கருணை

காட்டாடு மேய்ந்து கொண்டிருந்தது. அந்தப் பக்கமாக ஒரு ஓநாய் பசியோடு வந்தது.

"என் பசிக்குச் சரியான விருந்து கிடைத்தது'' என்றபடி ஆட்டை நோக்கி வேகமாக பாய்ந்தது. இதைக் கவனித்துவிட்ட காட்டாடு விலகிவிட்டது.

ஆடு விலகிவிட்டதால், ஓநாயின் தலை அருகில் இருந்த மரத்தில் பலமாக மோதியது. அதனால் மண்டை உடைந்து அங்கேயே மயங்கி விழுந்தது.

அருகே மேய்ந்து கொண்டிருந்த ஆட்டின் குட்டி, "அம்மா, நீ விலகாமல் இருந்து இருந்தால், இந்நேரம் நீ இதுக்கு இரையாகி இருப்பே. நான் அனாதையாகி இருப்பேன். வா, அது மயக்கம் தெளியறதுக்குள் ஓடிடுவோம். சீக்கிரம் வாம்மா'' என்றது.

"செல்லமே! ஓநாய் உயிருக்குப் போராடிக்கிட்டு இருக்கு. இதைப் பார்த்துட்டுப் பேசாமல் போறது நல்ல குணம் இல்ல. பகை விலங்கா இருந்தாலும் உதவுவதே உயர்ந்த பண்பு'' என்ற தாய் ஆடு, அப்படியே அருகே இருந்த நதியை நோக்கி ஓடியது.

ஆற்று நீரை வாயில் உறிஞ்சியது. அந்த நீரைக் கொண்டு வந்து ஓநாய் வாயில் விட்டது.

நீரைக் குடித்த சிறிது நேரத்தில் ஓநாய் கண் விழித்தது.

தனக்கு உயிர் பிழைக்க உதவிய காட்டாடை நன்றியோடு பார்த்து ஓநாய், கருணை உள்ளம் படைந்த காட்டாட்டை வேட்டையாட நினைத்ததற்காக வெட்கத்தால் தலை குனிந்து நின்றது.

"நண்பரே, மண்டையில் ரத்தம் கொட்டுகிறதே, இருங்கள்'' என்று பக்கத்து வேலி ஓரம் இருந்த மூலிகை இலையை நன்றாக மென்று அதன் தலையில் சாற்றை தடவியது தாய்ஆடு.

சிறிது நேரத்திற்கு எல்லாம் ரத்தம் கொட்டுவது நின்றது.

ஓநாய் களைப்பு நீங்கி எழுந்து நின்றது.

"நண்பரே பகைவனுக்கு உதவுவதே அதிசயம். அதிலும் உன்னை கொல்ல வந்த எனக்கு உதவியது நினைத்தும் பார்க்க முடியாத ஆச்சரியமான காரியம். எப்படி இதற்கு நான் கைமாறு செய்யப் போகிறேனோ?'' என்று தலை வணங்கியது ஓநாய்.

"நண்பரே! இறைவன் படைப்பில் ஒவ்வொருவருக்கும் ஒவ்வொன்று உணவு. நாங்கள் உங்கள் இனத்திற்கு உணவு. இதில் தப்பிப்பதும், உணவாவதும் ஒவ்வொரு உயிரினத்தின் திறமையை பொறுத்தது. உங்களிடம் நான் தப்பிக்க முயன்றேன். நீங்கள் அடிபட்டு வீழ்ந்து விட்டீர்கள். அதே நேரத்தில் வேதனைப்படும்போதும், உயிருக்குப் போராடும்போதும் உதவுவது ஒவ்வொரு ஜீவனின் கடமை. அதைத்தான் நான் செய்தேன்'' என்றது காட்டாடு.

"சரிதான், நண்பரே!'' என்று தலையாட்டியது ஓநாய்.

"சரி, நாங்கள் விடைபெறுகிறோம். உடம்பைப் பார்த்துக் கொள்ளும்'' என்று கூறிவிட்டு அமைதியாகக் குட்டியோடு நடையைக் கட்டியது காட்டாடு.

ஓநாய் தனக்கு உதவிய காட்டாடு போகும் திசையைப் பார்த்தபடி வணங்கி நின்றது.

தா.ஆறுமுகம்

கைம்மாறு இல்லாத உதவி நன்மையையே தரும்.