மகள் பட்டம் பெறுவதை காணும் ஆசையில் சைக்கிளில் 6 நாடுகளை கடந்த தந்தை

**சிவா** · **சிவா** Fri 27 Jul 2012 - 13:59

தங்களது குடும்ப உறுப்பினர் கவுரவிக்கப்படும் போது வெகுதூரமாக இருந்தாலும் கூட, அதை நேரில் கண்டுகளிக்க வேண்டும் என பெற்றோருக்கு ஆசை ஏற்படுவது சகஜம். இப்படி பல்கலைக்கழகத்தில் தனது மகள் பட்டம் பெறுவதை பார்க்கும் ஆசையில் ஒருவர் 6 நாடுகளை சைக்கிளிலேயே கடந்து சென்ற சம்பவம் நடந்தது. போலந்து நாட்டை சேர்ந்த ஜெர்சாய் ஜாப்லோன்ஸ்கா (வயது 55) என்பவரது மகள் இங்கிலாந்தில் உள்ள பல்கலைக்கழகத்தில் படித்து பட்டதாரி ஆனார். அதற்கான பட்டம் பெறும் நிகழ்ச்சி நடைபெற்றது. சொந்த ஊரில் சிறிய கடை நடத்தி வரும் ஜெர்சாய் இங்கிலாந்து சென்று மகள் பட்டம் பெறுவதை நேரில் பார்க்க நினைத்தார்.

இதற்காக தனது சைக்கிளில் பயணத்தை தொடங்கினார். பாஸ்போர்ட், கைச்செலவிற்கு பணம், செல்போன் மற்றும் பஞ்சர் ஒட்டுவதற்கு தேவையான பொருட்கள் ஆகியவற்றை மட்டுமே எடுத்துக் கொண்டார். காலை 7 மணிக்கு தொடங்கினால் இரவு 7 மணிக்கு தான் சைக்கிள் பயணத்தை நிறைவு செய்வார். இவ்வாறு சைக்கிளில் போலந்து, ஜெர்மனி, நெதர்லாந்து, பெல்ஜியம், பிரான்சு வழியாக இங்கிலாந்து போய் சேர்ந்தார். மகளை காணும் உற்சாகத்தில் இந்த 6 நாடுகள் வழியாக அவர் சுமார் 2 ஆயிரம் கிலோ மீட்டர் தூரத்தை 10 நாட்களிலேயே கடந்து சென்று விட்டார்.