விலையில்லா மடிக்கணினி வழங்கக்கோரிஎம்.எல்.ஏ.க்களை சிறைபிடித்து மாணவர்கள்

ஈரோடு,

தமிழக அரசின் பள்ளி கல்வித்துறை சார்பில் தமிழ்நாட்டில் பிளஸ்-1, பிளஸ்-2 படிக்கும் மாணவ-மாணவிகளுக்கு இலவச மடிக்கணினிகள் வழங்கப்பட்டு வருகின்றன.

இந்த நிகழ்ச்சிகள் ஈரோடு மாவட்டத்தில் ஒவ்வொரு பகுதி வாரியாக நடந்து வருகிறது. தற்போது பள்ளிக்கூடத்தில் படித்து வரும் மாணவ-மாணவிகளுக்கு ஆங்காங்கே அமைச்சர்கள் மற்றும் எம்.எல்.ஏ.க்கள் மடிக்கணினிகள் வழங்கி வருகிறார்கள். இந்த நிலையில் கடந்த 2017-2018-ம் கல்வி ஆண்டு படித்த மாணவ-மாணவிகளுக்கு இலவச மடிக்கணினிகள் வழங்கப்படவில்லை என்ற புகார்கள் எழுந்தன.

போராட்டம்

நேற்று ஈரோடு மாநகராட்சிக்கு உள்பட்ட கருங்கல் பாளையம் மாநகராட்சி மகளிர் மேல்நிலைப்பள்ளி, வீரப்பன்சத்திரம் அரசு மகளிர் மேல்நிலைப்பள்ளி, குமலன்குட்டை அரசு மேல்நிலைப்பள்ளி ஆகிய 3 பள்ளிக் கூடங்களில் மடிக்கணினிகள் வழங்கும் நிகழ்ச்சி நடந்தது.

எம்.எல்.ஏ.க்கள் கே.வி.ராமலிங்கம், கே.எஸ்.தென்னரசு ஆகியோர் இந்த நிகழ்ச்சிகளில் கலந்து கொண்டு மாணவ-மாணவிகளுக்கு மடிக்கணினிகள் வழங்கினார்கள். இந்த 3 பள்ளிக்கூடங்களிலும் முன்னாள் மாணவ-மாணவிகள் தங்களுக்கு வழங்கப்படாமல் நிலுவையில் உள்ள மடிக்கணினிகளை வழங்க வேண்டும் என்று கோரிக்கை விடுத்தனர்.

இதில் பலர் தற்போது கல்லூரிகளில் படித்து வருகிறார்கள். இதற்கு எம்.எல்.ஏ.க்கள் அளித்த பதில் திருப்தியாக இல்லை என்று மாணவ-மாணவிகள் சாலை மறியல் போராட்டத்தில் ஈடுபட்டதால் பரபரப்பு ஏற்பட்டது.

எம்.எல்.ஏ.க்கள் சிறைபிடிப்பு

போராட்டம் நடத்திய மாணவ - மாணவிகள் எம்.எல்.ஏ.க்களின் கார்களை மறித்து முற்றுகையிட்டனர். வீரப்பன்சத்திரம் அரசு மகளிர் மேல்நிலை பள்ளியில் மடிக்கணினிகள் வழங்கும் விழா முடிந்து எம்.எல்.ஏ.க்கள் வெளியே வந்தபோது மாணவ- மாணவிகளில் ஒரு குழுவினர் எம்.எல்.ஏ.க்களின் வாகனங்களுக்கு முன்பு உட்கார்ந்து போராட்டத்தில் ஈடுபட்டனர். எம்.எல்.ஏ.க்கள் வெளியே செல்ல முடியாமல் சிறை பிடிக்கப்பட்டதால் பரபரப்பு ஏற்பட்டது.

முற்றுகையிட்ட மாணவ- மாணவிகளை போலீசார் அப்புறப்படுத்திய பின்னர் எம்.எல்.ஏ.க்களின் வாகனங்கள் வெளியே புறப்பட்டு சென்றன. கலையாமல் கோஷம் எழுப்பிக்கொண்டு இருந்த மாணவர்கள் மீது போலீசார் லேசான தடியடி நடத்தி கலைத்தனர்.

மாணவ-மாணவிகள் கைது

போராட்டம் நடத்திய மாணவ- மாணவிகள் 58 பேர் கைது செய்யப்பட்டு அருகில் உள்ள திருமண மண்டபத்தில் தங்க வைக்கப்பட்டனர். பின்னர் மாலையில் அனைவரும் விடுதலை செய்யப்பட்டனர்.

ஈரோடு மாநகர் பகுதியில் ஒரே நாளில் மாணவ-மாணவிகள் மடிக்கணினி கேட்டு நடத்திய போராட்டங்கள் பரபரப்பை ஏற்படுத்தியது.
-
தினத்தந்தி

மடிக்கணி படிக்க அல்ல. மற்ற விசயங்களுக்கு.
மாணவர்கள் மேல் குற்றமில்லை இதை கொடுத்து
பழக்கிய அரசாங்கமே காரணம் இந்த கணி வைத்து
தான் பல மேதைகளும் அறிவாளிகளும் உறுவாகினார்களா?
அரசியல் கட்சிகள் ஆட்சி கட்டிலில் அமர நடத்திய நாடகம்.
பலரையும் பாழ்படுத்திவிட்டனர்.
இது தான் உண்மை.