அமித் ஷா அடுத்தமாதம் தமிழகம் வருகை

By DIN | Published on : 13th June 2018 01:44 AM | அ+அ அ- |
tamilesaisow

பாஜக தேசியத் தலைவர் அமித் ஷா வரும் ஜூலை முதல்
வாரத்தில் தமிழகம் வருகை தர உள்ளதாக தில்லியில்
அக்கட்சியின் தமிழகப் பிரிவுத் தலைவர்
தமிழிசை சௌந்தரராஜன் தெரிவித்தார்.

தில்லிக்கு திங்கள்கிழமை வந்த தமிழிசை சௌந்தரராஜன்,
பாஜக தலைமை அலுவலகத்திற்குச் சென்று கட்சியின்
உயர்நிலைத் தலைவர்களைச் சந்தித்துப் பேசினார்.
இதைத் தொடர்ந்து, செய்தியாளர்களிடம் செவ்வாய்க்கிழமை
அவர் கூறியதாவது:

அடுத்த மாதம் (ஜூலை) முதல் வாரத்தில் பாஜக தேசியத்
தலைவர் அமித் ஷா தமிழகம் வர உள்ளார். அவரது வருகை
ஜூலை 9-ஆம் தேதி இருக்கும் என்று அதிகாரப்பூர்வற்ற
முடிவு எடுக்கப்பட்டுள்ளது.

அவர் வருகை முற்றிலும் கட்சியின் அமைப்பு ரீதியிலானது.
அரசியல் ரீதியிலானதாக இருக்காது. தொண்டர்கள்,
நிர்வாகிகள், நாடாளுமன்றத் தொகுதி பொறுப்பாளர்கள்
ஆகியோரை அவர் சந்தித்துப் பேச உள்ளார்.

மேலும், அந்தமான், புதுச்சேரி யூனியன் பிரதேச
நாடாளுமன்றத் தொகுதி பொறுப்பாளர்களும் அமித்ஷாவுடன்
கலந்துரையாட உள்ளனர்.

தமிழகத்தில் மக்களவைத் தேர்தலை எதிர்கொள்வதும்,
கட்சியை வாக்குச்சாவடி அளவில் பலப்படுத்துவதும்தான்
அவரது வருகையின் நோக்கமாகும்.

வாக்குச்சாவடி அளவில் நடைபெறும் கட்சிப் பணியைப்
பார்ப்பதில் அமித் ஷா எப்போதும் விரும்புவது உண்டு.
இதனால், வாக்குச் சாவடி மைய அளவில் நடைபெறும்
பணியை அவர் பார்வையிட்டு ஆய்வு செய்வார் என்றார்
தமிழிசை சௌந்தரராஜன்.

அமித் ஷா தமிழக வருகை ஏன்?:

கர்நாடக மாநிலத்தில் அண்மையில் நடைபெற்ற சட்டப்
பேரவைத் தேர்தலில் மொத்தமுள்ள 223 தொகுதிகளில்
104 இடங்களைப் பெற்று தனிப் பெரும் கட்சியாக பாஜக
உருவெடுத்தது. ஆனால், பேரவையில் அறுதிப் பெரும்
பான்மை பலம் இல்லாததால், காங்கிரஸ் - மஜத கூட்டணி
ஆட்சி அமைத்தது.

பாஜகவுக்கு அதிக இடங்கள் கிடைத்தது.
இது தென் இந்தியாவில் நுழைவதற்கான புதிய தெம்பை
பாஜகவுக்கு அளிப்பதாக அமைந்தது.

இந்நிலையில், அடுத்த ஆண்டு மக்களவைத் தேர்தல் நடை
பெற உள்ளதால் தமிழகத்தில் புதிய கூட்டணியை உருவாக்கி
பெரிய வெற்றியைப் பெற பாஜக தலைமை திட்டமிட்டு
வருகிறது. இதைத் தொடர்ந்து, மக்களவைத் தேர்தலில்
வெற்றி பெறுவதற்கான வியூகம் அமைக்கும் வகையில்
அக்கட்சியின் தேசியத் தலைவர் அமித் ஷாவின் தமிழக
வருகை இருக்கும் என அரசியல் நோக்கர்கள் கருதுகின்றனர்.
-
-----------------------
தினமணி