ஹாக்கியில் இங்கிலாந்தை வீழ்த்தியது இந்தியா

மெல்போர்ன்: இங்கிலாந்து அணிக்கு எதிரான சாம்பியன்ஸ் டிராபி ஹாக்கி தொடர் லீக் போட்டியில், இந்திய அணி 3-1 என்ற கணக்கில் அசத்தல் வெற்றி பெற்றது.

ஆஸ்திரேலியாவின் மெல்போர்ன் நகரில், ஆண்களுக்கான 34வது சாம்பியன்ஸ் டிராபி ஹாக்கி தொடர் நேற்று துவங்கியது. "நடப்பு சாம்பியன்' ஆஸ்திரேலியா, "ஒலிம்பிக் சாம்பியன்' ஜெர்மனி உள்ளிட்ட 8 அணிகள் பங்கேற்கின்றன. இந்த அணிகள் இரு பிரிவுகளாக பிரிக்கப்பட்டு, போட்டிகள் லீக் முறையில் நடக்கின்றன.

"ஏ' பிரிவில் இடம் பெற்ற இந்திய அணி, முதல் லீக் போட்டியில், இங்கிலாந்தை சந்தித்தது. 14வது நிமிடத்தில் இங்கிலாந்து அணிக்கு கிடைத்த "பெனால்டி கார்னர்' வாய்ப்பை, ரிச்சர்டு ஸ்மித் கோலாக மாற்றினார். 22 வது நிமிடத்தில் இந்திய அணியின் தானிஷ் முஸ்தபா, ஒரு பீல்டு கோல் அடிக்க, முதல் பாதியில் ஸ்கோர் 1-1 என, சமமாக இருந்தது.

இந்தியா அசத்தல்:

இரண்டாவது பாதி துவங்கியதும் இந்திய அணி ஆதிக்கம் செலுத்த துவங்கியது. 38வது நிமிடத்தில் ஒலிம்பிக் போட்டியில் வாய்ப்பு பெறாத, இளம் இந்திய வீரர் யுவராஜ் வால்மீகி, ஒரு கோல் அடிக்க, 2-1 என முன்னிலை பெற்றது.

தொடர்ந்து, 66வது நிமிடத்தில் இந்திய அணிக்கு "பெனால்டி கார்னர்' வாய்ப்பு கிடைத்தது. இதை அப்படியே கோலாக மாற்றினார் குர்விந்தர் சிங் சாண்டி. இதற்கு இங்கிலாந்து அணியால் பதிலடி கொடுக்க முடியவில்லை. முடிவில், இந்திய அணி 3-1 என்ற கோல் கணக்கில் வெற்றி பெற்றது.

ஒலிம்பிக்கில் அனைத்து போட்டிகளிலும் தோற்று, கடைசி இடம் பெற்ற இந்திய அணி, சாம்பியன்ஸ் டிராபி தொடரை வெற்றிகரமாக துவக்கியது ரசிகர்களுக்கு ஆறுதல் தந்துள்ளது.

நேற்று நடந்த பிற லீக் போட்டிகளில் ஆஸ்திரேலியா, 4-2 என, பெல்ஜியத்தையும், ஜெர்மனி 3-2 என்ற கோல் கணக்கில் நியூசிலாந்தையும் வென்றன. நெதர்லாந்திடம், பாகிஸ்தான் (1-3) வீழ்ந்தது.

இன்று இந்திய அணி, இரண்டாவது லீக் போட்டியில் நியூசிலாந்தை சந்திக்கிறது.

தினமலர்

வெற்றி பயணம் தொடரட்டும் - வாழ்த்துகள்.

மிக்க மகிழ்ச்சி.

இந்திய அணிக்கு என் வாழ்த்துக்கள்.

இந்திய அணி கோப்பையை வெல்ல எனது மனமார்ந்த வாழ்த்துக்கள்