ஹெல்த் இன்ஸ்பெக்டருக்கு சரமாரி அடி, உதை செக்ஸ் டார்ச்சரால் பெண் ஊழியர் விஷம் குடித்தார்

பெரம்பூரில் உள்ள ரயில்வே மருத்துவமனையில் துப்புரவு தொழிலாளியாக பணியாற்றுபவர் அலமேலு (40). இவருக்கு மருத்துவமனை யில் பணியாற்றும் ஹெல்த் இன்ஸ்பெக்டர் நாகராஜ் (45) செக்ஸ் டார்ச்சர் கொடுத்து வந்ததாக கூறப்படுகிறது. இந்நிலையில், அலமேலு நேற்று காலை வேலைக்கு வந்தார். அப்போது அவரை ஹெல்த் இன்ஸ்பெக்டர் அழைத்துள்ளார். அவரது அறை க்கு சென்ற அலமேலு, சிறிது நேரம் கழித்து கண்கலங்கியபடி வெளியே வந்தார்.

திடீரென மருத்துவமனையில் இருந்த எலி மருந்தை எடுத்து குடித்துவிட்டார். இதைப் பார்த்து அதிர்ச்சியடைந்த சக ஊழியர்கள் ஓடிவந்து, அலமேலுவை அந்த மருத்துவமனையிலேயே சேர்த்தனர். அங்கு அவருக்கு தீவிர சிகிச்சை அளிக்கப்பட்டு வருகிறது. ஹெல்த் இன்ஸ்பெக்டர் கொடுத்த செக்ஸ் டார்ச்சரால்தான் அலமேலு விஷம் குடித்ததாக தகவல் பரவியது. இதையடுத்து ரயில்வே ஊழியர்கள் மருத்துவமனைக்கு திரண்டு வந்தனர்.

அறையில் இருந்த நாகராஜை சுற்றிவளைத்து சரமாரியாக அடித்து உதைத்தனர். அடி தாங்க முடியாமல் கதறிய அவர், அங்கிருந்து தப்பி வெளியே ஓடிவந்தார். அப்போதும் விடாத ஊழியர்கள், மருத்துவமனைக்குள்ளேயே அவரை ஓட ஓட விரட்டி சரமாரியாக தாக்கினர். மருத்துவமனைக்கு வந்திருந்த நோயாளிகளும், அவர்களின் உறவினர்களும் இந்த சம்பவத்தை பார்த்து அதிர்ச்சியடைந்தனர். ஊழியர்கள் தாக்கியதில் நாகராஜின் முகம், கை, கால்களில் பலத்த காயம் ஏற்பட்டது. இதையடுத்து அவரும் அதே மருத்துவமனையில் சேர்க்கப்பட்டு சிகிச்சை பெற்றார்.

நாகராஜ் மீது பெரம்பூர் மருத்துவமனை மருத்துவ இயக்குநரிடம் அலமேலு புகார் கொடுத்துள்ளார். அந்த புகாரில், ஹெல்த் இன்ஸ்பெக்டர் நாகராஜ், எனக்கு தொடர்ந்து செக்ஸ் டார்ச்சர் கொடுத்தார். இதற்கு நான் எதிர்ப்பு தெரிவித்தேன். இதனால் என்னை திட்டி, கடுமையாக வேலை வாங்கினார் என தெரிவித்துள்ளார்.

இந்த புகாரின் அடிப்படையில், இந்திய ஜனநாயக மாதர் சங்கம், பல்வேறு சங்கங்களை சேர்ந்த ரயில்வே ஊழியர்கள் மருத்துவமனை முன்பும், மருத்துவமனை இயக்குநர் அலுவலகம் முன்பும் ஆர்ப்பாட்டத்தில் ஈடுபட்டனர். அப்போது நாகராஜை கைது செய்ய வலியுறுத்தினர். பின்னர், மருத்துவ இயக்குநர் பிரசன்ன குமார், நாகராஜை தற்காலிக பணி நீக்கம் செய்துள்ளதாக அறிவித்துள்ளார். அதனை தொடர்ந்து ஊழியர்கள் கலைந்து சென்றனர்.

மாலை வரை தொடர்ந்த இந்த போராட்டம் முடிவுக்கு வந்தது. பின்னர் நாகராஜ், ஐசிஎப் போலீசில் தன்னை தாக்கியவர்கள் மீது நடவடிக்கை எடுக்கும்படி புகார் கொடுத்து விட்டு, அடையாறில் உள்ள தனியார் மருத்துவமனையில் சிகிச்சைக்காக சேர்ந்துள்ளார். அலமேலு, தொடர்ந்து சிகிச்சை பெற்று வருகிறார். புகாரின் அடிப்படையில், ஐசிஎப் போலீசார் வழக்குப்பதிவு செய்து விசாரிக்கின்றனர்.

தினகரன்