இலங்கை தமிழர் மறுவாழ்வு: சர்வதேச குழுவின் 110 பரிந்துரைகளை இலங்கை ஏற்றது

இலங்கையில் நடைபெற்ற போர்க் குற்றங்களையும், மனித உரிமை மீறல்களையும் விசாரித்து, அந்நாட்டில் தமிழர்கள் சம உரிமை பெற்ற மக்களாக வாழ பரிந்துரைக்கும்படி ஐக்கிய நாடுகள் மனித உரிமை கவுன்சில் ஒரு குழுவை அமைத்தது. இந்த குழுவில், 99 நாடுகளை சேர்ந்த பிரதிநிதிகள் உறுப்பினர்களாக உள்ளனர். இவர்கள் இலங்கையில் வாழும் தமிழர்களின் நிலை மற்றும் அயல்நாடுகளில் புலம்பெயர்ந்து அகதிகளாக வாழ்ந்து வரும் தமிழர்களின் நிலை குறித்து ஆய்வு நடத்தினர். 'இலங்கையில் மனித உரிமை - சர்வதேச கண்ணோட்டம்' என்ற நோக்கில் நடத்தப்பட்ட இந்த ஆய்வின் அறிக்கை, இலங்கையில் மனித உரிமையை மேம்படுத்தும் 210 அம்சங்களை பரிந்துரைத்தது.

இவற்றில் 110 பரிந்துரைகளை இலங்கை அரசு இன்று ஏற்றுக் கொண்டுள்ளதாக அறிவிப்பு வெளியாகியுள்ளது. மீதமுள்ள 100 பரிந்துரைகளை நிராகரித்ததற்கான காரணங்களை விளக்கி ஐ.நா. மனித உரிமை தலைமை செயலகத்திற்கு இன்னும் 2 வாரங்களுக்குள் இலங்கை அரசு தன்னிலை விளக்கம் அளிக்கும் என இலங்கை மனித உரிமை தூதர் மகிந்த சமரசிங்கே கூறியுள்ளார்.

முன்னதாக, ஜெனீவாவில் நடைபெற்ற மாநாட்டில், இலங்கையின் மனித உரிமை மீறல்கள் தொடர்பாக மேற்கத்திய நாடுகள் சமர்ப்பித்த அறிக்கையை ஏற்றுக்கொள்ள இலங்கை அரசு மறுத்தது. தற்போது, இந்த 110 பரிந்துரைகளில் எல்.எல்.ஆர்.சி. (கற்றுக் கொண்ட பாடங்கள் மற்றும் நல்லிணக்க ஆணைக்குழு) பரிந்துரைகளை அமல்படுத்தவும், அந்நாட்டில் நடைபெற்ற மனித உரிமை மீறல்கள் குறித்து உள் விசாரணை நடத்தவும், தேசிய பிரச்சினைகளுக்கு தீர்வு காணவும் இலங்கை ஒப்புக் கொண்டுள்ளது.

இலங்கை அரசின் இந்த முடிவு குறித்து, நாடு கடந்த தமிழ் ஈழ அரசின் செய்தித் துறை தலைவர் பொனே பாலராஜன் கருத்து கூறுகையில், 'இலங்கை அரசின் இந்த முடிவும், நிலையும் அவர்களின் எதிர்கால செயல்பாடு எப்படி இருக்கும் என்பதை உறுதிப்படுத்தும் விதமாக உள்ளது. மீண்டும் ஒருமுறை சர்வதேச சமுதாயத்தை ஏமாற்றும் மோசடி வேலைக்கு இலங்கை அரசு தயாராகி வருகின்றது' என்றார்.

மாலைமலர்