பேராக் மாநில அரசு கவிழ்ந்தது

மாலை மணி 508: பேராக் அரசு கவிழ்ந்ததாக துணைப் பிரதமர் நஜிப் அப்துல் ரசாக் செய்தியாளர் கூட்டத்தில் அறிவித்தார்.

பேராக் பக்காத்தான் ரக்யாட்டின் முன்னாள் சட்டமன்ற உறுப்பினர்கள் நால்வர்- மூவர் சுயேச்சைகள் ஒருவர் அம்னோவுக்கு மீண்டும் திரும்பி வந்துள்ள நசருடின்- இப்போது பாரிசான் நேசனலுக்கு ஆதரவாக இருப்பதால் அங்கு பாரிசான் பெரும்பான்மை பெற்றிருப்பதாக அவர் கூறினார்.

விரைவில் பேராக் சுல்தான் அஸ்லான் ஷாவைச் சந்திக்கப் போவதாகவும் அவர் கூறினார்.

“மூன்று சட்டமன்ற உறுப்பினர்களும்- ஜமாலுடின், ஒஸ்மான், ஹீ- தங்களின் முன்னாள் கட்சிகளிலிருந்து விலகிக் கொண்டிருப்பதுடன் தங்கள் கட்சிவிலகலை சுல்தானுக்கும் தெரியப்படுத்தியிருக்கிறார்கள்”, என்று நஜிப் கூறினார்.

அவர்களின் வருகையால் பாரிசான் மாநில அரசை அமைக்கும் அதிகாரத்தைப் பெற்றுள்ளது.

முடிவு இப்போது பேராக் சுல்தானின் கையில் உள்ளது. அவர் பாரிசான் நேசனல் புதிய அரசை அமைக்க அனுமதியளிப்பாரா அல்லது பக்காத்தானின் கோரிக்கையை ஏற்று மாநில அரசைக் கலைப்பாரா?



மாலை மணி 5.50: மாற்றுக்கட்சித் தலைவர் அன்வார் இப்ராகிம், பாரிசான் நேசனல் குறுக்கு வழியில் பேராக்கில் அரசாங்கம் அமைக்க முயல்கிறது என்று குற்றஞ் சாட்டினார்.

“நாங்கள் பேராக் சட்டமன்றத்தைக் கலைத்து புதிய தேர்தல் நடத்த விரும்புகிறோம். மக்களிடம் புதிதாக அதிகாரம் பெற விரும்புகிறோம்”, என்று ஏஎப்பி-யிடம் அவர் தெரிவித்தார்.

“பாரிசான் எப்படியாவது-அதுவும் குறுக்கு வழியில்- மாநில அரசை அமைக்கப் பார்க்கிறது.”

மாலை 5.35: சுல்தான் அஸ்லான் ஷாவைச் சந்தித்துவிட்டு முகமட் நிஜார், இஸ்தானாவைவிட்டுப் புறப்பட்டார். மாநிலச் சட்டமன்றத்தைக் கலைக்க வேண்டும் என்ற கோரிக்கையை சுல்தானிடம் வைத்திருப்பதாக அவர் செய்தியாளர்களிடம் கூறினார்.