சச்சின் 76 ரன்னில் அவுட் : ரசிகர்களை மீண்டும் ஏமாற்றினார்

இந்த போ‌ட்டியிலாவது, சதமடித்து, சதத்தில் சாதனையை சச்சின் படைப்பார் என்ற எதிர்பார்ப்பு இன்று மீண்டும் வீணானது. மாஸ்டர் பேட்ஸ்‌‌மேன் சச்சின் டெண்டுல்கர், ஒருளநாள் கிரிக்‌கெட் போட்டிகளில் இதுவரை 48 சதங்களும், டெஸ்ட் கிரிக்கெட் போட்டியில் 51 சதங்களும் கடந்துள்ளார். அவர் இன்னும் ஒரு சதம் அடித்தால், சதத்தில் சாதனை செய்ததாக அமையும். டெஸ்ட் கிரிக்கெட் வரலாற்றில், 15 ஆயிரம் ரன்களை கடந்த முதல்வீரர் என்ற சாதனையை நேற்று சச்சின் நி்கழ்ந்திருந்த நிலையில், இன்று சதமடித்து சாதனை படைப்பார் என்ற ரசிகர்களின் கனவை, கனவாகவே இருக்க செய்துவிட்டார்.

இங்கிலாந்தில் நடைபெற்ற 3 டெஸ்ட் ‌போட்டிகளில் இந்த சாதனையை சச்சின் நிகழ்த்துவார் என்று எதிர்பார்க்கப்பட்ட நிலையில், அவர் அத்தொடரில் பெரிதாக சோபிக்கவில்லை ஒருநாள் மற்றும் டுவென்டி20 போட்டிகளில் அவருக்கு ஓய்வு வழங்கப்பட்டது. அதேபோல், இந்தியாவில் நடைபெற்ற இங்கிலாந்து அணிக்கெதிரான ஒருநாள் கிரிக்கெட் தொடரிலும் அவர் விளையாடவில்லை. இந்நிலையில், 3 டெஸ்ட், 5 ஒருநாள் போட்டிகள், 1 டுவென்டி20 போட்டி கொண்ட தொடரில் விளையாடுவதற்காக வெஸ்ட் இண்டீஸ் அணி இந்தியா வந்துள்ளது.

இந்தியா- வெஸ்ட் இண்டீஸ் அணிகளுக்கிடையேயான முதல் டெஸ்ட் கிரிக்கெட் போட்டி டில்லியில் துவங்கி நடைபெற்று வருகிறது. டாஸ் வென்று முதலில் பேட்டிங் செய்த வெஸ்ட் இண்டீஸ் அணி 304 ரன்கள் எடுத்து ஆல் அவுட் ஆனது. இதனைத் தொடர்ந்து களமிறங்கிய இந்திய அணி 209 ரன்களுக்கு ஆட்டமிழந்தது. அணியின் துவக்க வீரர்கள் சிறப்பாக விளையாடிய போதிலும், மற்ற வீரர்களின் பங்கு குறிப்பிடத்தக்க அளவில் இல்லை. நட்சத்திர வீரர் சச்சின் டெண்டுல்கர் எல்பிடபிள்யூ முறையில் 7 ரன்களில் ஆட்டமிழந்தார். 2ம் இன்னிங்சில் இந்திய வீரர்கள் சிறப்பாக பந்துவீச, வெஸ்ட் இண்டீஸ் அணி, 180 ரன்களில் ஆட்டமிழந்தது. இதனையடுத்து, 276 ரன்கள் வெற்றி இலக்காக நிர்ணயிக்கப்பட்டது. முதல் இன்னிங்சைப் போலவே, சிறப்பான துவக்கதத்தை, காம்பீரும், சேவக்கும் அளித்தனர். காம்பீர் 22 ரன்களிலும், சேவக் 55 ரன்னிலும் ஆட்டமிழந்தனர். இதனையடுத்து, டிராவிட் மற்றும் சச்சின் களமிறங்கினர். அனுபவ வீரர்கள் இருவரும் களத்தில் இருப்பதால், இப்போட்டியில், சச்சின் சாதனையை நிகழ்த்துவார் என்று அனைவரும் எதிர்பார்த்தனர். ரசிகர்களின் எதிர்பார்ப்பை பூர்ததி செய்வது போலவே, சச்சினும் சிறப்பாக விளையாடி வந்தார். 3ம் நாள் ஆட்டநேர முடிவில், இந்திய அணி 2 விக்கெட் இழப்பிற்கு 144 ரன்கள் எடுத்திருந்தது.

சச்சின் அரைசதம் : இதனையடுத்து, 4ம் நாள் ஆட்டம் இன்று துவங்கி நடைபெற்றது. துவக்கத்திலேயே, டிராவிட் தனது விக்கெட்டை பறிகொடுத்தார். மற்றொரு அனுபவ வீரரான லட்சுமணனுடன் ஜோடி சேர்ந்து சச்சின் விளையாட ஆரம்பித்தார். அதிரடியாக விளையாடிய சச்சின் அரைசதமடித்தார். இது, சச்சின் டெஸ்ட் அரங்கின் 62வது சதம் என்பது குறிப்பிடத்தக்கது. அரைசதமடித்த சச்சின், சதத்தையும் பூர்த்தி செயவார் என்று அனைவரும் நினைத்துக் கொண்டிருக்கையில், வெஸ்ட் இண்டீஸ் சுழற்பந்து வீச்சாளர் பிஷூ பந்தில் எல்பிடபிள்யூ முறையில் 76 ரன்னில், சச்சின் அவுட்டாகி மீண்டும் ரசிகர்களுக்கு அதிர்ச்சியை ஏற்படுத்தினார்.

இரண்டாவது டெஸ்டிலாவது, சச்சின் சத சாதனையை செய்வாரா? என்பதை பொறுத்திருந்து தான் பார்க்க‌ வேண்டும்.