உலகக் கோப்பை கால்பந்து போட்டி 2014

**சிவா** · **சிவா** Wed Jun 04, 2014 12:09 pm

First topic message reminder :

உலகமே ஆவலுடன் எதிர்நோக்கும் உலக கோப்பை கால்பந்து திருவிழா பிரேசில் நாட்டில் வருகிற 12–ந் தேதி தொடங்குகிறது. 4 ஆண்டுகளுக்கு ஒரு முறை நடைபெறும் இந்த கோலாகல கால்பந்து செய்திகள் மற்றும் கண்ணோட்டங்களை இங்கு பார்க்கலாம்

உலகம் முழுக்க 100 கோடி 'வெறி பிடித்த ரசிகர்கள்’ கொண்டாடவிருக்கும் விளையாட்டுத் திருவிழாவுக்குத் தயாராகிறது பிரேசில். 32 அணிகள் மோதும் உலகக் கோப்பை கால்பந்து போட்டித் தொடர் ஜூன் 12-ம் தேதி தொடங்குகிறது. உலகின் ஒரு மாத 'வைரல் டிரெண்டிங்’ ஆகவிருக்கும் போட்டியைப் பற்றி சில சுவாரஸ்யங்கள் இங்கே...

பிரேசிலில் இரண்டாவது முறையாக நடைபெறவிருக்கும் இந்தப் போட்டி, 20-வது கால்பந்து உலகக் கோப்பை போட்டி. 96 ஆயிரம் கோடி ரூபாய்க்கு மேல் செலவாகும் என்று மதிப்பிட்டிருக்கிறார்கள். பிரேசிலில் சட்டம்-ஒழுங்கு சிக்கல்கள் அதிகம் என்பதால், பாதுகாப்புக்காக மட்டும் 54 ஆயிரம் கோடி ரூபாய் ஒதுக்கப்பட்டுள்ளது. 50 ரசிகர்களுக்கு ஒரு போலீஸ் என்ற வகையில் பாதுகாப்பு வசதிகள்!

போட்டியில் விளையாடும் ஒவ்வொரு நாட்டின் கோரிக்கைக்கு ஏற்ப பல வசதிகள் செய்து தரப்பட்டுள்ளன. போர்ச்சுகல் நாடு, தனது நட்சத்திர வீரரான கிறிஸ்டியானோ ரொனால்டோவுடன் '24ஜ்7’ துப்பாக்கி ஏந்திய பாதுகாவலர்கள் நால்வர் இருக்க வேண்டும் என்று வற்புறுத்தியிருக்கிறது. வீரர்கள் தங்கும் அறைகளில் சத்தம் இல்லாத ஏ.சி. சாதனம் வேண்டும், குறைந்தபட்சம் தங்கள் நாட்டில் ஒளிபரப்பாகும் முக்கியமான ஆறு சேனல்கள் டி.வி-யில் தெரிய வேண்டும், ஒவ்வொரு குளியல் அறையிலும் ஜக்கூஸி வேண்டும்... என ஏகப்பட்ட 'வேண்டும்... டும்’கள்!

எப்போதுமே உலகக் கோப்பையை உலகின் பிரபல முக்கியஸ்தர் ஒருவர்தான் பந்தை உதைத்து தொடக்கிவைப்பார். ஆனால், இந்த முறை பந்தை எட்டி உதைத்து உலகக் கோப்பையைத் தொடக்கிவைக்கப்போவது ஒரு மாற்றுத்திறனாளி. இடுப்புக்குக் கீழே உணர்ச்சிகள் எதுவும் இல்லாத பக்கவாத நோயால் பாதிக்கப்பட்டிருக்கும் சிறுவன் ஒருவன்தான் உதைக்கக் காத்திருக்கிறான். சக்கர நாற்காலியில் இருந்து எழுந்து பந்தை உதைக்கும்போது, அதை அவன் உணர வேண்டும் என்பதற்காக அவன் உடலில் நவீன சென்சார்களைப் பொருத்தியிருக்கிறார்கள்.

