கோவில்பட்டி சிறுமி உள்பட 3 பேர் டெங்கு காய்ச்சலுக்கு பலி, நூற்றுக்கணக்கானவர்கள் ஆஸ்பத்திரியில் அனுமதி

நெல்லை மாவட்டத்தை அச்சுறுத்தி வந்த டெங்கு காய்ச்சல் தற்போது தூத்துக்குடி மாவட்டத்தில் கோவில்பட்டி பகுதியில் பாதிப்பை ஏற்படுத்தி இருப்பது தெரியவந்து உள்ளது.

அந்த பகுதியைச் சேர்ந்த சிறுமி உள்பட 3 பேர் பரிதாபமாக உயிர் இழந்தனர்.

அச்சுறுத்தும் `டெங்கு' காய்ச்சல்

நெல்லை மாவட்டத்தில் கடையநல்லூர், கடையம், சங்கரன்கோவில், சுரண்டை, ஆலங்குளம் உள்ளிட்ட பகுதிகளில் டெங்கு காய்ச்சல் வேகமாக பரவி வருகிறது. கடந்த ஒரு மாத காலமாக நெல்லை மாவட்ட மக்களை அச்சுற்றுத்தி வரும் `டெங்கு' நோயின் தாக்கம் தீவிரம் அடைந்து வருகிறது.

டெங்கு காய்ச்சலுக்கு பாளையங்கோட்டை ஐகிரவுண்டு அரசு ஆஸ்பத்திரியில் சிகிச்சை பெற்று வந்த 3 பேர் பரிதாபமாக உயிர் இழந்தனர். அவர்களையும் சேர்த்து டெங்கு காய்ச்சலுக்கு உயிர் இழந்தவர்களின் எண்ணிக்கை 20-ஆக உயர்ந்து உள்ளது.

நெல்லை மாவட்டத்தில் ஆலங்குளம் அருகே மருதம்புத்தூர் மீனாட்சிபுரத்தை சேர்ந்த சுரேஷ் என்பவருடைய மகன் விஷ்ணு (வயது 2) என்ற குழந்தையும், வீரவநல்லூர் அருகே உள்ள வெள்ளங்குழி கிராமத்தைச் சேர்ந்த ஆரோக்கியராஜ் என்பவருடைய மகன் ஜெகன் (13) என்ற சிறுவனும் சிகிச்சை பலனின்றி நேற்று பலியானது குறிப்பிடத்தக்கது. நேற்று முன்தினம் தூத்துக்குடி மாவட்டத்தில் கோவில்பட்டி பகுதியைச் சேர்ந்த அசுவேதா (11) என்ற சிறுமியும் பலியானாள்.

நேற்று ஒரே நாளில் டெங்கு காய்ச்சல் அறிகுறி காரணமாக 13 பெரியவர்களும், 12 சிறுவர்களும் பாளையங்கோட்டை ஐகிரவுண்டு ஆஸ்பத்திரியில் அனுமதிக்கப்பட்டனர். வார்டில் போதிய படுக்கைகள் இல்லாததால் நோயாளிகள் பலர் கீழே பாய் விரித்து படுத்து இருந்தனர்.

கோவில்பட்டி அருகே பாதிப்பு

இதற்கிடையே நெல்லை மாவட்டத்தில் பீதியை ஏற்படுத்திய டெங்கு காய்ச்சல், தூத்துக்குடி மாவட்டம் கோவில்பட்டி அருகே உள்ள பகுதியில் பாதிப்பை ஏற்படுத்தி இருப்பது தெரியவந்து உள்ளது.

கோவில்பட்டி அருகே உள்ள புதுஅப்பனேரி கிராமத்தைச் சேர்ந்தவர் குட்டி. அவருடைய மகள் அசுவேதா (வயது 11). இவள் தீவிர காய்ச்சலால் பாதிக்கப்பட்டு கடந்த 4-ந் தேதி பாளையங்கோட்டை ஐகிரவுண்டு அரசு ஆஸ்பத்திரியில் சிகிச்சைக்காக அனுமதிக்கப்பட்டாள். டாக்டர்கள் பரிசோதித்த போது அசுவேதாவுக்கு டெங்கு காய்ச்சல் பாதிப்பு இருந்தது தெரியவந்தது.

அவளுக்கு தீவிர சிகிச்சை அளிக்கப்பட்டு வந்தது. இந்த நிலையில் நேற்று முன்தினம் சிறுமி அசுவேதா சிகிச்சை பலனின்றி பரிதாபமாக இறந்தாள்.

தினத்தந்தி

குழந்தைகள் அனைவரும் எந்தவித பாதிப்புமின்றி குணமடைய இறைவனை பிரார்த்திக்கிறேன்.....