அரசு பஸ்-தனியார் பஸ் மோதல்; கல்லூரி மாணவி உள்பட 3 பேர் பலி - 40 பேர் படுகாயம்

சங்ககிரி அருகே அரசு பஸ்-தனியார் பஸ் நேருக்குநேர் மோதிய விபத்தில் கல்லூரி மாணவி உள்பட 3 பேர் பலியானார்கள். 40-க்கும் மேற்பட்டோர் படுகாயம் அடைந்தனர்.

பஸ்கள் மோதல்

சேலத்தில் இருந்து பவானி நோக்கி நேற்று மாலை தனியார் பஸ் ஒன்று புறப்பட்டு சென்றது. அதேபோல ஈரோட்டில் இருந்து சேலம் நோக்கி அரசு பஸ் ஒன்று சென்று கொண்டிருந்தது. இந்த இரு பஸ்களும் சேலம் மாவட்டம் சங்ககிரி அருகே உள்ள ஊஞ்சம்பாளையத்திற்கு மாலை 5.45 மணிக்கு வந்தபோது எதிர்பாராதவிதமாக நேருக்குநேர் மோதின.

இந்த விபத்தில் அரசு பஸ் டிரைவர் திருச்செங்கோட்டை சேர்ந்த பழனியப்பன் (வயது35), அரசு பஸ்சில் பயணம் செய்த கள்ளக்குறிச்சியை சேர்ந்த மாணிக்கம்மாள் ஆகியோர் சம்பவ இடத்திலேயே பரிதாபமாக இறந்தனர்.

கல்லூரி மாணவி பலி

விபத்தில் அரசு பஸ் மற்றும் தனியார் பஸ்சில் பயணம் செய்த 40 பேர் படுகாயம் அடைந்தனர். அவர்கள் அனைவரும் சங்ககிரி அரசு ஆஸ்பத்திரியில் முதலுதவி சிகிச்சை பெற்ற பின்னர், மேல் சிகிச்சைக்காக ஈரோடு மற்றும் சேலம் அரசு ஆஸ்பத்திரிகளுக்கு அனுப்பி வைக்கப்பட்டனர்.

இந்த நிலையில் சேலம் அரசு ஆஸ்பத்திரிக்கு வரும் வழியில், வாழப்பாடியை சேர்ந்த ராஜன் என்பவரின் மகள் கார்த்திகா (20) பரிதாபமாக இறந்தார். இவர், பெருந்துறையில் உள்ள தனியார் கல்லூரியில் பி.எஸ்சி. 3-ம் ஆண்டு படித்து வந்தார்.

அமைச்சர் ஆறுதல்

சேலம் அரசு ஆஸ்பத்திரியில் சிகிச்சை பெற்று வரும் பயணிகளை நேற்று இரவு நெடுஞ்சாலைத்துறை அமைச்சர் இடைப்பாடி பழனிச்சாமி, மாவட்ட கலெக்டர் மகரபூஷணம் ஆகியோர் நேரில் பார்வையிட்டு ஆறுதல் கூறினார்கள்.

இந்த விபத்தால் சேலம்-சங்ககிரி தேசிய நெடுஞ்சாலையில் சுமார் ஒரு மணி நேரம் போக்குவரத்து பாதிக்கப்பட்டது.

தினத்தந்தி!

வருந்த தக்க செய்தி. ஓட்டுனர்கள் கூடுதால் கவனம் செலுத்த வேண்டும்.

ammulu wrote:வருந்த தக்க செய்தி. ஓட்டுனர்கள் கூடுதால் கவனம் செலுத்த வேண்டும்.

இதற்கெல்லாம் காரணம், அமலாக்த்துறையில் உள்ள கோளாருகள். அலட்சியம், ஒரு காரணமாக இருந்தாலும் லஞ்சம் எனப்படும் கையூட்டுதான் முக்கிய காரணம். சட்டம் சரியாக முறையாக இருந்தால் இப்படி விபத்துகள் நடப்பதை தவிர்க்கலாம்.

இனி ப்ளயிட்டைபோல பஸிளையும் லைப் காட் கொடுக்கணும் போலிருக்கு