போட்டிகளைக் காண, சுமார் 36 லட்சம் வெளிநாட்டு ரசிகர்கள் வருவார்கள் என எதிர்பார்க்கப்படுகிறது. இவர்கள் அனைவரும் தங்கும் அளவுக்கு ஹோட்டல்கள் இன்னும் தயாராகவில்லை. இதனால் பல இடங்களில் வீடுகள் மற்றும் அப்பார்ட்மென்ட்கள் தற்காலிக ஹோட்டல்களாக மாறியிருக்கின்றன.

2010-ல் தென் ஆப்பிரிக்க உலகக் கோப்பையில் 'வாக்கா வாக்கா’ எனப் பாடி இளைஞர்களைப் பரவசப்படுத்திய பிரபல பாப் பாடகி ஷகீரா, இந்த உலகக் கோப்பைக்கு 'லா லா லா’ என்ற புதிய ஆல்பம் மூலம் உற்சாகம் விதைத்திருக்கிறார். இவர் ஸ்பெயின் நாட்டு கால்பந்து வீரர் ஜெரார்டு பிக்-ன் மனைவியும்கூட. பிரபல கால்பந்து வீரர்கள் லயோனல் மெஸ்ஸி, நெய்மர் எல்லாரும் இந்த ஆல்பத்தில் நடித்திருக்கிறார்கள்.

போட்டியின் அதிகாரபூர்வ சின்னம் பிரேசில் நாட்டில் மட்டுமே காணப்படும் ’brazilian three banded armadilo' எனும் ஒருவகை எறும்புத்தின்னி. எதிரிகளால் ஆபத்து வரும்போது, இது தனது தலையை வளைத்து உடலை அதன் மடிப்புகள் இருக்கும் இடத்தில் அழகாக மடக்கி, ஒரு பந்து போல சுருண்டுகொள்ளும். பந்து போல் காணப்படும் இதை, உண்ண வரும் எந்த விலங்கும், அதை கல் என நினைத்து விட்டுவிட்டுப் போய்விடும். ஆபத்து விலகியதும் 'பந்து’ வடிவத்தை விலக்கி எழுந்து நடக்கும். சுருண்டிருக்கும்போது கிட்டத்தட்ட கால்பந்து போலவே இதன் வடிவம் இருக்கும். இவை அழிந்துவருவது பற்றிய விழிப்பு உணர்வையும் ஏற்படுத்த இந்த எறும்புத்தின்னியைச் சின்னமாகத் தேர்ந்தெடுத்திருக்கிறார்கள்.

உலக கோப்பை கால்பந்து போட்டியில் ஆடும் 32 நாடுகள்

உலக கோப்பை கால்பந்து போட்டியில் 32 நாடுகள் விளையாடுகின்றன. கண்டம் வாரியாக உலக கோப்பையில் ஆடும் நாடுகள்:

ஐரோப்பா (13):

ஸ்பெயின், இத்தாலி, ஜெர்மனி, பிரான்ஸ், இங்கிலாந்து, போர்ச்சுக்கல், நெதர்லாந்து, சுவிட்சர்லாந்து, பெல்ஜியம், குரோஷியா, கிரீஸ், ரஷிய, போஸ்னியா ஹெர்சகோவா.

தென்அமெரிக்கா (6):

பிரேசில், அர்ஜென்டினா, உருகுவே, சிலி, கொலம்பியா, ஈக்வடார்.

வடக்கு, மத்திய அமெரிக்கா (4).

கோஸ்டாரிகா, ஹோண்டுரஸ், மெக்சிகோ, அமெரிக்கா.

ஆப்பிரிக்கா (5):

அல்ஜீரியா, கேமரூன், கானா, நைஜீரியா, ஐவேரி கோஸ்ட்.

ஆசியா (4):

ஆஸ்திரேலியா, ஐப்பான், ஈரான், தென்கொரியா

soplangi · soplangi Wed Jun 11, 2014 2:08 pm

32 நாடுகள் பங்கேற்கும் உலக கோப்பை கால்பந்து போட்டி வரும் 12ம் தேதி (நாளை) பிரேசில் நாட்டில் தொடங்குகிறது. இந்த போட்டியை நடத்த அந்நாட்டு அரசு ரூ.84 ஆயிரம் கோடி செலவழித்து உள்ளது. வேறு எந்த உலக போட்டியிலும் இவ்வளவு தொகை செலவழிக்கப்பட்டது இல்லை. இந்தப் போட்டியின் மொத்த பரிசு தொகை ரூ.3450 கோடி என்றும் அறிவிக்கப்பட்டுள்ளது.

