பார்த்தேன்... கேட்டேன்... சொல்கிறேன்...

அவர் நடந்துவந்து எதிரில் அமரும்போதே, வலியின் சுவடு அவர் முகத்தில் தெரிந்தது. வயது 50ஐ தாண்டி இருக்கும்.

துணைக்கு மனைவியும் வந்திருந்தார். என்ன பிரச்சனை என்று கேட்க வேண்டிய அவசியம் இல்லாமலே தெரிந்தது, அவர் சர்க்கரை நோயால் அதிகமாக பாதிக்கப்பட்டிருக்கிறார் என்பது..

ஆனாலும் அதை கட்டுப்படுத்தி யிருக்கலாமே...

கட்டுப்படுத்தி இருக்கலாம்தான். ஆனால் நான் செய்யவில்லை. நடைப்பயிற்சி, உடற்பயிற்சி, மருந்து எதையுமே முறையாக எடுத்துக்கொள்ளாமல் அலட்சியமாக இருந்துவிட்டேன். இப்போது என் கால் பெருவிரலை தொடுவது கூட இமாலய முயற்சியாக உள்ளது...

பயிற்சிக்காக நடக்க சோம்பல் பட்டேன். இப்போது நடப்பது என்பதே நடக்காத காரியமாகி விட்டது. மாத்திரைகளால் மட்டும் சர்க்கரை நோயைக் குணப்படுத்த முடியாது என்பதை இப்போதுதான் உணர்கிறேன்...

அதுவரை மௌனமாக இருந்த அவரது மனைவி இப்போதுதான் பேசத் தொடங்கினார்.

உங்களிடம் வந்து உரிய சிகிச்சை எடுத்துக்கொள்ள வேண்டும் என்றும், உடற்பயிற்சிகளை மேற்கொள்ள வேண்டும் என்றும் எவ்வளவோ சொன்னேன்... இப்போதுதான் அதற்கான நேரம் வந்திருக்கிறது என்றார்...

அவரை பரிசோதித்து பார்த்த போது மூட்டுக்குக் கீழ் கால்களில் தோல் கறுத்து, லேசான புண்ணும் வந்திருந்தது. அவர் கால்கள் உணர்ச்சியற்ற நிலையிலும் இருந்தது. அதிக மன அழுத்தத்துக்கு ஆளாகி இருந்ததையும் அறிந்துகொண்டேன்.

நீரிழிவு நோய்க்கு உரிய சிகிச்சையை அவருக்கு அளித்ததுடன், கால் மற்றும் கைகளில் ரத்த ஓட்டத்தை சீர்படுத்துவதற்கான சிகிச்சையினையும் அளித்தேன்.

இதனால் கால்களில் உள்ள புண்கள் ஆறின. பின் தோலின் கறுமை நிறமும் மாறத் தொடங்கியது. கால்களில் உணர்ச்சியும் வரத் தொடங்கியது.

தற்போது அவர் முகத்தில் சோகம் மாறி, முகம் மலர்ச்சியாக மனத் தெளிவுடன் என்னிடம் மேலும் சிகிச்சை பெற்று வருகிறார்.

நீரிழிவு நோயாளிகள் நிறையபேர் இப்படித்தான் இருக்கிறார்கள். மாத்திரைகளை மட்டும் சாப்பிட்டு வந்தால் போதும் என்று நினைக்கிறார்கள்.

நீரிழிவு நோய்க்கு மாத்திரைகளை விட, நடைமுறையில் மேற்கொள்ளும் உணவு மற்றும் பழக்க வழக்கங்களே முக்கியமான மருந்தாகும்.

பாகற்காயில் இருந்து, குறிஞ்சான் கீரை வரை நம் வீட்டுத் தோட்டத்திலேயே வளர்க்க முடியும் போது நீரிழிவு நோய்க்கு வேறெங்கோ மருந்து தேடி அலைவது ஏன் என்பதுதான் புரியவில்லை.

நீரிழிவு நோய் உள்ளவர்கள் இனிமேலாவது உணவு மற்றும் உடற்பயிற்சியின் மூலமே அதனைக் கட்டுப்படுத்த முடியும் என்பதை புரிந்துகொள்வது நல்லது.

அதுவும் நீரிழிவு நோய் வருவதற்கு முன் காத்துக்கொள்வது அதைவிட நல்லது...

சமையலில் கறிவேப்பிலையை சேர்த்து சமைப்போம். ஆனால் அதை சாப்பிடாமல் தூக்கி எறிந்துவிடுவோம். கறிவேப்பிலைக்கு நீரிழிவு நோயைக் கட்டுப்படுத்தும் தன்மை உண்டு.

உடற்பயிற்சி என்றவுடன் சிலர் மிகவும் கடினமாக செய்வது, வேகமாக ஓடுவது என்று நினைப்பார்கள். அது தவறு.. காலை மற்றும் மாலை நேரத்தில் அரைமணி நேரம் காற்றோட்டமான இடத்தில் நடப்பதுகூட உடற்பயிற்சிதான். அது உடலுக்கு மட்டுமல்ல, மனதுக்கும் சிறந்த பயிற்சி.

தினமும் யோகா, தியானம் செய்யலாம்.

மது, போதை போன்ற பழக்கங்களை நீரிழிவு நோயாளிகள் தவிர்ப்பது நல்லது.

அதிக வாயுவைத் தூண்டும் உணவுகளையும் மாவுச் சத்து நிறைந்த உணவுகளையும் சாப்பிடுவதை தவிர்க்க வேண்டும்.

பித்தத்தை அதிகரிக்கக்கூடிய உணவுகளை தவிர்ப்பது. தக்காளி, உருளைக் கிழங்கு, பெரிய வெங்காயம் போன்றவற்றை உணவில் குறைத்துக் கொள்ள வேண்டும். அதற்கு பதிலாக சின்ன வெங்காயம், வெந்தயம், இஞ்சி, பூண்டு, லவங்கப்பட்டை, இவற்றை உணவில் ஏதாவது ஒரு வகையில் சேர்த்துக்கொள்ளலாம்.

பாமாயிலில் தயாரிக்கப்படும் உணவுகளை தவிர்ப்பது அவசியம். அதிகமாக உணவை உட்கொள்ளாமல் பசித்த பின் உணவை அருந்தவேண்டும். ஒருவேளை உணவை இருவேளையாக உட்கொள்வது நல்லது.

சர்க்கரை நோய் வந்தவுடன் கவனிக்காமல் விட்டுவிட்டால் கண் பார்வையை இழக்க நேரிடலாம். சில நேரங்களில் கை, கால்கள் காயம் பட்டுவிட்டால் அதனை குணப்படுத்துவது அரிது.

மேலும் சர்க்கரை நோய் பாதிக்கப் பட்டவர்களுக்கு பாதங்களில் எரிச்சல் உண்டாகும். மூட்டுகளில் வலி ஏற்படும். இவர்கள் காலையில் வெளியில் செல்லும் முன் பாதங்களிலும், கை, கால்களிலும் வலி நிவாரண எண்ணெயை லேசாக சூடாக்கி தடவி பயிற்சி முடிந்ததும் இளம் சூடான நீரில் கழுவினால் வலிகள் மறையும்.

சர்க்கரை நோயால் பாதிக்கப்பட்டவர்கள் உணவு முறையில் மாறுபாடு அவசியம். மேலும் மேற்சொன்ன முறைகளை கடைப்பிடித்தால் நீரிழிவு நோயின் பாதிப்புகளிலிருந்து விடுபடலாம்.





நன்றி " ஹெல்த் "