தூக்கில் தொங்க விட்டாலும் கூட முஸ்லிம்கள் உரிமைக்காக பாடுபடுவேன்: குர்ஷித்

**சிவா** · **சிவா** Sun 12 Feb 2012 - 12:32

பரூக்காபாத்:""தேர்தல் கமிஷன் என்னை தூக்கில் தொங்கவிட்டாலும், முஸ்லிம் மக்களின் உரிமைகளைப் பெற்றுத் தருவதற்காக, தொடர்ந்து குரல் கொடுப்பேன்' என, மத்திய சட்ட அமைச்சர் சல்மான் குர்ஷித் கூறினார்.

மத்திய சட்ட அமைச்சர் சல்மான் குர்ஷித்தின் மனைவி லூசி, உ.பி., சட்டசபைத் தேர்தலில் பரூக்காபாத் தொகுதியில் காங்., வேட்பாளராகப் போட்டியிடுகிறார். கடந்த மாதம் இவரை ஆதரித்து, சல்மான் குர்ஷித் பிரசாரம் செய்தபோது, சிறுபான்மையினருக்கு இட ஒதுக்கீடு அளிப்பது குறித்து பேசினார். இது பெரும் சர்ச்சையை ஏற்படுத்தியது.

இதற்கு சமீபத்தில் கண்டனம் தெரிவித்திருந்த தேர்தல் கமிஷன்," சட்ட அமைச்சரே, இவ்வாறு தேர்தல் நடத்தை விதிமுறைகளை மீறும் வகையில் நடந்து கொள்வது கவலை அளிக்கிறது. எதிர்காலத்தில் அவர் இதுபோல் நடந்து கொள்ளக் கூடாது' என தெரிவித்தது.

இந்நிலையில், நேற்று பரூக்காபாத்தில் சல்மான் குர்ஷித் பிரசாரத்தில் ஈடுபட்டபோது, "தேர்தல் கமிஷன் என்னைத் தூக்கில் தொங்க விட்டாலும் சரி, வேறு என்ன செய்தாலும் சரி. முஸ்லிம் மக்களின் உரிமைகளைப் பெற்றுத் தருவதற்காகத் தொடர்ந்து குரல் கொடுப்பேன். உ.பி.,யில், 22 ஆண்டுகளுக்குப் பின், மீண்டும் காங்கிரஸ் ஆட்சி அமைக்கும்' என்றார்.

குர்ஷித்துக்கு தடை விதிக்க பா.ஜ., வலியுறுத்தல் : சட்ட அமைச்சர் சல்மான் குர்ஷித்தின் பேச்சு குறித்து, பா.ஜ., சார்பில் தேர்தல் கமிஷனிடம் புகார் அளிக்கப்பட்டுள்ளது. அதில், "தேர்தல் நடத்தை விதிமுறைகளை மீறக் கூடாது என சல்மான் குர்ஷித்துக்கு, தேர்தல் கமிஷன் ஏற்கனவே கண்டனம் தெரிவித்துள்ளது. இதற்கு கட்டுப்படாமல், மதத்தை அடிப்படையாக வைத்து, அவர் மீண்டும் ஓட்டு சேகரித்து வருகிறார். எனவே, சட்டசபை தேர்தல் நேர்மையாகவும், சுதந்திரமாகவும் நடப்பதை உறுதி செய்யும் வகையில், உ.பி.,க்குள், அவர் பிரசாரம் செய்வதற்கு தடை விதிக்க வேண்டும்' என தெரிவிக்கப்பட்டுள்ளது.

தினமலர்