அன்னா ஹசாரே நாளை சென்னை வருகிறார்!

**இளமாறன்** · **இளமாறன்** Sat Dec 17, 2011 2:06 pm

செ‌ன்னை: ஊழலுக்கு எதிராக போராடி வரும் அன்னா ஹசாரே நாளை சென்னை வருகிறார். அவருக்கு சென்னையில் பிரமாண்டமான வரவேற்பு அளிக்கப்படுகிறது. சென்னை கீழ்ப்பாக்கம் பச்சையப்பன் கல்லூரி வளாகத்தில் நாளை மாலை 3 மணி முதல் 6 மணி வரை நடைபெறும் பொதுக்கூட்டத்தில் அன்னா ஹசாரே பேசுகிறார். அவருடன் முன்னாள் போலீஸ் அதிகாரி கிரண் பெடி, சந்தோஷ் ஹக்டே, தினேஷ்வகேலா ஆகியோர் வருகிறார்கள்.

அனைத்து அரசு ஊழியர்களும் ஜன் லோக்பால் சட்டத்தின் கீழ் கொண்டு வரப்பட வேண்டும். மத்தியில் லோக்பால் இருப்பதுபோல எல்லா மாநிலத்திலும் `லோக் அயுக்தா' என்ற அமைப்பை ஏற்படுத்த வேண்டும் என்ற கோரிக்கையை வலியுறுத்தி அன்னா ஹசாரே சுற்றுப்பயணம் மேற்கொண்டுள்ளார். பெங்களூர் சுற்றுப்பயணத்தை முடித்துக்கொண்டு நாளை அன்னா ஹசாரே சென்னை வருகிறார்.

கடந்த ஆகஸ்டு மாதம் அன்னா ஹசாரே உண்ணாவிரதம் இருந்தபோது மத்திய அரசு அவரது மூன்று முக்கிய கோரிக்கையை ஏற்றுக்கொண்டு பாராளுமன்றத்தில் ஒரு தீர்மானம் நிறைவேற்றப்பட்டது. ஆனால் அந்த தீர்மானத்தை மறந்து வலுவற்ற லோக்பால் சட்டத்தை இயற்ற முயற்சி செய்கிறார்கள். இந்த முயற்சிக்கு அன்னா ஹசாரே குழு எதிர்ப்பு தெரிவித்துள்ளது.

தினகரன்