சபைக்கு வராத மத்திய அமைச்சருக்கு வெங்கையா கண்டிப்பு

புதுடில்லி:
கேள்விக்கு பதில் அளிக்க வேண்டிய நேரத்தில்,
சபைக்கு வராத, மத்திய, கால்நடைத்துறை இணை அமைச்சர்,
சஞ்சீவ் குமார் பல்யானை, ராஜ்யசபா தலைவர் வெங்கையா
நாயுடு, கண்டித்தார்.

ராஜ்யசபாவில் நேற்று, கேள்வி நேரம் முடிந்த பின், கால்நடைத்
துறை தொடர்பான பிரச்னையை, உறுப்பினர் ஒருவர் எழுப்பினார்.
அதற்கு பதிலளிக்க வேண்டிய, மத்திய கால்நடைத் துறை,
மீன்வளத்துறை இணை அமைச்சரும், பா.ஜ.,வைச் சேர்ந்தவருமான,
சஞ்சீவ் குமார் பல்யான், சபையில் இல்லை.

இதனால், சபை அலுவல்களை நடத்திக் கொண்டிருந்த, ராஜ்யசபா
தலைவரும், துணை ஜனாதிபதியுமான, வெங்கையா நாயுடு,
கடும் கோபம் அடைந்தார். அமைச்சர் சஞ்சீவ் குமாரை அழைத்து
வரும்படி, சபை காவலர்களுக்கு உத்தரவிட்டார்.

இதையடுத்து, அமைச்சர், சபைக்கு வந்தார்.
அப்போது, ''கேள்விக்கு பதில் அளிக்க வேண்டும் என, உங்களுக்கு
தெரியாதா; ஏன் சபையில் இல்லை,'' என, வெங்கையா நாயுடு,
கோபமாக கூறினார்.

இதையடுத்து, ''சபையில் இல்லாதது தவறு தான்; இதற்காக
வருந்துகிறேன். இனி, இதுபோல் நடக்காது,'' என, அமைச்சர்
பல்யான் தெரிவித்தார்.

சபைக்கு வராமல், 'மட்டம்' போடும் அமைச்சர்களை,
பிரதமர் நரேந்திர மோடி ஏற்கனவே கண்டித்திருந்தது
குறிப்பிடத்தக்கது.
-
-------------------------------------
தினமலர்