கதை எண்.015 - பிரபா சர்க்கஸ்சும் நான்கு சித்திர குள்ளர்களும் (சிறுகதை சின்னத்திருவிழா)

தமிழகத்திலேயே இயற்கை அழகிற்கு பெயர் பெற்ற மாவட்டம் தேனி. பச்சை வெளிகளும், மேகம் சூழ்ந்த மலைகளும் பார்ப்பவர்களின் கண்களை கொள்ளை கொள்ள கூடியது. அப்படிப்பட்ட தேனி மாவட்டம் கம்பத்தில் நடைபெறும் பிரபா சர்க்கஸ் தேனி முழுவதும் பிரபலம். (யாரும் கம்பம்’க்கு போயி பிரபா சர்க்கஸ் தேடாதீங்க. எல்லாம் என்னோட கற்பனை தான்).

வருடத்தில் இரண்டு மாதங்கள் மட்டுமே தேனியில் நடைபெறும் இந்த சர்க்கஸை ரஞ்சித் பிரபாகரன் என்பவர் நடத்தி வந்தார். இந்த சர்க்கஸை காண தேனி மாவட்டம் மட்டுமில்லாது தமிழகத்தின் பல்வேறு மாவட்டங்களில் இருந்தும் கூட்டம் குவியும்.

பிரபா சர்க்கஸை பரம்பரை பரம்பரையாக ரஞ்சித் பிரபாகரனின் குடும்பத்தினர் நடத்தி வருகின்றனர். ஆனால் ரஞ்சித்திற்கு பிறகு இந்த சர்க்கஸை நடத்தி செல்வதற்கு அவருக்கு வாரிசு என்று யாரும் கிடையாது. இந்த கவலை எப்போதும் ரஞ்சித் மனதில் இருந்து கொண்டே இருந்தது.

சர்க்கஸ் மிக பிரபலமானதற்கு ஒரு காரணம் விலங்குகள் செய்யும் சாகச காட்சிகளும் வானில் பறந்து பறந்து பார் சர்க்கஸ் வீரர்கள் செய்யும் சாகசங்களும் எனலாம். இதை விட ஒரு முக்கிய காரணம் என்றால் அந்த சர்க்கஸில் வேலை செய்யும் நான்கு குள்ளர்கள் செய்யும் நகைச்சுவை காட்சிகளும் கேலி கிண்டலும் என்றே கூற வேண்டும். இவர்கள் செய்யும் சேட்டையையும், கோமாளித்தனத்தையும் பார்க்கும் யாரும் சிரிக்காமல் இருக்க மாட்டார்கள்.

குரங்கு, நாய், பூனை, கரடி, எலி என்று பலவிதமான வேடங்களில் வந்து வயிறு குலுங்க சிரிக்க வைப்பார்கள். அவர்களை சர்க்கஸில் இருக்கும் எல்லோரும் அப்பு, சுப்பு, சின்னா, முன்னா என்றே கூப்பிடுவார்கள்.

சர்க்கஸை ரசித்தவர்களின் பார்வைக்கு இவர்கள் செய்யும் சேட்டைகளும், கோமாளித்தனங்களும் மட்டுமே தெரிந்தாலும் அவர்கள் செய்யும் ஒவ்வொரு வேலைக்கும் பின்னால் எத்தனை நாள் பயிற்சியும், மெனக்கெடல்களும் இருக்கும் என்பதை ரஞ்சித் மிக நன்கு அறிவார். அவர்களின் கடின உழைப்பும் சாமர்த்திய புத்தியும் கண்டு அவர்களை தன் பிள்ளைகள் போல வளர்த்தார் ரஞ்சித்.

அன்று சர்க்கஸை காண கூட்டம் அதிகமாகவே இருந்தது. முதலில் விலங்குகள் செய்யும் சாகச காட்சிகள் தொடங்கியது. மாஸ்டரின் கட்டளைகளுக்கு ஏற்ப விலங்குகள் செய்த சாகச காட்சிகள் அனைவருக்கும் வியப்பளித்தது. அதுவும் நெருப்பு வளையத்திற்குள் சிங்கமும், புலியும் சீறி பாய்ந்தது. எல்லோரின் கண்களையும் ஆச்சரியத்தில் ஆழ்த்தியது.

