சாம்பார் வெங்காயம் கிலோ ரூ. 110 :(

விளைநிலங்களிலிருந்து வெங்காயத்தை சந்தைக்குக் கொண்டு வராமல், இடைத்தரகர்கள் பதுக்கி வைத்திருப்பதால் சாம்பார் வெங்காயம் என்று அழைக்கப்படும் சின்ன வெங்காயம் சில்லறை விற்பனைக் கடைகளில் கிலோ ரூ. 110 வரை விற்கப்படுகிறது.

கடந்த சில வாரங்களுக்கு முன்பு சின்ன வெங்காயம் கிலோ ரூ.45-க்கு விற்பனை செய்யப்பட்டது. ஆனால் தற்போது சில்லறை விலைக் கடைகளில் ஒரு கிலோ ரூ.100 முதல் ரூ.110 வரை விற்கப்படுகிறது. இந்த திடீர் விலை உயர்வுக்கு காரணம் சில இடைத்தரகர்கள்தான் என்று சிறு வியாபாரிகள் புகார் தெரிவிக்கின்றனர்.

சென்னை மற்றும் புறநகர்ப் பகுதிகளின் பிரதான சந்தையாக விளங்கும் கோயம்பேடு மார்க்கெட்டுக்கு தாராபுரம், உடுமலை, பல்லடம், திருப்பூர், வத்தலகுண்டு, பெரம்பலூர் உள்ளிட்ட இடங்களிலிருந்து சின்ன வெங்காயம் வருகிறது.

செயற்கைத் தட்டுப்பாடு: நாளொன்றுக்கு சுமார் 10 லாரிகளில் 1500 டன் சின்ன வெங்காயம் கோயம்பேடுக்கு வருவது வழக்கம். ஆனால் கடந்த சில வாரங்களாக வெங்காயத்தின் வரத்து 750 டன்னாக குறைந்துள்ளதாக வியாபாரிகள் கூறுகின்றனர்.

இடைத்தரகர்கள் வெங்காயத்துக்கு செயற்கையாக தட்டுப்பாட்டை ஏற்படுத்துவதே இதற்கு காரணம் என்று வியாபாரிகள் குற்றம் சாட்டுகின்றனர். வெங்காய விலையில் ஏற்பட்டுள்ள திடீர் உயர்வு குறித்து கோயம்பேடு வியாபாரி ஒருவர் கூறியது:

இந்த ஆண்டு மழை குறைந்ததால் வெங்காய விளைச்சல் கடுமையாக பாதிக்கப்பட்டது. இதனால் சந்தையில் சின்ன வெங்காயத்தின் விலை சற்று உயர்ந்தது. ஆனால்

பெரம்பலுர், ஒட்டன்சத்திரம் மற்றும் அதை சுற்றியுள்ள இடங்களைச் சேர்ந்த சில இடைத்தரகர்கள் இதைப் பயன்படுத்திக் கொண்டு, விளைநிலங்களிலிருந்து பெறப்படும் வெங்காயத்தை அவர்களது குடோனில் பதுக்கி வைத்துள்ளனர்.

இடைத்தரகர்கள் வெங்காயத்துக்கு செயற்கையாக தட்டுப்பாட்டை ஏற்படுத்தி வருவதால், அதன் விலை கடுமையாக உயர்ந்து வருகிறது. சின்ன வெங்காயத்தை ஈரம் படாமல் வைத்தால் 2 மாதங்கள் வரை கெட்டுப் போகாது.

விவசாயிகளிடம் குறைந்த விலைக்கு வெங்காயத்தை வாங்கி குடோனில் பதுக்கி வைத்துள்ளனர். இதன் மூலம் அவர்களுக்கு கிடைக்கும் லாபம் பல மடங்கு அதிகம் என்றார் அவர்.

காய்கறி விலையும் உயர்வு: விளைச்சல் மற்றும் வரத்து குறைந்ததால் சில காய்கறிகளின் விலைகளும் உயர்ந்துள்ளன. தக்காளி, புடலங்காய், பாகற்காய், சேனைக்கிழங்கு உள்ளிட்ட காய்கறிகளின் விலை இரு மடங்காக உயர்ந்துள்ளன.

கோயம்பேடு மார்க்கெட் விலை நிலவரம் (கிலோவுக்கு)

(அடைப்புக்குறிக்குள் பழைய விலை):

தக்காளி - 50 (30)

புடலங்காய் - 30 (15)

சேனைக்கிழங்கு - 25 (15)

பாகற்காய் - 30 (20)

சின்ன வெங்காயம் - 80 (45)

பெரிய வெங்காயம் - 18 (18)

கத்தரிக்காய் - 18 (20)

வெண்டைக்காய் - 22 (18)

வாழைக்காய் - 8 (5)

கொத்தவரங்காய் - 22 (18)

அவரைக்காய் - 35 (30)

உருளைக்கிழங்கு - 18 (18)

முருங்கைக்காய் - 25 (25)

சில்லறை விற்பனைக் கடைகளில் மேற்கூறிய விலையைக் காட்டிலும் ரூ.10 முதல் ரூ.20 வரைக் கூடுதலாக விற்பனை செய்யப்படுகிறது.

நன்றி : தினமணி

கொஞ்ச நாள் வெங்காயத்தை மறந்துட வேண்டியது தான் அப்பத்தான் விலை குறையும்