பாதுகாப்பு நோயாளிகளுக்கா? மருத்துவர்களுக்கா? டெல்லி அரசு மருத்துவமனையில் அடியாட்கள் நியமனம்!

கவனக்குறைவாக சிகிச்சை அளிப்பது, ஓவர்டோஸ் கொடுப்பது, தப்பும்தவறுமாக சிகிச்சை அளிப்பது இதனால் நோயாளிகள் இறப்பது என்பது வழக்கமாகி வரும் சூழ்நிலையில் பாதிக்கப்பட்டவர்கள் மருத்துவர்களைத் தாக்காமல் இருக்க டெல்லி அர்சு மருத்துவமனையான தீன் தயாள் உபாத்யாய்மருத்துவமனையில் 'பவுன்சர்கள்' என்ற அடியாட்களை நியமனம் செய்துள்ளனர்.

இவர்கள் பணி என்னவெனில் அவசரநிலை பிரிவு, பிரசவ அறை ஆகியவற்றில் நோயாளிகளைப் பார்க்க வருபவர்களை 'கட்டுப்படுத்துவதாம்'!

இவர்கள் நோயாளிகளை பார்க்க வருபவர்கள் அல்லது சற்றே கோபமடைந்து கத்தி ஆர்பாட்டம் செய்பவர்கள் போன்றவர்களை 'அப்புறப்படுத்துவார்களாம்'. அதாவது மேலே கைவைக்கக் கூடாது என்பது உத்தரவாம்.

ஆனாலும் இவர்களது சிக்ஸ் பேக் அப்ஸ் பாடியை பார்த்தாலே அங்கு அநியாயம் நடந்தாலும் யாரும் தட்டிக் கேட்கக் கூடாது என்பதுதான் இதன் உண்மையான நோக்கம் என்று டெல்லி வாசிகளில் சிலர் கூறியுள்ளதாக பத்திரிக்கை செய்திகள் தெரிவிக்கின்றன.

சண்டைக் காட்சிகளில் ஹீரோவிடம் அடி வாங்கும் பயில்வான் போல் இவர்கள் இருப்பதால் மக்களில் பலர் சொல் பேச்சு கேட்கின்றனராம். இதனை அந்த மருத்துவமனை மருத்துவரான நிதின் சேத் என்பவரே பல்லிளித்துக் கொண்டு கூறியுள்ளார். இவருக்கும் கடந்த ஏப்ரல் மாதம் நோயாளிகள் உறவினர்கள் கையால் 'கவனிப்பு' நடந்ததே இவரது மகிழ்ச்சிக்குக் காரணம் போலும்!

இவர்களை நியமனம் செய்த பிறகு டாக்டர்களின் மூஞ்சி, முதுகுகள் தப்பித்ததாக அவரே கூறுகிறார். அதாவது இவர்கள் நியமனத்திற்குப்பிறகு அசம்பாவித தாக்குதல் சம்பவம் எதுவும் தீன் தயால் மருத்துவமனையில் நிகழவில்லையாம்.

டெல்லியில் மட்டுமல்ல இந்தியா முழுதும் மருத்துவர்களுக்கு பாதுகாப்பு இல்லையாம்! மருத்துவர் ஒருவர் சிகிச்சை அளிக்கும்போது நோயாளியிடம் பாலியல் ரீதியாக தொந்தரவு கொடுத்தார் என்ற அடிப்படையில் டெல்லியில் ஒரு மருத்துவமனையில் கடந்த சில மாதங்களுக்கு முன்பு 6 டாக்டர்களுக்கு 'கவனிப்பு' நடந்துள்ளது.

தவறு செய்து நோயாளிகள் உறவினர்கள் நண்பர்களிடம் 'வாங்கி' கட்டிக் கொள்ளும் டாக்டர்களைப் பாதுகாக்க டெல்லி அரசு மருத்துவமனையில் 21 அடியாட்களை நியமித்துள்ளனர்.

இவர்கள் முதலில் பிரச்சனை செய்பவர்களிடம் 'சுமுகமாக' பேசுவார்களாம். பிறகு அப்படியும் சொல் பேச்சு கேட்கவில்லையெனில் கேஷுவல்டி மெடிகல் ஆபிசர் அறைக்கு அந்த நபரை அழைத்துச் செல்வார்களாம் அங்கு 'பிரச்சனை தீர்க்கப்படுமாம்'!

