நான் கண்ட ஊர்! - ஒடிசா

**சிவா** · **சிவா** Tue Sep 18, 2012 8:30 pm

என் கணவரின் வேலை நிமித்தமாக, ஒடிசாவிலுள்ள தால்சேர் என்ற ஊரில் வசிக்க நேரிட்டது. கோல் இண்டியாவின் ஒரு பிரிவான “மஹாநதி நிலக்கரிச் சுரங்கம்’ ஒடிசாவில்தான் உள்ளது. அங்குதான் என்னவருக்குப் பணி. ஒடிசாவில் அலுமினியம், ஸ்டீல் தொழிற்சாலைகள் அதிகள், நால்கோ, ஹிடல்கோ போன்ற கம்பெனிகள் நல்ல முறையில் இயங்கி வருகின்றன.

* ஒடிசாவில் நிறைய கனிம, இயற்கை வளங்கள் நிறைந்திருந்தும் அதிகம் முன்னேற்றம் காணப்படவில்லை. காரணம் இருப்பதே போதும் என்ற மக்களின் மெத்தனமான போக்குதான்.

* இங்கே புவனேஸ்வர், கட்டக் போன்ற முக்கிய நகரங்களைத் தவிர மற்ற ஊர்களில் கடைகள்கூட அலுவலகம் போல குறிப்பிட்ட நேரம் மட்டுமே இயங்கும். பகல் 1 மணி வரை இயங்கி பின் 4 மணிக்கு மேல்தான் திறக்கப்படுகின்றன. இரவு பத்து மணிக்கு முன்னதாகவே மூடிவிடுவார்கள்.

* அரிசியும், மீனும்தான் முக்கிய உணவு. அசைவ உணவுப் பிரியர்கள். பித்ரு பக்ஷத்தில் 15 நாட்கள் அசைவம் சாப்பிட மாட்டார்கள். ஆனால், அது எப்போது முடியும் என காத்திருந்தவர்கள்போல் முடிந்த மறுநாள் இறைச்சிக் கடைகளில் நீண்ட வரிசையில் காத்திருந்து வாங்கிப் போவார்கள்.

* சைவ உணவு வகையில் எல்லா காய்கறிகளும் சேர்த்து பருப்புடன் தயாரிக்கப்படும் தால்மா, சந்துலா போன்ற சப்ஜி, தக்காளியை உபயோகித்து செய்யும் கட்டா போன்றவை விரும்பி உண்ணப்படுபவை. புளியின் உபயோகம் மிக மிகக் குறைவு.

* நம் வீடுகளில் தினசரி கோலம் எவ்வளவு முக்கியமோ அதுபோல தினமும் எல்லார் வீட்டு வாசலிலும் மண், செம்பு, பித்தளை இவற்றில் ஏதாவது ஒன்றிலான கலசம் வைத்த நீர் நிரப்பி அதன் மேல் மாவிலையும், மட்டையுடன் கூடிய சிறிய தேங்காயும் வைக்கப்பட்டிருக்கும். அதற்கு பூ வைத்து வழிபடுவார்கள்.

* வியாழக்கிழமை மஹாலக்ஷ்மியின் தினமாகக் கொண்டாடப்படுகிறது. அதுவும் மார்கழி மாத வியாழன்களில் விசேஷமான பூஜைகள் உண்டு. ஆன்று ரவை, தேங்காய், சர்க்கரை கலந்து சுடப்பட்ட இனிப்பு வடைதான் விசேஷமான பிரசாதம்.

* வியாழக்கிழமைகளில் யாருக்கும் கடனாக எந்தப் பொருளையும் தர மாட்டார்கள். மற்றபடி திருமணங்களில் “பாராத்’ வருவதும், “மூஹ் திகானா’ (மணப்பெண்ணின் முக்காட்டை விலக்கி அவள் முகம் பப்ரத்துவிட்டு பரிசுப் பொருள் கொடுப்பது) எல்லாம் அங்கு உண்டு.

* அங்கு படித்த மக்களைத் தவிர தேசிய மொழியான ஹிந்தி யாருக்கும் தெரிவதில்லை. பல மாகாணங்கள் பின் தங்கிய நிலையிலேயே உள்ளன. மக்கள் பழமை விரும்பிகள். கைவினைப் பொருட்கள் தயாரிப்புத் தொழில் இங்கு அதிகம். பூ வேலைப்பாடுகள் நிறைந்த கைத்தறிப் புடவைகள் கண்களைக் கவரும். இவை சம்பல்பூரில் தயாராகின்றன.

* காடுகள் நிறைந்த இடம் ஒடிசா. புகழ் பெற்ற “நந்தன்கானன்’ உயிரியல் பூங்கா, ஒடிசாவின் தலைநகரமான புவனேஸ்வரில் உள்ளது.

