்று ஆலோசனை வழங்கினார். நரசிம்மனும் உடனடியாக ஓலை எழுதி நண்பனுக்கு உதவுமாறு வேண்டினான்.

தூதுவன், நரசிம்மனின் ஓலையை பரஞ்சோதியிடம் அளித்தான். ஓலையைப் படித்த பரஞ்சோதி, நண்பனுக்கு உதவுதலே மரபு. இருவரும் மாற்றவர் ஆயினும், அருகிலிருக்கும் நண்பரான நரசிம்மனுக்கு உதவி புரிதலே சிறந்தது என்பதால் சம்மதம் தெரிவித்தான்.

பரஞ்சோதி காஞ்சி நோக்கி வரலானான். நரசிம்மன் ஆதவனைக் கண்ட தாமரையாய் முகம் மலர்ந்தான். பரஞ்சோதி காஞ்சியில் வீற்றிருக்கலானான்.

புலிகேசியின் படைகள் காஞ்சியை நோக்கி வரலாயின. துங்கபத்திரா ஆறு கடந்தபோதும் போருக்குச் செல்லாமல் பேசாமல் இருந்தான். வேங்கடத்தினைக் கடந்தபோதும் பேசாமல் இருந்தான். பரஞ்சோதியின் அமைதி, மற்றவர்களுக்கு கேள்விக்குறியாக அமைந்தது. புலிகேசியின் படைகள் "சூரமாரம்' எனும் இடத்தை நெருங்கலாயிற்று. இவ்விடம் காஞ்சியிலிருந்து 15 கல் தொலைவில் உள்ளது. இப்போது பரஞ்சோதி போர் முரசினைக் கொட்டச் செய்தான். சினம் பொங்கத் துள்ளி எழுந்தான். வீரர்கள் அவன் பின் சென்றனர். சூரமாரம் என்ற இடத்தினுள் புலிகேசியின் படைகள் நுழைந்ததும், பரஞ்சோதி தன்னுடைய படையினைச் சுற்றி வளைக்கச் செய்தான்.

புலிகேசியால் எங்கும் செல்ல முடியவில்லை. போர்க்களத்தில் புலிகேசிக்கு பெரும் இழப்பு ஏற்படலாயிற்று. உதவிக்குக் கூட ஒருவருமில்லாமல் தோற்றோடினான். நரசிம்மனின் அனுமதியுடன் புலிகேசியை வாதாபிவரை துரத்திச் சென்று வெற்றிக் கொடியை நாட்டினான். புலிகேசியுடன் அதுவரை இருந்து வந்த பகைமைக்கு சரியான பதிலடியைக் கொடுத்தது பரஞ்சோதியினால்தான்.

நரசிம்மனுக்கு ஒரு சந்தேகம் இருந்து வந்தது. பரஞ்சோதியிடம், ""புலிகேசியின் படைகள் சூரமாரம் இடம் அருகே வரும் வரை ஏன் காத்திருந்தனர்,'' என்று கேட்டான்.

""பிற இடத்தில் அவனை எதிர்த்திருந்தால் அவனுக்கு உதவி கிடைத்திருக்கும். உணவு, நீர் இவை போதிய அளவு கிடைத்திருக்கும். ஆனால், இவ்விடமோ நமது எல்லையில் உள்ளது. மேலும், எதிர்பாராமல் தாக்குதல் நடத்தியதால், புலிகேசி திக்குமுக்காடிப் போனான். இதுவே நாம் பெற்ற வெற்றிக்கான ரகசியங்கள்,'' என்றான்.

நரசிம்மன் பரஞ்சோதியின் ராஜதந்திரத்தைப் போற்றலானான்.

***