இனிமேல் என்ன நோயாளிகள் இந்த பவுன்சர்களுக்கும் 'லஞ்சம்' கொடுக்க சில பல நூறுகளை அழ வேண்டியதுதான் பாக்கி!

இது என்ன அரசு மருத்துவமனையில் அடியாட்கள் என்று ஆளும் கட்சியைக் கேட்டால் "நல்லதுதானே வேலை வாய்ப்பு கொடுக்கிறோம் பாருங்கள்" என்று கூறினாலும் கூறுவார்கள். விலை வாசி உயர்வினால் 'மகிழ்ச்சியடையும்' அபார மூளை அமைச்சர்களைக் கொண்ட அமைச்சரவையாயிற்றே நம் அமைச்சரவை!

இனிமேல் என்ன இந்த மோசமான நடைமுறை மற்ற மருத்துவமனைகளிலும் கடைபிடிக்கப்பட்டால் (இப்போது நடைமுறையில் இல்லை என்று கூறுவதற்கான உத்திரவாதம் இல்லை) நோயாளிகளின் பில்களில் பவுன்சர்கள் சார்ஜ் என்று ஒரு புதிய வகை சேர்க்கப்பட்டாலும் படலாம்!

டாக்டர்களும் நோயாளிகளிடம் இனி கோபாவேசமாகப் பேசலாம் ஏனெனில் எதிர்த்துக் கேட்க முடியுமா? அவரது பக்கத்தில் பொன்னம்பலம் ரேஞ்சிற்கு ஒரு பவுன்சர் நின்று கொண்டிருந்தால் யாருக்குத்தான் எதிர்க்க மனசு வரும்?

நோயாளிகளும், நோயாளிகளின் நண்பர்களும் இனி மைக்கேல் மதன காமராசன் படத்தில் வரும் காமேஸ்வரன் பாணியில் "பீம் பாய் பீம் பாய் எங்க அப்பாவுக்கு நெஞ்சு வலி டாக்டரை கூப்ட முடியுமா?" என்று கேட்க வேண்டியதுதான்.

டுவெண்டி 20 கிரிக்கெட் வந்த பிறகு தன் மகனும் பணம் அள்ளவேன்டும் என்று கிரிக்கெட் கோச்சிங்கிற்கு அனுப்பும் பெற்றோர்கள் இனி மருத்துவமனை 'பீம் பாய்கள்' பயிற்சி ஏதாவது இருந்தால் அதில் சேர்த்து விட முயற்சி செய்யலாம்!

மிகப்பெரிய முதல் சிறிய மருத்துவமனை வரை மருந்துக் கடைகளை உள்ளேயே அந்த மருத்துவரோ அல்லது மருத்துவமனை நிர்வாகமோ நடத்தி வருவது இன்று சகஜமானது. ஓரிரண்டு பவுன்சர்களை அங்கு நியமித்தால் போதும் டாஸ்மாக் பாணியில் ஜெண்டாமைசின் ஒரு ஊசி 9 ரூபாய் என்றால் 14 ரூபய் கொடு என்று கேட்டு வாங்கலாம்! கொடுதுத் தானே ஆகவேண்டும்? வேறு வழி!

வசூல் ராஜா எம்.பி.பி.எஸ். படத்தில் வருவதுபோல் 'அந்த பொறம்போக்க போஸ்ட்மார்ட்டம் பண்ணு' ரக பேச்சுக்களை இனி மக்கள் சர்வசகஜமாக கேட்கக்கூடிய நிலை ஏற்படும்.

ஒரு அரசு மருத்துவனையிலேயே அடியாட்கள் நியமனம்! அதனை அனுமதிக்கும் அரசு! இந்தியா ஒரு வெட்கங்கெட்ட தேசமாக மாறிக் கொண்டிருக்கிறதா அல்லது ஏதோவொரு பயங்கரத்தை நோக்கி சென்று கொண்டிருக்கிறதா? அனைவரும் யோசிக்க வேண்டிய கேள்வியாகும் இது!


வெப்துனியா

டாக்டர்ட்ட தப்பிச்சா இவங்க மேல அனுப்பி வெச்சிடுவாங்களோ?

ரவுடிங்கள வெச்சு சமாளிக்கறதால இந்த அரசை இனிமே
யாரும் கையாலாகாத அரசுன்னு கேவலமா
சொல்லாதீங்க ஜனங்களே.