பேய் மழையில் 3 வயது குழந்தை உயிர் தப்பிய அதிசயம்

காஷ்மீரில் பேய் மழையைத் தொடர்ந்து ஏற்பட்ட திடீர் வெள்ளத்தில்
அடித்துச் செல்லப்பட்ட மூன்று வயது குழந்தையையும், அவளது தாயையும்
ராணுவத்தினர் பத்திரமாக மீட்டுள்ளனர். ஆனால், இந்த துயர சம்பவத்தில் 147
பேர் இறந்தனர் என்று அதிகார பூர்வமாக அறிவிக்கப்பட்டிருக்கிறது.
இந்நிலையில், கடந்த வியாழக்கிழமையன்று லே பகுதியில் திடீரென பேய் மழை
கொட்டியது. இதைத் தொடர்ந்து அங்கு கடும் வெள்ளப்பெருக்கும், நிலச்சரிவும்
ஏற்பட்டது. இதில் இறந்தவர்கள் 147 பேர்; அதில், பிரான்சு நாட்டைச் சேர்ந்த
இருவரும் அடக்கம். இன்னமும் 500 பேர் காணோம் என்றும், அவர்களைத் தேடும்
பணி முடுக்கி விடப்பட்டிருக்கிறது என்றும் கூறப்பட்டது. இதில், சேறு,
சகதியுடன் பாய்ந்து வந்த வெள்ள நீர், ராணுவ குடியிருப்பு பகுதியை துவம்சம்
செய்தது. ராஜ்குமார் வீட்டிற்குள்ளும் வெள்ள நீர் பீறிட்டு புகுந்தது.
அப்போது வீட்டில் இருந்த ராஜ்குமார், மனைவி மற்றும் குழந்தையை வெள்ள நீர்
அடித்துச் சென்றது. மனைவியையும், குழந்தையையும் காப்பாற்ற ராஜ்குமார்
போராடினர். ஆனால், வெள்ள நீரின் வேகத்திற்கு அவரால் ஈடுகொடுக்க
முடியவில்லை. இதுபோன்று வெள்ளத்தில் பலர் அடித்துச் செல்லப்பட்டனர். இதில்
ராஜ்குமார், வீட்டின் கூரையை பற்றிக்கொண்டு அதிர்ஷ்டவசமாக உயிர்
தப்பினார். வெள்ளத்தால் பாதிக்கப்பட்ட பகுதிகளில் இந்தோ - திபெத் எல்லை
பாதுகாப்புப் படையினர் உடனடியாக மீட்புப் பணிகளில் ஈடுபட்டனர். அப்போது,
ஒரு கட்டடத்தில் வீரர்கள் தேடுதல் பணியில் ஈடுபட்டிருந்தனர். அப்போது,
முகத்தில் காயங்களுடன் சேற்றில் சிக்கி உயிருக்கு போராடிய ஸ்ரீஜலை,
வீரர்கள் பத்திரமாக மீட்டனர். இதேபோன்று, அங்கிருந்து ஒரு கி.மீ.,
தூரத்தில் கழுத்தளவு சகதியில் சிக்கி உயிருக்கு போராடிக் கொண்டிருந்த
அவளது தாயையும், ஏழு மணி நேரம் கழித்து வீரர்கள் பத்திரமாக மீட்டனர்.
மனைவியும், குழந்தையும் அதிசயமாக உயிர் பிழைத்து திரும்பி வந்ததால்,
ராஜ்குமார் இரட்டிப்பு மகிழ்ச்சியில் இருக்கிறார். இதற்கிடையே, பேய்
மழையால் பாதிக்கப்பட்ட லே பகுதியை, மேற்கு மண்டல விமானப்படை தளபதி பிரவுன்
நேற்று விமானத்தில் பறந்து வான் வழி ஆய்வு நடத்தினார். அவருடன் விமானப்படை
செய்தி தொடர்பாளர் சீத்தாராமனும் உடன் சென்றார். மேலும், வெள்ளத்தில்
பாதிக்கப்பட்ட லே விமானப்படை தளத்தையும் அவர் நேரில் பார்வையிட்டார்.
ஆனாலும், காணாமல் போன ராணுவ வீரர்கள் குறித்து இன்னமும் தகவல்
தெரியவில்லை. விமானத்தில் கொண்டு வரப்பட்ட மருந்து பொருட்களை உள்ளுர்
நிர்வாகத்தினரிடம் ஒப்படைத்தார். மேலும், அங்கு மீட்புப் பணிகளை ஆய்வு
செய்து வரும் பிரதமர் அலுவலக விவகார இணையமைச்சர் பிருத்விராஜ் சவுகானுடன்
நிலவரம் குறித்து அவர் ஆலோசனை நடத்தினார். நேற்று பார்லிமென்டின் இரு
சபைகளும் இத்துயர சம்பவத்தில் உயிர் நீத்தவர்களுக்கு இரங்கல் தெரிவித்து
அஞ்சலி செலுத்தப்பட்டது.