குணச்செல்வம் - - எஸ்.கண்ணன்

தினேஷ் ஏழ்மையான குடும்பத்தில் பிறந்தவன். அவனுடன் படிக்கும் விவேகன் பணக்கார குடும்பத்தைச் சேர்ந்தவன்.

அழகாபுரி என்ற கிராமத்தில் விவேகனின் தந்தை தான் பெரும் பணக்காரர். தினேஷ், விவேகன் வீட்டின் வழியே பள்ளிக்குச் செல்லும் போது, நாமும் சம்பாதித்து இதுபோல பணக்காரர் ஆகவேண்டும் என்று நினைத்துக் கொண்டான்.

விவேகன் பணக்காரன் என்ற கர்வம் இல்லாமல் பழகுவான். தன்னுடன் படிக்கும் மாணவர்களுக்கு உதவிகளைச் செய்வான். அதனால், அவனைச் சுற்றிலும் எப்போதும் மாணவர்கள் கூட்டம் இருக்கும்.

"இவங்க அப்பா, பணக்காரர் என்பதால், ஊருல மதிக்கிறாங்க. அதனால் தான், மகனையும், பசங்க சுற்றி சுற்றி வர்றாங்க'' என்ற பொறாமை யால் தினேஷ் புலம்புவான்.

விவேகன் எழுத்து அழகாக இருப்பதால், அவன் முதல் மதிப்பெண் எடுப்பான். தினேஷ் இரண்டாவது ரேங்க் தான் வருவான்.

முழு ஆண்டுத் தேர்விற்கு இன்னும் 11/2 மாதங்களே இருந்தன. தினேஷுக்கு உடல்நிலை சரியில்லாமல் போனது. 15 நாட்கள் பள்ளிக்குச் செல்லவில்லை.

குணமானதும், பள்ளிக்குச் சென்றான். எல்லா பாடங்களும் புதியதாக இருந்தன. பாடங்கள் எதுவும் புரியவில்லை. இதைப் புரிந்து கொண்ட விவேகன், "என் வீட்டுக்கு வாடா, எனக்கு தனி ரூம் உண்டு. எந்த தொந்தரவும் இல்லாமல் படிக்கலாம். சந்தேகம் ஏதாவது இருந்தால், நான் சொல்லிக் கொடுக்கறேன்டா'' என்றான்.

தினேஷ் மறுநாள் வேண்டா வெறுப்பாக விவேகன் வீட்டிற்குச் சென்றான்.

தன் மகனுடன் வரும் மாணவனைப் பற்றி விசாரித்தார், விவேகனின் அப்பா சிதம்பரம்.

அவன் தினேஷ் என்று தெரிந்ததும், "உன்னைப் பற்றி விவேகன் நிறைய சொல்லிருக்கான். ஏதாவது, உதவி வேணும்னா சொல்லுப்பா. கண்டிப்பா செய்றேன். அப்புறமா, இப்ப கம்ப்ïட்டர் படிச்சா தான் எதிர்காலம் நல்லா இருக்கும். என் பையனோட, சேர்ந்து பத்து பேரை படிக்க வைக்கலாம்னு இருக்கேன். நீ நல்லா படிக்கிற பையன், நீயும் படிப்பா'' என்றார்.

"சரிங்க'' என்றான், தினேஷ்.

`இவர்கள் மதிப்பு, மரியாதையுடன் நிம்மதியாக வாழ பொருட்செல்வம் தான் காரணம் என்று நினைத்தேன். அதுமட்டுமல்ல, குணச்செல்வமும் தான் காரணம்' என்று உணர்ந்து கொண்டான், தினேஷ்.

அன்று முதல் இவர்களைப் போல, இரண்டு செல்வத்தையும் சேர்த்து நிம்மதியான வாழ்க்கை வாழ வேண்டும் என்றும், பொறாமையின்றி வாழ வேண்டும் என்றும் முடிவு செய்தான், தினேஷ்.