போதையில் ரயில் முன் விழுந்தவர் உயிர் தப்பிய அதிசயம்

**சிவா** · **சிவா** Fri Nov 16, 2012 6:23 pm

http://img.dinamalar.com/data/large/Tamil_News_large_586532.jpg

திருப்பூர்:தண்டவாளத்தை கடக்க"போதை'ஆசாமி, சரக்கு ரயில் வந்ததால்,கீழே படுத்து காயங்களுடன் உயிர் பிழைத்தார். திருப்பூர், இடும்பாளையத்தைச் சேர்ந்தவர் மணி, 62. திருப்பூரில் உள்ள பனியன் நிறுவனத்தில் வேலை பார்க்கிறார்.நேற்று காலை இவர், மது அருந்தி விட்டு, கல்லாங்காடு அருகே ரயில்வே ரோட்டை கடக்க முயன்றார். தண்டவாளத்தை கடந்து கொண்டிருந்தபோது, கண்ணிமைக்கும் நேரத்தில் அவ்வழியாக சரக்கு ரயில் வந்தது.

அதிர்ச்சியடைந்த அவர், செய்வதறியாமல் தவித்து, ரயிலுக்கு முன் தண்டவாளத்துக்கு இடையே படுத்துக் கொண்டார். 40 பெட்டிகள் கொண்ட சரக்கு ரயில் கடந்து சென்றபின், மிரட்சியோடு எழுந்து வந்தார். கீழே விழுந்ததில், அவரது தலையில் காயம் ஏற்பட்டு, ரத்தம் சொட்டியது.

தகவல் அறிந்து வந்த, 108 ஆம்புலன்ஸ் ஊழியர்கள், அவருக்கு சிகிச்சை அளித்தனர். சிறிது நேரம் கழித்து, அவர் புறப்பட்டுச் சென்றார். ரயிலில் விழுந்து தலையில் சிறு காயத்துடன், நூலிழையில் உயிர் பிழைத்த மணியை, பொதுமக்கள் ஆச்சரியத்துடன் பார்த்து சென்றனர்.

தினமலர்