நாகேஸ்வரர் ஆலய உலா

-
குடமூக்கு, குடந்தை என்ற பெயர்களால் கும்பகோணம்
அழைக்கப்படுகிறது. பிப்ரவரி 13 முதல் 22 வரை நிகழவுள்ள
மகாமகத்தை முன்னிட்டு மகாமகக் குளத்தில் தீர்த்தவாரி
காணும் சைவக் கோயில்கள், காவிரியாற்றில் தீர்த்தவாரி
காணும் வைணவக் கோயில்கள் உள்ளிட்ட பல கோயில்களில்
குடமுழுக்கு நடைபெற்றுள்ளது.
-
இக்கோயில்களில் முக்கியமானது நாகேஸ்வரர் கோயில்.
ஒவ்வொரு முறை செல்லும்போதும் புதியதாகச் செல்லும்
உணர்வை ஏற்படுத்தும்.
-
ஒவ்வொரு கோயிலும் ஒவ்வொரு அழகு
-
கும்பகோணத்திலுள்ள கோயில்களில் சாரங்கபாணி கோயில்
அழகான கோபுரத்திற்குப் பெயர்பெற்றது. ராமசாமி கோயிலின்
அழகான சிற்ப மண்டபமும், ராமாயண ஓவியங்களும் சிறப்பு
வாய்ந்தவை.
-
நாகேஸ்வரர் கோயிலுக்குத் தேர் வடிவ நடராசர் மண்டபமும்,
கருவறையைச் சுற்றியுள்ள அழகிய சிற்பங்களும், கருவறையுடன்
கூடிய விமானமும் முக்கியத்துவம் வாய்ந்தவை.
-
மகாமகத்தின்போது மகாமகக் குளத்தில் தீர்த்தவாரி காண்கின்ற
காசி விஸ்வநாதர் கோயில், கும்பேஸ்வரர் கோயில், நாகேஸ்வரர்
கோயில், சோமேஸ்வரர் கோயில், கோடீஸ்வரர் கோயில்,
காளஹஸ்தீஸ்வரர் கோயில், கௌதமேஸ்வரர் கோயில்,
அமிர்தகலசநாதர் கோயில், பாணபுரீஸ்வரர் கோயில்,
அபிமுகேஸ்வரர் கோயில், கம்பட்ட விஸ்வநாதர் கோயில்,
ஏகாம்பரேஸ்வரர் கோயில்
ஆகிய 12 கோயில்களில் 10 கோயில்கள் கும்பகோணம் நகரில்
உள்ளன.
-
மற்ற இரு கோயில்களான கோடீஸ்வரர் கோயில் கொட்டையூரிலும்,
அமிர்தகலசநாதர் கோயில் சாக்கோட்டையிலும் உள்ளன.
-

நாகராஜனும் சூரியனும் பூஜித்த ஆலயம்
-
தேவாரப் பாடல் பெற்ற தலங்களில், காவிரியின் தென் கரையில்
அமைந்துள்ள 27ஆவது தலம் நாகேஸ்வரன் கோயில்.
கி.பி. ஏழாம் நூற்றாண்டில் செங்கற்கோயிலாக இருந்து
கி.பி.ஒன்பதாம் நூற்றாண்டில் ஆதித்த சோழனால் கற்கோயிலாக
வடிவம் பெற்ற பெருமையுடையது

இக்கோயில். நாகராஜனும், சூரியனும் பூசித்த பெருமை பெற்றது.
இத்தலத்தில் உறையும் இறைவனை நாகேசப்பெருமான் என்றும்,
தலத்தினை நாகேஸ்வரம் என்றும் அழைப்பர்.
-
பாஸ்கர சேத்திரம் என்று பெயர் பெற்றதற்கு இத்தலம் சான்றாக
உள்ளது. இத்தலத்தில் இன்றும் சித்திரை மாதம் 11, 12, 13 ஆகிய
நாள்களில் சூரிய கிரகணங்கள் கருவறையில் உள்ள
லிங்கத்திருமேனியின்மீது நேராக விழுகிற அரிய காட்சியைக்
காணமுடியும்.
-
திருநாவுக்கரசர் இங்குள்ள இறைவனைப் போற்றிப்பாடும்போது
இத்தலத்தினைக் குடந்தைக்கீழ்க்கோட்டம் என்கிறார்.
-
ஐந்து நிலைகளுடன் உள்ள ராஜகோபுரம் கிழக்கு நோக்கிய
நிலையில் உள்ளது. உள்ளே செல்லும்போது வலப்புறம் அம்பிகையின்
சன்னதி உள்ளது. இடப்புறம் சிங்கக்கிணறு உள்ளது.
-
அடுத்து இக்கோயிலில் திருப்பணி மேற்கொண்டு 1923-ல்
குடமுழுக்கு செய்த பாடகச்சேரி ராமலிங்கசுவாமிகளுக்கான தனி
சன்னதி அமைக்கப்பட்டுள்ளது.
-
12 ராசிகள் 12 ஆரங்கள்
-
நுழைவாயிலின் இரு புறமும் விநாயகரும், சுப்பிரமணியரும்
காணப்படுகின்றனர். நுழைவாயிலைக் கடந்து செல்லும்போது
கொடி மரம், பலிபீடம் காணப்படுகின்றன.

