ஆஸ்திரேலியாவுக்கு எதிரான 2-வது டெஸ்ட்: இந்தியா இன்னிங்ஸ் வெற்றி

ஐதராபாத், மார்ச். 5-

இந்தியா- ஆஸ்திரேலியா அணிகள் மோதும் 2-வது டெஸ்ட் கிரிக்கெட் போட்டி ஐதராபாத்தில் நடைபெற்று வருகிறது. ஆஸ்திரேலியா முதல் இன்னிங்சில் 237 ரன்னில் சுருண்டது.

இந்தியா முதல் இன்னிங்சில் 503 ரன் குவித்தது. புஜாரா இரட்டை சதமும் (204 ரன்), முரளிவிஜய் சதமும் (167) அடித்தனர். மேக்ஸ்வெல் 4 விக்கெட்டும், டோகர்ட்டி 3 விக்கெட்டும் கைப்பற்றினார்கள்.



266 ரன்கள் பின் தங்கிய நிலையில் 2-வது இன்னிங்சை விளையாடிய ஆஸ்திரேலியா நேற்றைய 3-வது நாள் ஆட்டநேர முடிவில் 2 விக்கெட் இழப்புக்கு 74 ரன் எடுத்து இருந்தது. எட்கோவன் 26 ரன்னுடனும், வாட்சன் 9 ரன்னுடனும் ஆட்டம் இழக்காமல் உள்ளனர்.

இன்று (செவ்வாய்க்கிழமை) 4-வது நாள் ஆட்டம் நடந்தது. இன்னிங்ஸ் தோல்வியை தவிர்க்க மேலும் 192 ரன் தேவை. கைவசம் 8 விக்கெட் என்ற நிலையில் ஆஸ்திரேலியா தொடர்ந்து ஆடியது. வாட்சன் 9 ரன்னில் இஷாந்த்சர்மா பந்தில் ஆட்டம் இழந்தார். அடுத்து வந்த ஆஸ்திரேலிய அணியின் கேப்டன் கிளார்க் 16 ரன்னில் பெவிலியன் திரும்பினார். அவரது விக்கெட்டை ஜடேஜா கைப்பற்றினார். 108 ரன்னில் அந்த அணி 4 விக்கெட்டை இழந்து பரிதவித்தது.

இதையடுத்து களமிறங்கிய ஆஸ்திரேலியா வீரர்கள் அடுத்தடுத்து ஆட்டமிழக்க, 131 ரன்கள் எடுத்த நிலையில் அந்த அணி அனைத்து விக்கெட்டுகளையும் இழந்தது. இதனால் இந்திய அணி 135 ரன்கள் மற்றும் ஒரு இன்னிங்ஸ் வித்தியாசத்தில் வெற்றி பெற்றது. இந்திய அணி தரப்பில் தமிழக வீரர் அஸ்வின் 5 விக்கெட்டுகளையும், ஜடேஜா 3 விக்கெட்டுகளையும், இஷாந்த் சர்மா 1 விக்கெட்டும் கைப்பற்றினர். ஹர்பஜன் சிங் ஒரு விக்கெட் கூட எடுக்கவில்லை.

இந்த வெற்றியின் மூலம் 4 டெஸ்ட்டுகள் கொண்ட இந்த தொடரில் இந்தியா 2-0 என்ற கணக்கில் முன்னிலை பெற்றுள்ளது.

-மாலை மலர்