முதல் போட்டி நாளை தொடங்கவுள்ள நிலையில், முடக்குவாத நோயால் பாதிக்கப்பட்டு செயற்கை கால் பொருத்தியுள்ள பிரேசில் நாட்டை சேர்ந்த ஒருவர் வரலாற்று சிறப்பு மிக்க இந்த கால்பந்து போட்டியை தொடங்கி வைப்பார் என்று அறிவிக்கப்பட்டுள்ளது.

'மீண்டும் நடக்க தொடங்குங்கள்' (வாக் அகைய்ன்) என்ற திட்டத்துக்காக உலகின் தலைசிறந்த நூற்றுக்கும் மேற்பட்ட ஆராய்ச்சியாளர்கள் 'எக்ஸோ ஸ்கெலிட்டன்' என்ற செயற்கை கால்களை உருவாக்கியுள்ளனர்.

மூளையின் கட்டளைக்கேற்ப செயல்படும் வகையில் மிக நுட்பமான மெல்லிய செயற்கை தோலையும் இணைத்து இந்த மாற்றுக் கால்கள் உருவாக்கப்பட்டுள்ளன.

இவ்வகை செயற்கை கால்களை பொருத்திய ரோபோக்களின் மூலம் முடக்குவாதத்தால் பாதிக்கப்பட்டவர்களின் மூளையில் தோன்றும் உணர்வுகளின்படி இந்த அதிநவீன செயற்கை கால்கள் செயல்படுகின்றன.

இவ்வகையிலான செயற்கை கால்களை பொருத்திய பிரேசில் நாட்டை சேர்ந்த சிலருக்கு வழங்கப்பட்ட நீண்ட கால பயிற்சியின் பலனாக, மூளையின் கட்டளைக்கேற்ப செயற்கை கால்கள் துல்லியமாக செயலாற்றுவது நிரூபிக்கப்பட்டுள்ளது.

நாளை தொடங்கவிருக்கும் உலக கோப்பை கால்பந்து போட்டியை இவர்களில் ஒருவர் நாளை தொடங்கி வைக்கவுள்ளார்.

இதைப்போன்ற வரலாற்று சிறப்புமிக்க ஒரு போட்டியை முடக்குவாதத்தால் பாதிக்கப்பட்ட ஒரு நபர் முதல் பந்தை உதைத்து தொடங்கி வைப்பதன் மூலம், அறிவியலின் ஆற்றலை விளங்க வைப்பதுடன் மட்டுமின்றி, முடக்குவாதத்தால் பாதிக்கப்பட்ட பலருக்கு தன்னம்பிக்கையை விதைக்கவும் முடியும் என்று பிரேசில் அரசு நம்புகிறது.

**சிவா** · **சிவா** Thu Jun 12, 2014 12:50 am

பிரேசில் , குரோஷியாவுடன் பலப்பரீட்சை

சாவ் பாலோ: ரசிகர்கள் ஆவலுடன் எதிர்பார்த்த உலக கோப்பை கால்பந்து தொடர் இன்று துவங்குகிறது. முதல் போட்டியில் சொந்த மண்ணில் களமிறங்கும் பிரேசில் அணி, குரோஷியாவை சந்திக்கிறது.

சர்வதேச கால்பந்து கூட்டமைப்பு (‘பிபா’) சார்பில் நடத்தப்படும் உலக கோப்பை போட்டி, பிரேசிலில் இன்று துவங்குகிறது. மொத்தம் 32 அணிகள் பங்கேற்கும், இத்தொடரின் போட்டிகளில் 11 நகரங்களில் நடக்கவுள்ளன.

சர்வதேச தரவரிசையில் 3வது இடத்திலுள்ள 5 முறை உலக சாம்பியன் பிரேசில் அணி, 18வது இடத்தில் இருக்கும் குரோஷியாவை எளிதாக வீழ்த்தும் என்று எதிர்பார்க்கப்படுகிறது.

ஏனெனில், உலக கோப்பை தொடர்களில், போட்டியை நடத்தும் நாடு, துவக்க போட்டிகளில் இதுவரை தோற்றதே கிடையாது. ஐந்து முறை சாம்பியன் பட்டம் வென்ற போதும், சொந்த மண்ணில் சாதிக்கும் நோக்கத்துடன் களமிறங்கும் பிரேசில் அணிக்கு, நட்சத்திர வீரர் நெய்மர் கைகொடுப்பார் என்று தெரிகிறது.