இடப்புறம் பதினாறு கால் மண்டபமும், வலப்புறமும் நடராஜர்
சன்னதியும் உள்ளன. நடராஜர் சன்னதி நகர்ந்து செல்லும் தேர்
வடிவில் அமைந்துள்ளது. மண்டபத்தில் இருபுறங்களிலும் கல்லால்
ஆன சக்கரங்கள் உள்ளன.

இரு குதிரைகளும், நான்கு யானைகளும் இழுத்துச் செல்லும்
நிலையில் இம்மண்டபம் அமைந்துள்ளது. சக்கரங்களின்
ஆரங்களாக 12 ராசிகளும் இடம்பெற்றுள்ளன.

இக்கோயிலின் உள்மண்டபத்தில் படைவெட்டி மாரியம்மன்,
நவக்கிரக சன்னதிகள் உள்ளன. கருவறையைச் சுற்றி வரும்போது
கருவறைக் கோஷ்டத்தில் தட்சிணாமூர்த்தி, அர்த்தநாரீஸ்வரர்,
பிரம்மா, துர்க்கை ஆகியோர் உள்ளனர். கருவறையின் பின்புறம்
வீதிவிடங்கர் (திருவாரூர்), சோளிங்கநாதர் (திருக்குவளை),
கண்ணாயிரநாதர் (திருக்காரவாயில்), வாய்மூர்நாதர்
(திருவாய்மூர்), மறைகாட்சி மணாளநாதர் (வேதாரண்யம்),
தர்பாரண்யேஸ்வரர் (திருநள்ளாறு) ஆகியோரைக் குறிக்கும்
லிங்கத்திருமேனிகள் காணப்படுகின்றன.

அடுத்து சுப்பிரமணியர், கஜலட்சுமி, சரஸ்வதி ஆகியோர்
காணப்படுகின்றனர்.

திருச்சுற்றில் சண்டிகேஸ்வரர் சன்னதி, சூரியன் சன்னதி,
சோமாஸ்கந்தர் சன்னதியும், நடராசர் சன்னதியும் அருகேயுள்ளன.
சூரியன் சன்னதி, வடகிழக்குப் பகுதியில் மேற்கு நோக்கிய நிலையில்
அமைந்துள்ளது.
-
ராமாயணச் சிற்பங்கள்
-
கருவறையில் லிங்கத்திருமேனியாக உள்ள மூலவர் நாகேஸ்வரர்
என்றும் நாகநாதர் என்றும் அழைக்கப்படுகிறார். கருவறையின்
வெளியே கோஷ்டத்திற்குக் கீழே அதிட்டானப்பகுதியில் சிறிய
அளவிலான சிற்பங்கள் காணப்படுகின்றன. இவற்றில் ராமாயணச்
சிற்பங்கள் உள்ளிட்ட சிற்பங்கள் அமைந்துள்ளன.
இவை போன்ற சிற்பங்களை திருப்புறம்பியத்திலும்,
புள்ளமங்கையிலும் காணமுடியும்.
-
பெரியநாயகி என்றும் பிரகந்நாயகி என்றும் அழைக்கப்படும்
அம்மன் சன்னதி தெற்கு நோக்கிய நிலையில் தனியாக அமைந்துள்ளது.
இச்சன்னதியில் ஆடிப்பூர அம்மன் சன்னதியும், பள்ளியறையும் உள்ளன.
-
அருகே பிராம்மி, மகேஸ்வரி, கௌமாரி, வைஷ்ணவி, வராகி,
இந்திராணி, சாமுண்டி ஆகியோர் உள்ளனர். கருவறையைச் சுற்றி
வரும்போது சண்டிகேஸ்வரி சன்னதி உள்ளது.
-
இக்கோயிலில் உள்ள சன்னதிகளில் முக்கியமானதாகக் கருதப்படுகின்ற
மற்றொரு சன்னதியான நாகர் சன்னதி வெளிச்சுற்றில் உள்ளது.
இங்குள்ள நாக கன்னி அம்மன் சன்னதியைச் சுற்றி அதிகமான நாக
சிற்பங்கள் காணப்படுகின்றன.
-
----------------------------
தமிழ் தி இந்து காம்