தெண்டுல்கர் பாரத ரத்னா விருது பெறுகிறார்: விளையாட்டு வீரர்கள் பெற அனுமதி

**இளமாறன்** · **இளமாறன்** Sat Dec 17, 2011 3:52 am

புதுடெல்லி, டிச. 16-

இந்தியாவில் வழங்கப்படும் மிகப்பெரிய உயரிய விருது பாரத ரத்னா விருதாகும்.

கிரிக்கெட்டில் பல்வேறு சாதனைகளை புரிந்து சகாப்தமாக திகழும் சச்சின்தெண்டுல்கருக்கு பாரத ரத்னா விருது வழங்க வேண்டும் என்று முன்னாள் வீரர்கள் மற்றும் அரசியல்வாதிகள் வற்புறுத்தி இருந்தனர்.

ஆனால் விளையாட்டு வீரர்களுக்கு பாரத ரத்னா விருது வழங்க மத்திய அரசின் சட்டவிதியில் இல்லை. கலை, இலக்கியம், அறிவியல் மற்றும் பொதுப்பணியில் மிகவும் சிறப்பாக செயல்படுபவர்களுக்கு மட்டும்தான் பாரத ரத்னா விருது வழங்கப்படுகிறது.

இதைத்தொடர்ந்து இந்த விதிமுறையில் திருத்தம் கொண்டு வரவேண்டும் என்று மத்திய விளையாட்டு அமைச்சகம் கோரிக்கை விதித்தது. விளையாட்டு வீரர்களையும் பாரத ரத்னா விருதுக்கான பரிந்துரையில் சேர்க்க வேண்டும் என்று விளையாட்டு அமைச்சகம் மத்திய உள்துறை அமைச்சகத்துக்கு கடிதம் எழுதியது.

மத்திய உள்துறை அமைச்சகம் விளையாட்டு வீரர்களையும் பாரத ரத்னா விருதில் சேர்க்க வேண்டும் என்று கோரி பிரதமர் அலுவலகத்துக்கு பரிந்துரை செய்தது. இதை பிரதமர் அலுவலகம் ஏற்றுக் கொண்டது.

விளையாட்டு அமைச்சகத்துக்காக பாரத ரத்னா விருது வழங்கும் விதிமுறையில் மாற்றம் செய்யப்பட்டது. விளையாட்டு வீரர்களும் இந்த விருது பெற தகுதி பெற்றுள்ளனர். இதனால் தெண்டுல்கர் பாரத ரத்னா விருது பெறுகிறார். இதேபோல முன்னாள் பிரபல ஆக்கி வீரரான தயான் சந்த் இந்த விருதை பெறுகிறார்.

1954-ம் ஆண்டு முதல் பாரத ரத்னா விருது வழங்கப்பட்டு வருகிறது. இதுவரை 41 பேருக்கு பாரத ரத்னா விருது வழங்கப்பட்டுள்ளது. ராஜகோபாலச்சாரிக்கு முதல் பாரத ரத்னா விருது கிடைத்தது. ஜவகர்லால் நேரு, இந்திராகாந்தி, காமராஜர், அம்பேத்கார், அம்ரிதியா சென், எம்.ஜி.ஆர், சர்தார் வல்லபாய் படேல், ராஜீவ் காந்தி, ஜெயபிரகாஷ், நாராயணன், அப்துல்கலாம், லதா மங்கேஷ்கர், பிஸ்மில்லாகான் ஆகியோர் பாரத ரத்னா விருது பெற்றவர்களில் முக்கியமானவர்கள்.

வெளிநாட்டை சேர்ந்த எல்லை காந்தியான கான் அப்துல், கபார்கான், நெல்சன் மண்டேலா மற்றும் இந்திய குடியுரிமை பெற்ற அன்னை தெரசா ஆகியோரும் பாரத ரத்னா விருது பெற்றுள்ளனர்.

கடைசியாக 2008-ம் ஆண்டு இந்துஸ்தான் இசைக்கலைஞர் பிஷ்மன் ஜோஷி பாரத ரத்னா விருது பெற்றார்.

மாலைமலர்