இதுகுறித்து டேனி ஆல்வ்ஸ் கூறுகையில்,‘‘ குரோஷியாவுக்கு எதிரான முதல் போட்டி கடினமானது. இதில் வெற்றி பெறுவது மிகவும் முக்கியம். எங்களால் முடிந்தவரை சிறப்பான போராட்டத்தை வெளிப்படுத்த முயற்சிப்போம்,’’ என்றார்.

குரோஷியா எப்படி:

குரோஷிய அணியை பொறுத்தவரையில் கடந்த நவம்பர் மாதம் ஐஸ்லாண்டு அணிக்கு எதிராக ‘ரெட் கார்டு’ பெற்ற மரியோ மாண்ஜூகிச் பங்கேற்க முடியாதது சோகம் தான். இருப்பினும் கேப்டன் கொவாசிச், இவான் ராகிடிச் உள்ளிட்டோர், பிரேசிலை சமாளிப்பர் என்று நம்பலாம்.

தவிர, கடந்த 13 உலக கோப்பை போட்டிகளில் இந்த அணி, மொத்தம் 11 கோல்கள் தான் எதிரணியை அடிக்கவிட்டுள்ளது. இது பிரேசிலிடம் எடுபடுமா என இன்று பார்க்கலாம்.

துவக்க விழாவில் ஜெனிபர்

உலகக் கோப்பை துவக்கவிழா சாவ் பாலோ நகரில் இன்று நடக்கிறது. 25 நிமிடங்கள் நடக்கும் இவ்விழாவில் 600 கலைஞர்கள் திறமை வெளிப்படுத்த காத்திருக்கின்றனர். இவர்கள் அந்தரத்தில் பறப்பது, ஜிம்னாஸ்டிக்ஸ், பாரம்பரிய நடனம், பிரேசில் டிரம்ஸ் இசை உள்ளிட்ட பல திறமைகளை வெளிப்படுத்த உள்ளனர்.

இந்திய நேரப்படி இரவு 11.45 மணி என்றாலும், பிரேசில் நேரப்படி மதியம் 3.15 மணி என்பதால், வாணவேடிக்கை, ‘லேசர் ஷோ’ போன்றவை இருக்காது என்று எதிர்பார்க்கப்படுகிறது.

தவிர, அமெரிக்காவின் பிரபல பாடகி ஜெனிபர் லோபஸ், பாடகர் பிட்புல் மற்றும் பிரேசில் பாப் பாடகி கிளாடியா லெய்ட்டே இணைந்து, ‘ வி ஆர் ஒன்...’ எனத் துவங்கும் ‘பிபா’ தொடரின் அதிகாரப் பூர்வ பாடலை பாடவுள்ளனர்.

இதன் உச்சபட்சமாக, பக்கவாதத்தால் பாதிக்கப்பட்ட ஒருவர், ரோபோ போன்று இரும்பு உடை அணிந்து, பந்தை உதைத்து போட்டியை துவக்கி வைக்கிறார்.

வெற்றி உறுதி

கடந்த 1950ல் சொந்தமண்ணில் நடந்த முதல் உலக கோப்பை தொடரில் பிரேசில் அணி, தனது முதல் போட்டியில் மெக்சிகோவை 4–0 என, வீழ்த்தியது.

* 1998ல் நார்வே அணிக்கு எதிரான லீக் போட்டியில் 1–2 என, தோற்றது பிரேசில். இதன் பின் பங்கேற்ற உலக கோப்பை தொடர்களில், 9 லீக் போட்டிகளில், 8ல் வென்றது. ஒரு போட்டி ‘டிரா’ ஆனது.

யார் ஆதிக்கம்

பிரேசில், குரோஷிய அணிகள் 2006 உலக கோப்பை தொடரில் லீக் போட்டியில் மோதின. இதில் 1–0 என, பிரேசில் வென்றது.

* 2005ல் இரு அணிகள் மோதிய ‘நட்பு’ போட்டி 1–1 என்ற கணக்கில் ‘டிரா’ ஆனது.

