ஆந்திராவில் பலத்த மழை: சாவு எண்ணிக்கை 28 ஆக உயர்ந்தது

கடந்த மாதம் 31-ம் தேதி தமிழ்நாட்டின் கடலோர மாவட்டங்களை தாக்கிய 'நீலம்' புயல், ஆந்திர மாநிலம் நெல்லூர் அருகே கரையை கடந்தது. இதனால், ஆந்திராவின் கிழக்கு கோதாவரி, நெல்லூர், விசாகப்பட்டினம் மாவட்ட மக்கள் கடும் பாதிப்படைந்துள்ளனர். 5.25 லட்சம் ஹெக்டேர் விளைநிலத்தில் உள்ள பயிர்கள் வெள்ளத்தில் மூழ்கி சேதமடைந்தன. 12 ஆயிரம் வீடுகள் நாசமடைந்துள்ளன. 67 ஆயிரம் பேர் நிவாரண முகாம்களில் தஞ்சமடைந்துள்ளனர்.


வெள்ளம் சூழ்ந்த பகுதிகளில் உள்ள மக்களை வெளியேற்றும் பணியில் கடந்த 5 நாட்களாக மீட்பு படையினர் முழு வீச்சில் ஈடுபட்டுள்ளனர். கிழக்கித்திய கப்பல் படையை சேர்ந்த 60 நீச்சல் வீரர்கள் கொண்ட 28 குழுக்கள் அமைக்கப்பட்டுள்ளது. இவர்கள் இதுவரை 2 ஆயிரத்து 100 பேரை மீட்டுள்ளனர். குண்டூர் மாவட்டத்தில் வெள்ளத்தால் பாதிக்கப்பட்ட கிராமங்களில் 2 சேட்டக் ஹெலிகாப்டர்களும், 1 சீ-கிங் ஹெலிகாப்டரும் வான்வழியே பறந்து உணவுப் பொட்டலங்களை போட்டன.

குண்டூர் மாவட்டத்தில் மட்டும் நெல், மிளகாய், பருத்தி மற்றும் எண்ணெய் வித்து பயிர்கள் வெள்ளத்தில் மூழ்கின. இங்கு மொத்தம் 2 லட்சம் ஏக்கர் விளைநிலங்கள் வெள்ளத்தில் மூழ்கி உள்ளன. கம்மம் மாவட்டத்தில் கேழ்வரகு, சோளம், காய்கறி விளைந்திருந்த 3.20 லட்சம் ஏக்கர் விளை நிலங்களிலும் வெள்ளம் சூழ்ந்துள்ளது. கொத்தவலசா-கிரண்டுல் ரெயில் பாதையின் அனைத்து ரெயில்களும் ரத்து செய்யப்பட்டுள்ளது. இதனால் விசாகப்பட்டினத்தில் இருந்து ஆந்திராவின் பல மாவட்டங்களுக்கு செல்ல வேண்டிய சரக்குகள் தேங்கி கிடக்கின்றன.

அடிலாபாத் மாவட்டத்தை சேர்ந்த ராமுலு என்ற 50 வயது விவசாயி பயிர்கள் வெள்ளத்தில் மூழ்கிய சோகத்தில் பூச்சி மருந்து குடித்து தற்கொலை செய்து கொண்டார். மேற்கு கோதாவரி மாவட்டத்தில் கடந்த 3 நாட்களாக வெள்ளத்தில் அடித்து செல்லப்பட்டும், கால்வாய்களில் மூழ்கியும் 4 பேர் உயிரிழந்தனர். இதனால், நீலம் புயலால் ஆந்திராவில் பலியானவர்கள் எண்ணிக்கை 28 ஆக உயர்ந்துள்ளது.

மாலைமலர்