சிறப்பு முகாம்களில் வைக்கப்பட்டுள்ள ஈழத்தமிழர்களை விடுவிக்ககாவிட்டால் மீண்டும் போராட்டத்தில் ஈடுபடுவோம் நாம் தமிழர் கட்சி சீமான் அறிவிப்பு

அச்சலா · அச்சலா Fri Nov 30, 2012 1:58 pm

நாம் தமிழர் கட்சி தலைமை ஒருங்கிணைப்பாளர் சீமான் வெளியிட்டுள்ள அறிக்கையில் கூறியிருப்பதாவது:– பூந்தமல்லி, செங்கல்பட்டு சிறப்பு முகாம்களில் சட்டத்திற்குப் புறம்பாகவும், மனிதாபிமானவற்ற வகையிலும் தடுத்து வைக்கப்பட்டுள்ள ஈழத் தமிழர்கள், தனிமைச் சிறையில் வாட்டும் தங்களை சாதாரண முகாம்களுக்கு மாற்றுங்கள் என்ற கோரிக்கையுடன் பலமுறை பட்டிணிப் போராட்டங்கள் நடத்தியுள்ளனர்.

இப்போது பூந்தமல்லி சிறப்பு முகாமில் அடைத்து வைக்கப்பட்டுள்ள 7 ஈழத் தமிழர்களில் பரமேஸ்வரன், தர்ஷன், பிரதீபன் ஆகிய மூன்று பேரும் கடந்த 23–ம் தேதியிலிருந்து ஒருவர் பின் ஒருவராக பட்டிணிப் போராட்டத்தில் ஈடுபட்டு வருகின்றனர். அவர்களின் நியாயமான கோரிக்கையை ஏற்று, விடுதலை செய்யாமல், அவர்கள் மீது தற்கொலைக்கு முயன்றார்கள் என்று கியூ பிரிவு காவல் துறை வழக்கு பதிவு செய்து, புழல் சிறையில் அடைத்துள்ளது. இது உண்மைக்கும், நியாயத்திற்கும் எதிரான அடக்குமுறை நடவடிக்கையாகும்.

ஈழத் தமிழர்களுக்கு நிலையான வீடுகளை கட்டித் தர ரூ.25 கோடியை மனிதாபிமானத்துடன் ஒதுக்கியுள்ள முதல்–அமைச்சர், கியூ பிரிவினரின் இப்படிப்பட்ட மனிதாபிமானமற்ற நடவடிக்கைகளுக்கு முற்றுப்புள்ளி வைக்க வேண்டும். சிறப்பு முகாம்களில் தடுத்து வைக்கப்பட்டுள்ள ஈழத் தமிழர்கள் அனைவரையும் உடனடியாக விடுவிக்க முன்வர வேண்டும். இதனை செய்யத் தவறினால், நாம் தமிழர் கட்சி மீண்டும் போராட்டதில் ஈடுபடும். இவ்வாறு சீமான் கூறியுள்ளார்.
-தினத்தந்தி