**சிவா** · **சிவா** Thu Jun 12, 2014 1:09 am

இன்று FIFA 2014 உலகக் கோப்பை துவக்கவிழா!

உலகக் கோப்பை கால்பந்து போட்டி 2014 - Page 5 10405306_686536004752833_7075821599511215981_n

**சிவா** · **சிவா** Thu Jun 12, 2014 6:57 pm

முதல் ஆட்டத்தில் பிரேசில்-குரேஷியா மோதல்

சாவோ பாவ்லோவில் இன்று நடைபெறும் முதல் ஆட்டத்தில் பிரேசிலும், குரேஷியாவும் மோதுகின்றன.

சொந்த ஊர் ரசிகர்கள் முன்னிலையில் களமிறங்கும் பிரேசில் அணி, குரேஷியாவை வீழ்த்தி வெற்றியோடு போட்டியை தொடங்குவதில் தீவிரமாக உள்ளது. சர்வதேச தரவரிசையில் 18-வது இடத்தில் இருக்கும் குரேஷியா, சர்வதேச தரவரிசையில் 3-வது இடத்தில் இருக்கும் பிரேசிலுடன் கடுமையாகப் போராட வேண்டியிருக்கும்.

பிரேசில் அணி எவ்வித சிரமமுமின்றி எளிதாக வெற்றி கண்டு காலிறுதிக்கு முந்தைய சுற்றுக்கு முன்னேறும் என எதிர்பார்க்கப் படுகிறது. பிரேசில் அணிக்கு முன்கள வீரர்கள் நெய்மர், பிரெட், மிட்பீல்டர்கள் ஆஸ்கர், வில்லியன், கேப்டன் தியாகோ சில்வா ஆகியோர் மிகப்பெரிய பலமாகத் திகழ் கின்றனர். குரேஷிய அணியைப் பொறுத்த வரையில் லூகா மோட்ரிக், இவான் மோசினிச் உள்ளிட்டோர் பலம் சேர்க்கின்றனர்.

போட்டி நேரம்: அதிகாலை 1.30

நேரடி ஒளிபரப்பு: சோனி சிக்ஸ்

**சிவா** · **சிவா** Thu Jun 12, 2014 6:58 pm

சாதனையை நோக்கி மிராஸ்லாவ் க்ளோஸ்

ஜெர்மனியின் ஸ்டிரைக்கர் மிரோஸ்லாவ் க்ளோஸ் இதுவரை 2002, 2006, 2010 ஆகிய 3 உலகக் கோப்பை போட்டிகளில் விளையாடி 14 கோல்களை அடித்துள்ளார். உலகக் கோப்பை வரலாற்றில் அதிக கோல் அடித்தவர்கள் வரிசையில் பிரேசிலின் ரொனால்டோவுக்கு (15 கோல்கள்) அடுத்தபடியாக 2-வது இடத்தில் மிராோஸ்லாவ் க்ளோஸ், இந்த உலகக் கோப்பையோடு விடைபெறவுள்ளார். கடைசி உலகக் கோப்பையில் விளையாடும் 36 வயது க்ளோஸ் இரு கோல்களை அடித்து ரொனால்டோவின் சாதனையை முறியடிப்பார் என எதிர்பார்க்கப்படுகிறது.

**சிவா** · **சிவா** Thu Jun 12, 2014 6:59 pm

ரூ.3,400 கோடி பரிசுத் தொகை

உலகக் கோப்பை போட்டிக்கான மொத்த பரிசுத் தொகை ரூ.3,400 கோடியாகும். சாம்பியனாகும் அணிக்கு ரூ.207 கோடியும், 2-வது இடத்தைப் பிடிக்கும் அணிக்கு ரூ.148 கோடியும் ரொக்கப் பரிசாக வழங்கப்படவுள்ளன.

**சிவா** · **சிவா** Thu Jun 12, 2014 6:59 pm

பிரேசிலின் கனவு நனவாகுமா?

