யுத்தத்தை கைவிட்டு புத்தரின் பாதையில் நேபாளம் செல்கிறது: மோடி

நேபாள நாட்டிற்கு இரண்டு நாள் அரசு முறை பயணமாக சென்றுள்ள பிரதமர் மோடி அந்நாட்டு பாராளுமன்றத்தில் இன்று உரையாற்றினார். நேபாள மொழியில் ஆரம்பிக்கப்பட்ட அவரின் உணர்வுப்பூர்வமான உரைக்கு ஒட்டுமொத்த பாராளுமன்ற உறுப்பினர்களும் கைதட்டி பாராட்டுக்களை தெரிவித்தனர்.

அழகிய நாடான நேபாளத்திற்கு நண்பனாகவும், இந்திய தேசத்தின் பிரதமராகவும் நான் இங்கு வந்துள்ளேன் என்று நேபாள மொழியில் பேசிய மோடி பின்னர் இந்தி மொழியில் ஆற்றிய உரையில் கூறியிருப்பதாவது:

இந்திய நாட்டின் பிரதமராக பொறுப்பேற்ற நாள் முதல் நேபாள நாட்டுடனான உறவை வலுப்படுத்தவேண்டும் என மிகுந்த முக்கியத்துவத்துடன் எங்கள் அரசு செயல்பட்டுவருகிறது. 125 கோடி இந்திய மக்களின் நல்லெண்ணத்தையும், அன்பையும் சுமந்து நான் இந்த தேசத்திற்கு வந்துள்ளேன். நேபாள நாட்டின் அமைதிக்கான முயற்சியை உலகமே உற்று நோக்கிக்கொண்டிருக்கிறது. நீண்ட காலமாக வன்முறைக்களமாக திகழ்ந்த இப்பூமி இன்று வன்முறையற்று, அமைதிப்பூங்காவாக விளங்குவது கண்டு உலக நாடுகளே வியக்கின்றன.

அமைதியை வலியுறுத்திய புத்தர் பிறந்த இந்த புண்ணிய பூமியில் வசிக்கும் நீங்கள் யுத்தங்களை கைவிட்டு புத்தரின் பாதையில் பயணித்து வருகின்றீர்கள். இந்திய தேசத்திற்கும், நேபாள நாட்டிற்கும் இடையே உள்ள உறவு கங்கை நதிக்கும், இமயமலைக்கும் இடையே உள்ள உறவைப்போன்றது. நான் பாராளுமன்ற உறுப்பினராக தேர்ந்தெடுக்கப்பட்ட வாரணாசியிலும், காசியிலும் உள்ள கோவில்களில் நேபாள பூசாரிகள் இறைவனுக்கு தொண்டு செய்கின்றனர். அதே போல் நேபாளத்தில் உள்ள பசுபதிநாதர் ஆலயத்தில் இந்திய பூசாரிகள் தொண்டு செய்து வருகின்றனர். பழங்காலந்தொட்டே நம் இரு நாட்டுக்கும் இடையே உள்ள உறவிற்கு இதுவே எடுத்துக்காட்டு.

நேபாள நாட்டின் சட்டங்களுக்கு இந்தியாவின் ஆதரவு உண்டு. சட்டங்களை உருவாக்குபவர்கள் முனிவர்களை போன்ற மனமுள்ளவர்களாக இருக்கவேண்டும். அப்போது தான் முன்னேற்றத்தை நோக்கி சிந்திக்கமுடியும். நேபாள மக்களின் விருப்பப்படி அந்நாட்டை புதிய உயரத்திற்கு இந்தியா அழைத்துச்செல்லும். நெடுஞ்சாலை, தகவல் தொழில்நுட்பம், ஒலிபரப்பு தடங்கள் ஆகிய மூன்று வகைகளில் நேபாளத்திற்கு உதவ இந்தியா திட்டமிட்டுள்ளது.

நேபாள நாட்டிற்கு தேவையான மின்சாரத்தில் கூடுமான அளவு மின்சாரத்தை இந்தியா வழங்கும். உங்கள் நாட்டு உள்விவகாரங்களில் தலையிட நாங்கள் இங்கு வரவில்லை. உங்கள் முன்னேற்றத்திற்கு உதவவே நாங்கள் இங்கு வந்துள்ளோம் என்று மிகவும் உணர்வுப்பூர்வமாக மோடி உரையாற்றினார்.