* கோயில்கள் நிறைந்த நகரம் புவனேஸ்வர். இங்கு புகழ் பெற்ற “லிங்கராஜ்’ சிவன் கோயில் உள்ளது.

* புவனேஸ்வரிலிருந்து ஒன்றரை மணி நேர பயணத்தில் பூரியை அடையலாம். ஒடிய மக்கள் மிகவும் போற்றும், தெய்வம் பூரி ஜெகன்னாத், இங்கு விஷ்ணுவின் அவதாரமான ஜெகன்னாத் தன் அண்ணன் பலராமனும், தங்கை சுபத்ராவுடனும் காட்சி தந்து அருள் பாலிக்கிறார். மூர்த்தங்கள் மரத்தால் ஆனவை. கருவறை உள்ளே சென்று பாதம் தொட்டு தரிசிக்கலாம்.

* ரதயாத்திரையின்போது கருவறை மூர்த்தங்களையே வெளிக்கொணர்ந்து ரதங்களின் மேல் ஆரோகணம் செய்கிறார்கள். துவாரகையில் மணிக்கு ஒருமுறை உடை மாற்றப்படுவது விசேஷமென்றால், இங்கு இறைவனுக்கு மணிக்கு ஒருதடவை நைவேத்யம் செய்யப்படுவது விசேஷம். பிறகு அப்பிரசாதத்தை கோயிலின் அருகிலேயே “ஆனந்த பஜார்’ என்ற இடத்தில் விற்கிறார்கள்.

* இனிப்பு, எண்ணெய் பண்டங்கள் தவிர அன்னம், சப்ஜி, கீர், தால் என எல்லாமே விற்கப்படுகிறது. மிக ருசியாக இருக்கும் (இறைவன் பிரசாதமல்லவா!)

* ஒடியபாணி கோபுரங்கள் மேல்நோக்கி நீண்டு, மிக உயரமாகக் காணப்படகின்றன. பருவத்துக்கு ஏற்றவாறு அவற்றின்மேல் சிவப்பு, வெள்ளை, பச்சை வண்ணக் கொடிகள் பறக்க விடப்படும். பூரி கோயில் கோபுரத்தின் மேல் ஏறி கொடிகளை மாற்றும் ஊழியர், மேலே ஏறும்போது பார்க்கவே பயமாக இருக்கும். அவர் பத்திரமாய் இறங்கிய பின் எல்லோரும் அவரது காலில் விழுந்து ஆசி பெறுவார்கள்.

* எல்லா கோயில்களிலும் நுழைவு வாசலில் இருபுறமும் யானையின் மேலேறி நின்று, அடக்கும் சிங்கத்தின் உருவச் சிலைகள் வைக்கப்பட்டிருக்கும். விஷ்ணு கோயில்களில் துளசி மாடம் இருக்கும். நம்மூர் போல அல்லாமல் அழகிய மாது ஒருத்தி, தன் தலையில் துளசித் தொட்டியை பக்தியுடன் வைத்துக் கொண்டிருப்பதுபோல் தோற்றமளிக்கும்.

* கருவறையின் நுழை வாசலுக்கு மேல் புறம் நவகிரகங்களின் சிலைகள் வரிசையாகச் செதுக்கப்பட்டிருக்கும் தனி நவகிரக சன்னதி கிடையாது. விஷ்ணு கோவிலானால் கருவறையின் வலப்புற சுவரின் வெளியே பூவராஹ மூர்த்தியும், பின்புற சுவரில் நரசிம்ம மூர்த்தியும், இடப்புற சுவரில் வாமன (அ) த்ரிவிக்ரம மூர்த்தியும் காணப்படும். சிவன் கோயிலில் முறையே வலப்புறம் பிள்ளையார், பின்புறம் சுப்ரமண்யர், இடப்புறம் துர்க்கையின் சன்னதிகள் காணப்படும்.

* கோனார்க் சூரியகோயில் (24 சக்கரங்கள் கொண்ட ரதத்தின் மேல் இளங்காலை, நடுப்பகல், மாலை என மூன்றுவித முகத்தோற்றத்துடன் கூடிய சூரிய பகவானின் திருவுருவம்), பறவைகள் வாசஸ்தலமான “சில்கா’ ஏரி, சிப்பாய் கலகம் மூண்ட பெஷ்ராம்பூர், நேதாஜி பிறந்த ஊரான “கட்டக்’ என இன்னும் பல புகழ் வாய்ந்த இடங்களை தன்னுள்ளே கொண்டது எங்கள் ஒடிசா!

- ஜி. ஜீவரேகா, சென்னை - 92.