இன்று உலக ஐஸ்கிரீம் தினவிழா

**சிவா** · **சிவா** Sun Jul 15, 2012 8:23 am

சில உணவு வகைகளை பெரியவர்களும், சில உணவுகளை குழந்தைகளும் விரும்பி சாப்பிடுகின்றனர்.

ஆனால் ஒரு சில உணவு வகையை மட்டும் வயது வித்தியாசம் இல்லாமல் அனைவரும் ஆவலுடன் ருசித்து சாப்பிடுகின்றனர். அதில் முக்கியமானது ஐஸ்கிரீம்.

உணவை எடுத்துக்கொண்டால் உணவோடு சம்பந்தப்பட்ட பல்வேறு தினங்கள் கொண்டாடுகிறோம். உலக உணவு தினம் அக்டோபர்- 16, உலக பால் தினம் ஜுன்- 1, உலக தாய்ப்பால் தினம்- ஆகஸ்டு- 1, உலக தண்ணீர் தினம் மார்ச்- 22, உலக ஆரோக்கிய தினம் ஏப்ரல்- 7, உலக பட்டினி தினம் மே- 28, உலக தேங்காய் தினம் செப்- 2. உலக வெஜிட்டேரியன் தினம் அக்டோபர்- 1, உலக பீர் தினம் ஆகஸ்டு- 5 இவ்வாறு தொடர்ந்து செல்கிறது.

ஜுலை மூன்றாவது ஞாயிற்றுக்கிழமை அதாவது இந்த ஆண்டு ஜுலை 15-ந் தேதி உலக ஐஸ்கிரீம் தினம் கொண்டாடப்படுகிறது. இதனையும் பிரித்து ஜுன் 7-ந் தேதி உலக சாக்லேட் ஐஸ்கிரீம் தினமாகவும் கொண்டாடப்படுகிறது.

ஐஸ்கிரீமை பிரபலப்படுத்தும் வகையில் குழந்தைகள் முதல் பெரியவர்கள் வரை அனைவரும் ஐஸ்கிரீம் திருவிழாக்களை அமெரிக்கா போன்ற மேலைநாடுகளில் கொண்டாடுகின்றனர்.

பால்பொருட்கள், முட்டை மஞ்சள் கரு, கிரீம் மற்றும் இனிப்பு கலந்த கலவை பொருட்களால் தயாராகும் மென்மையான, இனிமையான குளிர் உணவு ஐஸ்கிரீம்.

கோடைக்காலங்களில் வெப்பத்தின் தாக்கத்திலிருந்து தப்பிப்பதற்காக சூடான உணவுகளை தவிர்த்து ஐஸ்கிரீம் போன்ற உணவுகளை குழந்தைகள் முதல் பெரியவர்கள் வரை உண்ணுகின்றனர்.

அமெரிக்கா மற்றும் இங்கிலாந்து போன்ற நாடுகளில் ஜுலை மாதங்களில் குளிர்குறைந்து வெப்பம் அதிகரிப்பதால் அங்கு பால், கிரீம் மற்றும் பல்வேறு வகையான பழங்களை சேர்த்து வீடுகளிலேயே தினசரி ஐஸ்கிரீம் தயாரித்து சாப்பிடும் பழக்கம் உள்ளது.

இதனால் 1984-ம் ஆண்டு அமெரிக்கா அதிபராக இருந்த ரேனால்டு ரீகன் ஜுலை மாதத்தை தேசிய ஐஸ்கிரீம் மாதமாகவும், ஜுலை மூன்றாவது ஞாயிற்றுக்கிழமையை தேசிய ஐஸ்கிரீம் தினமாகவும் அறிவித்தார். இதனால் நூற்றுக்கணக்கான வகை ஐஸ்கிரீம் சாப்பிடும் போட்டிகளும், வியக்கத்தக்க வகையில் ஐஸ்கிரீம் தயாரிப்பதும், ஐஸ்கிரீம் தொடர்பான வீடியோ படக்காட்சிகளும் நடத்தப்படுகின்றன.

அமெரிக்காவில் பிலடெல்பியா, மிசோரி, கலிபோர்னியா மற்றும் ஜமைக்காவில் கிங்ஸ்டன், அர்ஜென்டினாவில் போனஸ்அயர்ஸ், ஜப்பானில் டோக்கியோ, ஆஸ்திரேலியாவில் சிட்னி, துருக்கியில் இஸ்தான்பூல், டென்மார்க்கில் கோப்பன்ஹேகன், இத்தாலியில் பிளாரன்ஸ் ஆகிய நகரங்கள் ஐஸ்கிரீமுக்கு உலகிலேயே புகழ்பெற்ற 10 நகரங்கள் ஆகும்.

உலகம் முழுவதும் நூற்றுக்கணக்கான வகை ஐஸ்கிரீம்கள் கிடைத்தாலும் வெண்ணிலா ஐஸ் கிரீம் 30.2 சதவிதமும், சாக்லேட் ஐஸ்கிரீம் 10 சதவீதம், துண்டுகளால் வெட்டப்பட்ட சாக்லேட் ஐஸ்கிரீம் 5.7 சதவீதம், வெண்ணெய் பீக்கான் ஐஸ்கிரீம் 4 சதவீதம், சிவப்பு நிறமான ஸ்ட்ராபெரி 3.7 சதவீதம், நிப்போல்டின் 3 சதவீதம், குக்கி அன்டு கிரீம் 2.6 சதவீதம், ராக்கி ரோட் 1.9 சதவீதம், கொழுப்பில் வறுத்து எடுத்து தயாரிக்கப்பட்ட ஐஸ்கிரீம் 1.5 சதவீதம், செரி வெண்ணிலா 0.9 சதவீதம், காப்பி ஐஸ் கிரீம் 0.7 சதவீதம் பேர் சாப்பிடுகின்றனர்.

ஒரு கப் ஐஸ்கிரீமில் 267 கலோரிகள் உள்ளன. தவிர 14.2 சதவீதம் கொழுப்பு, 32.45 சதவீதம் கார்ப்போஹைட்ரேட், 4.68 கிராம் புரோட்டின் உள்ளது. ஆரோக்கியத்திற்கு அதிக பலன் இல்லாவிட்டாலும் "அளவுக்கு மீறினால் அமிர்தமும் நஞ்சு'' என்பதை மனதில் வைத்துக்கொண்டு பொழுதுபோக்குக்காக ஐஸ்கிரீமை எப்போதாவது சாப்பிடுவது நல்லது என்று மருத்துவர்கள் கூறுகின்றனர்.