பஸ்–கார் மோதல்; 3 பேர் நசுங்கிச்சாவு மேலும் 6 பேர் படுகாயம்

அரசு பஸ்–கார் மோதிக்கொண்ட விபத்தில், காரில் சென்ற 3 பேர் உடல் நசுங்கி பலியானார்கள். மேலும் 6 பேர் படுகாயம் அடைந்தனர்.

இந்த கோர விபத்து பற்றிய விவரம் வருமாறு:–

காரில் சென்றனர்

நெல்லை மாவட்டம் ராதாபுரம் தாலுகா கூடங்குளம் அருகே கூட்டப்புளி என்ற கடற்கரை கிராமம் உள்ளது. அந்த கிராமத்தைச் சேர்ந்த 9 பேர் ஒரு காரில், துக்க நிகழ்ச்சியில் கலந்துகொள்வதற்காக புறப்பட்டனர்.

கூட்டப்புளியில் இருந்து கன்னங்குளத்தை நோக்கி கிழக்கு கடற்கரை சாலையில் சென்று கொண்டிருந்தனர். இது நாகர்கோவில்–திருச்செந்தூர் பிரதான சாலை ஆகும்.

பஸ்–கார் மோதல்

கன்னங்குளம் அருகே சென்ற போது ஒரு அரசு பஸ் வந்தது. எதிர்பாராதவிதமாக அந்த பஸ்சும், அந்த காரும் பயங்கரமாக மோதிக்கொண்டன.

மோதிய வேகத்தில் கார் உருக்குலைந்து சிதைந்தது. காரில் இருந்தவர்கள் இடிபாடுகளுக்குள் சிக்கி உடல் நசுங்கி உயிருக்குப் போராடினார்கள்.

உடனடியாக பஸ்சில் இருந்தவர்களும், அந்த பகுதியைச் சேர்ந்தவர்களும் ஓடிவந்து காருக்குள் இருந்தவர்களை மீட்கும் முயற்சியில் ஈடுபட்டனர். பழவூர் போலீசாரும் விரைந்து வந்து, மீட்பு பணிகளை முடுக்கிவிட்டனர்.

3 பேர் பலி

இதில் சுக்ரியன் (வயது 54) என்பவர் சம்பவ இடத்திலேயே பலியானார். உயிருக்கு போராடிய ராஜன் (38), அருள் மார்ட்டின் (52) உள்ளிட்டோர் சிகிச்சைக்காக நாகர்கோவிலில் உள்ள ஆஸ்பத்திரிகளுக்கு கொண்டு செல்லப்பட்டனர். ஆனால், செல்லும் வழியில் ராஜன் பரிதாபமாக இறந்தார்.

ஆஸ்பத்திரியில் அனுமதிக்கப்பட்ட சற்று நேரத்தில், சிகிச்சை பலன் அளிக்காமல் அருள் மார்ட்டினும் இறந்தார். பலியானவர்களில் சுக்ரியன், அருள் மார்ட்டின் ஆகியோர் குமரி மாவட்டம் கோவளத்தைச் சேர்ந்தவர்கள்.

6 பேருக்கு சிகிச்சை

கார் டிரைவர் கிஷோர், எர்சன் உள்பட 6 பேருக்கு ஆஸ்பத்திரியில் தீவிர சிகிச்சை அளிக்கப்பட்டு வருகிறது.

சம்பவ இடத்தை வள்ளியூர் போலீஸ் துணை சூப்பிரண்டு பாலாஜி மற்றும் போலீஸ் அதிகாரிகள் பார்வையிட்டு விசாரணை நடத்தினார்கள்.

விபத்து குறித்து பழவூர் போலீசார் வழக்குப்பதிவு செய்துள்ளனர். பலியான 3 பேரின் உடல்களும் பிரேத பரிசோதனைக்காக நாகர்கோவில் ஆசாரிபள்ளம் அரசு ஆஸ்பத்திரிக்கு அனுப்பி வைக்கப்பட்டன.