பிரேசில் இதுவரை 5 முறை உலகக் கோப்பையை வென்றுவிட்டாலும், சொந்த மண்ணில் நடைபெற்ற போட்டியில் உலக சாம்பியன் ஆனதில்லை. இதற்கு முன்னர் 1950-ல் உலகக் கோப்பை போட்டியை நடத்திய பிரேசில், அதில் இறுதிச்சுற்று வரை முன்னேறி உருகுவேயிடம் தோல்வி கண்டது. எனவே சொந்த மண்ணில் உலகக் கோப்பையை வெல்லாத குறையை இந்த முறை தீர்த்துவிட வேண்டும் என்பதில் பிரேசில் அணி தீவிரமாக உள்ளது.

**சிவா** · **சிவா** Thu Jun 12, 2014 7:00 pm

சென்னையில் மாதிரி உலகக் கோப்பை

உலகக் கோப்பை கால்பந்து போட்டியை முன்னிட்டு அதேபோன்று மாதிரி உலகக் கோப்பை போட்டி சென்னை பச்சையப்பன் கல்லூரி மைதானத்தில் இன்று நடைபெறுகிறது.

பச்சையப்பாஸ் ஹாரிங்டன் கால்பந்து அகாடமி மற்றும் சென்னை கால்பந்து வீரர்கள் மற்றும் ரசிகர்கள் நலச்சங்கம் சார்பில் நடைபெறும் இந்த போட்டியில் உலகக் கோப்பை போட்டியின் சின்னத்தைக் குறிக்கும் வகையிலான 15 கிலோ எடை கொண்ட கேக் வெட்டப்படுகிறது. அதைத்தொடர்ந்து பிரேசில்-குரேஷியா என பெயர் சூட்டப்பட்ட இரு அணிகளுக்கு இடையே போட்டி நடைபெறுகிறது. பிரேசில் அணிக்காக பச்சையப்பாஸ் அகாடமி வீரர்கள் ஆடுகின்றனர். இந்த அணிக்கு நடிகர் ஆர்யா கேப்டனாக உள்ளார். குரேஷிய அணிக்காக ஊடக அணியினர் ஆடுகிறார்கள். இதுதவிர உலகக் கோப்பையைக் குறிக்கும் வகையில் 4 அஞ்சல் தலைகள் வெளியிடப்படுவதோடு, பல்வேறு விளையாட்டுகளைச் சேர்ந்த முன்னாள் வீரர்களும் கௌரவிக்கப்படுகிறார்கள்.

**சிவா** · **சிவா** Thu Jun 12, 2014 7:00 pm

இதுவரை சாம்பியன்கள்:

1930: உருகுவே

1934: இத்தாலி

1938: இத்தாலி

1950: உருகுவே

1954: மேற்கு ஜெர்மனி

1958: பிரேசில்

1962: பிரேசில்

1966: இங்கிலாந்து

1970: பிரேசில்

1974: மேற்கு ஜெர்மனி

1978: அர்ஜென்டீனா

1982: இத்தாலி

1986: அர்ஜென்டீனா

1990: மேற்கு ஜெர்மனி

1994: பிரேசில்

1998: பிரான்ஸ்

2002: பிரேசில்

2006: இத்தாலி

2010: பிரேசில்

**சிவா** · **சிவா** Fri Jun 13, 2014 12:15 am

கோலாகலமாகத் துவங்கிவிட்டது உலகக்கோப்பை!

இன்னும் ஒரு மணி நேரத்தில் முதல் ஆட்டம் ஆரம்பம்!

Sponsored content · Sponsored content

உலகக் கோப்பை கால்பந்து போட்டி 2014

உலகக் கோப்பை கால்பந்து போட்டி 2014

பிரேசில் கால்பந்து போட்டியை தொடங்கி வைக்கும் முடக்குவாத நோயாளி

Re: உலகக் கோப்பை கால்பந்து போட்டி 2014

Re: உலகக் கோப்பை கால்பந்து போட்டி 2014

Re: உலகக் கோப்பை கால்பந்து போட்டி 2014

Re: உலகக் கோப்பை கால்பந்து போட்டி 2014

Re: உலகக் கோப்பை கால்பந்து போட்டி 2014

Re: உலகக் கோப்பை கால்பந்து போட்டி 2014

Re: உலகக் கோப்பை கால்பந்து போட்டி 2014

Re: உலகக் கோப்பை கால்பந்து போட்டி 2014

Re: உலகக் கோப்பை கால்பந்து போட்டி 2014

Re: உலகக் கோப்பை கால்பந்து போட்டி 2014

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக