இமைப் பொழுது

**சிவா** · **சிவா** Thu 26 Apr 2012 - 6:16

கந்தன் ஏழைக் குடியானவன். கொஞ்சம் சோம்பேறி.

கந்தனுக்கு பக்தி அதிகம். தனது கஷ்டத்தைப் போக்க வேண்டும் என்று அடிக்கடி கடவுளிடம் வேண்டுவான். ஆனால் எந்த வேலைக்கும் செல்ல மாட்டான். உழைக்காமல் பணக்காரனாகிவிட வேண்டும் என்று எண்ணுவான்.

நாளுக்கு நாள் கஷ்டம் பெருகிக் கொண்டே சென்றதால், கடவுளை நினைத்து தவமிருக்கத் தொடங்கினான். தன் ஏழ்மையை போக்க கடவுள் துணை புரிவார் என்ற எண்ணத்தில் தவமிருந்தான். அவன் தவத்தைப் பார்த்து ஒரு நாள் கடவுளும் அவன் முன் தோன்றினார்.

"மகனே என்ன வரம் வேண்டும் கேள்'' என்றார்.

"தன் ஏழ்மை நீங்க ஞானம், கல்வி, உழைப்பு உயர்வுகளை கேட்பான்'' என்று கடவுள் எண்ணினார்.

கந்தனோ, "ஆண்டவரே உமக்கு ஒரு பைசா என்பது ஒரு கோடி ரூபாய் என்றும், ஒரு இமைப்பொழுது என்பது ஆயிரம் ஆண்டுகள் என்றும் கேள்விப் பட்டேன். உண்மையா?'' என்றான்.

அவனது பீடிகை பேச்சு கடவுளுக்கு வெறுப்பைத் தந்தது.

"ஆமாம்'' என்றார்.

"அப்படியானால் எனக்கு ஒரு பைசா வேண்டும்'' என்று வரம் கேட்டான்.

"உழைக்காமல் காலத்தைக் கடத்த எண்ணுகிறான்'' என்று அறிந்த கடவுளும் "சரி, ஒரு இமைப்பொழுது காத்திரு'' என கூறிவிட்டு

மறைந்தார்.கந்தன் ஏமாந்து போனான். உழைப்பில்லாமல் எதுவும் நடக்காது என்று உழைக்கக் கிளம்பினான்.

பி.எஸ்.ஜேம்ஸ்