இரண்டாவது நிகழ்ச்சி சித்திர குள்ளர்களின் சிரிப்பு வெடி. விலங்குகளின் சாகசம் முடிவதற்கு முன்னரே நான்கு பேரும் அரங்கிற்குள் நுழைந்திருக்க வேண்டும் பத்து நிமிட தாமத்திற்கு பின் அப்பு, சுப்பு, சின்னா மட்டும் யானையின் மேல் அமர்ந்து மேடைக்கு வந்தனர்.

அன்று மூவரும் குரங்கு வேடமிட்டு வந்திருந்தனர். வந்திறங்கிய நொடி முதல் அரங்கமே சிரிப்பில் மூழ்கியது. குரங்கு வேடம் போட்டு கொண்டு அங்கிருந்து இங்கும், இங்கிருந்து அங்குமாக குதித்தும் பல சேட்டைகள் செய்தும் லூட்டி அடித்தும் மக்களை சிரிக்க வைத்தனர்.

பின் விலங்களுக்கான நெருப்பு வளையத்திற்குள் இவர்கள் குதித்து ஆச்சரியமூட்டினார். பார் சர்க்கஸ் கயிற்றில் தொங்கியும் கீழே விழுந்தும் மக்களுக்கு சிரிப்பு விருந்து படைத்தனர். சர்க்கஸ் முடிந்த பின்னும் ரஞ்சித் கோபமாகவே இருந்தார். சித்திர குள்ளர்களின் தாமதமான வருகையே அவரின் கோபத்திற்கான காரணம்.

நேராக அப்பு, சுப்பு, சின்னாவிடம் சென்று வசவு பொழிய ஆரம்பித்தார். “தொழில் பக்தி இல்லாதவர்கள் என் சர்க்கஸில் வேலை செய்ய வேண்டாம். எங்கடா அந்த முன்னா துரை?? எங்க படுத்து தூங்குறாரு” என்று காட்டு காட்டு என காட்டினார். என்னடா நான் இவ்வளவு சொல்றேன் இன்னும் முகமூடியை கழட்டாம நீக்குறீங்க? முதல்ல முக மூடியை கழட்டுங்க என்று திட்டினார்.

அவர்கள் முக மூடியை கழட்டியதும் அவர்கள் கண்களில் இருந்து கண்ணீர் தாரை தாரையாக கொட்டியிருந்ததை கவனித்தார்.
“ஏன் டா அழறீங்க? நான் உங்களை திட்ட கூடாதா? முன்னா எங்கே? “ என்றார் ரஞ்சித். இதை கேட்டதும் இன்னும் அதிகமாக அழ ஆரம்பித்தனர்.

அன்று சர்க்கஸ் துவங்குவதற்கு முன் பயிற்சியில் ஈடுபட்டு கொண்டிருந்த போது எதிர் பாராத விதமாக முன்னா நெருப்பு வளையத்திற்க்குள் விழுந்து விட்டதாகவும் அவனை மருத்துவமனையில் அனுமதித்து விட்டு வருவதற்குள் தாமதமாகி விட்டதாகவும் கூறி அழுதனர்.

“அட பாவிகளா!! ஏன் டா இதை முதல்லயே சொல்லலை. இப்போ எப்படி டா இருக்கான்? என்றார். “ இல்லை மாஸ்டர் இந்த விஷயத்தை முதல்லயே சொல்லியிருந்தோம்’னா நீங்க சர்க்கஸை பாதியிலேயே நிறுத்தி இருப்பீங்க. அப்படி பண்ணா நம்ம சர்க்கஸ் கம்பெனிக்குன்னு இருக்குற நல்ல பேரு கெட்டு போயிடும்” என்றான் அப்பு.

அது மட்டுமில்லை மாஸ்டர், “ நல்ல கலைஞனுக்கு சொந்த வெறுப்பு விருப்பை விட தன் ரசிகர்களோட சந்தோஷம் தான் முக்கியம்’னு நீங்க எப்பவும் சொல்வீங்களே. அதான், நம்ம சர்க்கஸ பார்க்க வந்த ரசிகர்களோட சந்தோஷம் தான் முக்கியம்’னு சொல்லி முன்னா எங்களை அனுப்பி வைத்தான்” என்றான் சின்னா

இதை கேட்டதும் ரஞ்சித்தின் கண்களும் கலங்க தொடங்கியது. மூவரையும் அழைத்துக் கொண்டு மருத்துவமனைக்கு கிளம்பினார், ஒரு நல்ல தந்தையாக....