திருப்பதியில் 1 1/4 லட்சம் லிட்டர் மது கொட்டி அழிக்கப்பட்டது பீடி, சிகரெட், பாக்கு பொட்டலங்கள் மலை போல குவித்து தீ வைத்து எரிப்பு

**ராஜா** · **ராஜா** Sat Jun 30, 2012 11:29 am

திருப்பதியில் பறிமுதல் செய்யப்பட்ட 1ற் லட்சம் லிட்டர் மது கீழே கொட்டி அழிக்கப்பட்டது. அதேபோல் பீடி, சிகரெட், போதை பாக்கு பொட்டலங்கள் போன்றவையும் தீ வைத்து எரிக்கப்பட்டன.

போதை பொருட்களுக்கு தடை

உலகப்புகழ் பெற்ற திருப்பதி ஏழுமலையான் கோவில், மேல் திருப்பதி எனப்படும் திருமலையில் அமைந்துள்ளது.

ஏழுமலையான் கோவில் உள்ளதால் திருமலை பக்தி நகரமாக அறிவிக்கப்பட்டு இருக்கிறது. அதன் காரணமாக திருமலையில் மாமிசம், மது, பீடி, சிகரெட், போதை பாக்கு, புகையிலை போன்ற 8 வகையான போதை பொருட்கள் தடை செய்யப்பட்டு இருக்கின்றன.

தீவிர கண்காணிப்பு

இந்த தடையை பற்றி அறியாத சிலர், போதை பொருட்களை திருமலைக்கு கொண்டு செல்ல முயற்சிப்பது உண்டு. சமூகவிரோதிகள் சிலரும் தடை செய்யப்பட்ட பொருட்களை திருமலைக்கு கொண்டு சென்று, அங்கு கூடுதல் விலைக்கு விற்கும் செயலிலும் ஈடுபட்டு வருகின்றனர்.

இத்தகையவர்களை கண்டுபிடிப்பதற்காக, மலைப்பாதை தொடங்கும் அலிபிரி என்ற இடத்தில் சோதனைச் சாவடி அமைக்கப்பட்டு இருக்கிறது. அந்த சோதனைச் சாவடியை கடந்து செல்லும் வாகனங்கள் அனைத்தும் கடுமையான சோதனைக்கு உட்படுத்தப்பட்ட பின்னரே திருமலைக்கு செல்ல அனுமதிக்கப்படுகின்றன.

மலை போல் குவிந்தன

இவ்வாறு அலிபிரியில் சோதனை செய்யும்போது மாமிசம், மது பாட்டில்கள், பீடி, சிகரெட் மற்றும் போதை பாக்குகள் போன்றவை அதிகாரிகளால் கண்டுபிடிக்கப்பட்டு பறிமுதல் செய்யப்படும். வாகன சோதனையில் சிக்கிய போதை பொருட்கள் அலிபிரி சோதனைச் சாவடி அருகே மலை போல் குவித்து வைக்கப்பட்டு இருந்தன.

கடந்த மார்ச், ஏப்ரல், மே ஆகிய 3 மாதங்களில் மட்டும் திருமலைக்கு சென்ற 4 லட்சத்து 34 ஆயிரத்து 871 வாகனங்கள் சோதனை செய்யப்பட்டன. அதில் 7 கிலோ ஆட்டு இறைச்சி, 111/2 கிலோ கோழி இறைச்சி மற்றும் 1 லட்சத்து 34 ஆயிரம் லிட்டர் அளவுள்ள மது, 358 சிகரெட் பாக்கெட்டுகள், 378 பீடி கட்டுகள், 214 புகையிலை பாக்கெட்டுகள், 744 போதை பாக்கு பொட்டலங்கள் ஆகியவை பறிமுதல் செய்யப்பட்டன.

கொட்டி அழிப்பு

பறிமுதல் செய்யப்பட்ட மது மற்றும் போதை பொருட்களை அழிக்கும் நிகழ்ச்சி அலிபிரியில் நடந்தது. இந்த பணியில் பாதுகாப்பு அதிகாரிகள் ஈடுபட்டனர். மது பாட்டில்கள் அனைத்தும் திறந்து தரையில் ஊற்றி அழிக்கப்பட்டன.

பீடி கட்டுகள், சிகரெட் பாக்கெட்டுகள், புகையிலை மற்றும் போதை பாக்கு பொட்டலங்கள் ஆகியவை மலை போன்று குவித்து வைக்கப்பட்டு தீ வைத்து எரிக்கப்பட்டன.

தீவிர நடவடிக்கை

இந்த தகவலை, திருமலை - திருப்பதி தேவஸ்தான பாதுகாப்பு அதிகாரி அசோக்குமார் தெரிவித்தார். அவர் மேலும் கூறும்போது, "திருமலைக்கு தடை செய்யப்பட்ட பொருட்கள் கொண்டு செல்லப்படுவது தீவிரமாக கண்காணிக்கப்படும். தொடர்ந்து இந்த செயலில் ஈடுபடுபவர்கள் மீது கடும் நடவடிக்கை எடுக்கப்படும்'' என்றார்.