கடற்கரையில் பிளாஸ்டிக் தடுக்க பொதுமக்களுக்கு பேப்பர் பைகள்

**சிவா** · **சிவா** Tue Aug 25, 2009 3:33 pm

கடற்கரையில் பிளாஸ்டிக் பயன்படுத்துவதை தடுக்கவும், பொதுமக்களுக்கு விழிப்புணர்வு ஏற்படுத்தவும், நாளை மாலை கடற்கரை வரும் பொதுமக்களுக்கு பேப்பர் பைகளை மாநகராட்சி வழங்குகிறது. மெரினா கடற்கரை நேப்பியர் பாலம் முதல் கலங்கரை விளக்கம் வரை அழகுப்படுத்தும் பணிகள் வேகமாக நடந்து வருகிறது. இந்த பணிகளை மாநகராட்சி மேயர் மா.சுப்பிரமணியன் நேற்று காலை 6 மணிக்கு நேரில் ஆய்வு செய்ததுடன், கடற்கரைக்கு நடைபயிற்சி வரும் பொதுமக்களிடம் அழகுபடுத்தும் பணிகள் பற்றியும், அதிலுள்ள நிறை, குறைகள் பற்றி கேட்டார்.

அப்போது அங்கிருந்த ஏ.வி.எம். சரவணன் உட்பட பலர் மாநகராட்சிக்கு நன்றி தெரிவித்ததுடன், நடைபயிற்சி பாதையில் இருக்கைகள் அமைத்து தருமாறு கேட்டுக் கொண்டனர். பின்னர், மேயர் மா.சுப்பிரமணியன் நிருபர்களிடம் கூறியதாவது: நேப்பியர் பாலம் முதல் கலங்கரை விளக்கம் வரை 3.10 கி.மீ. நீளத்துக்கு ரூ.20 கோடியே 75 லட்சம் செலவில் அழகுபடுத்தும் பணி நடக்கிறது. நடைபாதையில் கிரானைட் கற்கள், கிரானைட் தூண்கள் மற்றும் துருப்பிடிக்காத ஸ்டீல் கைப்பிடிகள் அமைக்கும் பணிகள் நிறைவுபெறும் தருவாயில் உள்ளது. கடற்கரைக்கு வரும் பொதுமக்கள் பயன்பாட்டுக்காக 4 இடங்களில் கழிப்பிடங்கள் அமைக்கப்படும். ரூ.3.50 கோடியில் மின்விளக்குகள் அமைக்கப்பட உள்ளது. இதுவரை 90 சதவீத பணிகள் முடிந்துள்ளது.

மெரினா கடற்கரையில் பிளாஸ்டிக் பொருட்கள் பயன்படுத்துவதை தடுக்கும் வகையில், பொதுமக்களுக்கு விழிப்புணர்வு ஏற்படுத்த மாநகராட்சி முடிவு செய்துள்ளது. அதன்படி, நாளை மாலை கடற்கரை வரும் பொதுமக்களுக்கு பேப்பர் பைகள் வழங்கப்படும். மாநகராட்சி நடவடிக்கை எடுத்ததன் மூலம் மெரினா கடற்கரையில் உள்ள 1,500 கடைகளில் குடிநீர் பாக்கெட்டுகள், பாப்கார்ன்கள், ரஸ்னா போன்றவை பிளாட்டிக் பொருட்களில் விற்பனை செய்வது நிறுத்தப்பட்டுள்ளது. இவ்வாறு மேயர் மா.சுப்பிரமணியன் கூறினார். இந்த ஆய்வின்போது மாநகராட்சி ஆணையாளர் ராஜேஷ் லக்கானி, தலைமை பொறியாளர் பி.முருகேசன், மேற்பார்வை பொறியாளர் சந்திரசேகரன், மன்ற உறுப்பினர்கள் மதன்மோகன், உமாசாசவி ஆகியோர் உடன் இருந்தனர்.