மலேசிய செய்திகள்

First topic message reminder :

மீண்டும் புகைமூட்டம் பரவும் வாய்ப்பு!

கோலாலம்பூர் – இந்தோனிசியாவில் பற்றி எரியும் காட்டுத் தீ அணைக்கப்படவில்லை என்றால், அதன் அண்டை நாடுகளில் மீண்டும் புகைமூட்டம் (Haze) பரவும் வாய்ப்பு இருப்பதாக வானிலை ஆராய்ச்சியாளர்கள் தெரிவித்துள்ளனர்.

“தற்போது, தென்கிழக்கு நோக்கி காற்று வீசுகின்றது. ஒருவேளை புகைமூட்டம் ஏற்பட்டால், அது காற்றின் மூலம் அண்டை நாடுகளுக்கு வர வாய்ப்புள்ளது” என்று வானிலை ஆய்வு, தட்பவெட்ப நிலை மற்றும் புவி இயற்பியல் முகமை தெரிவித்துள்ளது.

அம்முகமை நேற்று திங்கட்கிழமை செயற்கைக் கோளின் அடிப்படையில் வெளியிட்ட தகவலின் படி, ரியாவில் ரோகான் ஹிலிர் பகுதியில் சுமார் 54 இடங்களில் காட்டுத் தீ எரிவது கண்டறியப்பட்டுள்ளது.

சென்னை விமான நிலையத்தில், மலேசிய பெண்ணிடமிருந்து தாலியுடன் இதர நகைகளும் அபகரிக்கப்பட்டதா? ; இல்லை என்கிறது சென்னை சுங்கத் துறை

அண்மையில், தனது கணவருடன் மலேசியாவிலிருந்து, சென்னை அண்ணா விமான நிலையம் சென்றடைந்த மலேசிய இந்தியப் பெண் ஒருவரின் தங்க தாலி உட்பட அனைத்து நகைகளும் வலுக்கட்டாயமாக அவரிடமிருந்து அபகரிக்கப்பட்டதாகவும், இரண்டு மணி நேரத்திற்கும் கூடுதலாக அவர்கள் விமான நிலையத்தில் காக்க வைக்கப்பட்டதாகவும் கூறப்படும் குற்றச்சாட்டை சென்னை சுங்கத் துறை மறுத்துள்ளது.

சம்பந்தப்பட்ட பெண்ணும் அவரது கணவரும் அனுமதிக்கப்பட்டதைக் காட்டிலும் கூடுதலான அளவு நகை போட்டிருந்ததோடு, அது தொடர்பான விவரங்களை தர மறுத்தனர். நகைகளுக்கான வரியையும் செலுத்த தவறியதால், அவர்கள் இந்தியாவிற்குள் அந்த நகைகளை கொண்டு செல்ல தடை விதிக்கப்பட்டதாக, சென்னை சுங்கத் துறை ஓர் அறிக்கையின் வாயிலாக தெரிவித்தது.

அதோடு, அப்பெண் குற்றம்சாட்டியிருப்பதுபோல, கழுத்திலிருந்து தங்க தாலியை கழற்ற ஒருபோதும் உத்தரவிடப்படவில்லை என்பதையும் அது தெளிவுப்படுத்தியது.

அந்த நகைகள் தங்களின் சொந்த நகைகள் என கூறி விமான நிலைய சுங்கத் துறை அதிகாரிகளிடம் அவர்கள் வாக்குவாதத்தில் ஈடுப்பட்டனர்.

எனினும், வாக்குவாதத்திற்கு பின்னர், சம்பந்தப்பட்ட பெண்ணின் கணவர் நகைகளை அதிகாரிகளின் சோதனைக்காக தந்தார்.

அதன் வாயிலாக, அந்த நகைகள் மொத்தம் 285 கிராம் அல்லது 35 சவரன் இருந்ததும், அதன் மொத்த மதிப்பு 82 ஆயிரத்து 800 ரிங்கிட்டுக்கும் கூடுதலாக இருந்ததும் தெரிய வந்தது. அதற்காக 35 ஆயிரத்து 900 ரிங்கிட் வரி செலுத்துமாறு அவர்கள் கேட்டுக் கொள்ளப்பட்டனர்.

அதற்கும் அவர்கள் மறுத்ததால், நகைகள் மட்டும் விமான நிலையத்தில் தடுத்து வைக்கப்பட்டதோடு, அதற்காக அதிகாரப்பூர்வ ரசீதும் வெளியிட்டப்பட்டது.

இம்மாதம் 23-ஆம் தேதி, அவர்கள் மலேசியா திரும்பும் போது, அபராதத்தை செலுத்தியதால், அந்த நகைகள் அவர்களிடமே திரும்ப ஒப்படைக்கப்பட்டதையும் சென்னை சுங்கத் துறை உறுதிப்படுத்தியது.

முன்னதாக, சென்னை விமான நிலையம் சென்றடைந்த தாமும், தமது கணவரும் சவாலான சூழலை எதிர்கொள்ள நேர்ந்ததாகவும், தனது தாலி உட்பட நகைகள் அனைத்தையும் களட்டி தருமாறு சுங்கத் துறை அதிகாரிகள் நெருகுதல் அளித்ததாகவும் குற்றச்சாட்டி மலேசிய பெண் ஒருவர் வெளியிட்டிருந்த காணொளி வைரலானது குறிப்பிடத்தக்கது.