பிடித்தவைகளும்... பிடிக்காதவைகளும்...

பிடித்தவைகளும்... பிடிக்காதவைகளும்...

மனித மனம் எல்லாவற்றையும் இரண்டு இரண்டாக பிரிக்கிறது. வேண்டியவை, வேண்டாதவை... இருப்பவை, இல்லாதவை... முக்கியமானவை, முக்கியமில்லாதவை... என்று. அந்த வகையில் மனித அபிலாஷைகளும் இரண்டு விதமாய் பிரிக்கப்படுகிறது. பிடித்தவை என்றும், பிடிக்காதவை என்றும் பார்க்கப்படுகிறது.

பிடித்தவை என்பது மகிழ்ச்சிக்குரிய அம்சம் எனில், பிடிக்காதவை என்பது வலி நிறைந்த, நிராகரித்தலின் துக்கம் அமையப்பெற்ற வார்த்தை... சுலபமாக ஒரு நபரையோ அல்லது ஒரு உழைப்பையோ- பிடிக்கல, நல்லா
இல்ல என்று சொல்லி விடுகிறோம். அந்த வார்த்தைகளின் சூட்டினை அவர்கள் அறிவார்களா... ஒரு பையனையோ, ஒரு பெண்ணையோ வாழ்க்கை துணைக்காக பார்க்க சென்று- பிடிக்கல, நல்லா இல்ல என்று சுலபமாக சொல்லி விடுகிறோம்.

அதே மனிதர்களை வேறு சிலர் பார்த்து மணந்து கொள்கிறார்களே. கோளாறு- நம் மனங்களிலா... அவர்களின் உருவத்திலா... மனிதர்களில் இரண்டு வகைப் படுகிறார்கள். பிடிக்காததை,"பிடிக்கல" என்று முகத்தில் அடித்தாற் போல் சொல்லி விடுவது ஒரு ரகம்.இன்னொரு ரகத்தினருக்குள், இரண்டு ரகங்கள் உள்ளன. நல்லா இல்லன்னு சொல்லிடுவோம்மா... சொன்னா அவரு கோபிப்பாரே என்று யோசிக்கும் ரகம். இன்னொரு ரகம் யாரு எப்படி இருந்தா நமக்கென்னப்பா என்று
நினைக்கிற ரகம்.

நான் எதையுமே பிடிக்கவில்லை என்று சொல்வதில்லை. காரணம்.
நான் நிறைய நிராகரிக்கப் பட்ட காரணத்தால், பிறரால் ஏற்று கொள்ள
முடியாதவனாக வாழ்ந்த காரணத்தால், குறை சொல்லாமல் எதையும் ஏற்று கொள்ளும் மனநிலையை பெற்றேன். அதனால் எனக்கொரு குறையுமில்லை. பகையற்ற வாழ்க்கை வாழக்கூடிய வாய்ப்பு கிடைத்துள்ளது. சிலர் " நல்லா இல்லாத ஒன்றை- நல்லா இல்லன்னு தானே சொல்ல முடியும். வேற எப்படி சொல்ல முடியும்" என்று
கேட்கலாம். சத்தியமான வார்த்தைகள் தாம்.

நம்மை ஒருவன் விமர்சனம் செய்யும் போது, நாம் என்ன மாதிரியான மனநிலையை அடைகிறோம் என்பதை முதலில் பார்ப்போம். நமக்கு பிறரின் விமர்சனத்தால் கோபம் வருமெனில், நம் விமர்சனத்தால் பிறருக்கு கோபம் வரத்தானே செய்யும். அடக்கி வாசிப்பது தானே
ஆரோக்கியம். சரியான ஒன்றை சரியில்லை என்று சொல்வதும், சரியற்ற ஒன்றை சரியானது தான் என்று வாதிடுவதும், விமர்சிப்பதும் கூட மனித பலவீனமே... மனித வக்ரமே...

தம் மனைவியின் சமையலை ஒருவன் குற்றம் சொல்லி கொண்டே
இருந்தான். விளைவு. "இவருக்கு எப்படி செஞ்சாலும் பிடிக்கல, பிடிக்கலன்னு தான் சொல்லப் போறார். அதனால் எதுக்கு மெனக்கெட்டு எதையும் செய்யணும்" என்கிற மன நிலைக்கு மனைவி தள்ளப்பட்டாள். பிறரை குறை சொல்லி- அதனால் ஏதோ சந்தோஷம் கிடைப்பதாக கருதி வாழும் மனிதர்களும் இருக்கிறார்கள். தன் பணியாள் எவ்வளவு நன்றாக பணிபுரிந்தாலும்- நல்லா இல்ல... நல்லா இல்ல... என்று சொல்பவர்களும் இருக்கிறார்கள். அப்போது நாம் ஒரு காதில் வாங்கி மறு காதில் விட்டு விடும் மனநிலையை அடைவோம்.

ஒரு அனுபவஸ்தர் சொன்னார். "அவரு பண்ற வேலை திருப்தி இல்லையா. ரெண்டு தடவை சொல்லி பாருங்க. அப்பவும் திருப்தி இல்லையா. அதோட விட்டுடுங்க. அவரால் முடியாது. அவரால் அவ்வளவு தான் முடியும். எதுக்கு ரெம்ப எதிர்பார்க்கணும். ஏமாறணும்" உண்மைதானே. ஒருவர் புதியதாய் வீடு கட்டினார். தன் நண்பரை அழைத்து வீட்டை காட்டினார். நண்பர் முதலில் வீடு வாஸ்து முறைப்படி கட்டல என்று ஆரம்பித்து, ஒவ்வொரு குறையாக சொல்லி, வீடே சரியில்ல என்று முடித்தார். இவர் வீடு சரியில்ல என்று சொல்வதற்கா அவர் வீடு கட்டினார். நிம்மதியாக இரவு அவரால் தூங்கி இருக்க முடியுமா... இடம் வாங்கினார். வீட்டையும் கட்டி விட்டார். அவ்வளவு தான். உண்மையில் குறை இருப்பின், மெதுவாக வேறு ஒரு சந்தர்ப்பத்தில்
சொல்லி இருக்க வேண்டும்.

குழந்தைகள் சொல்லலாம், ஒன்றை பிடிக்கிறது, பிடிக்கிவில்லை என்று. ஆனால் பெரியவர்கள் சொல்லக்கூடாது... அவன் அவளை காதலித்தான். அவள் சொன்னாள்,"உன்னை எனக்கு பிடிக்கல" என்று... ஏன். அவன்
இவன் மீது எரிந்து, எரிந்து விழுந்தான். ஏன்... "அவனை எனக்கு பிடிக்கல".
என்று.

வாழ்க்கையில் நிறைய பிடிக்கல உள்ளன. காரணமற்ற பிடிக்காதவைகள்.

பிடிப்பதற்கும், பிடிக்காமல் போவதற்கும் என்னகாரணம்... மனம்... மனம்
சொல்வதெல்லாம் சரியானதாகுமா. உலகம், பிடிக்காத வைகளால் தான் வன்முறை பூமியாக உள்ளன. அவருக்கு பிடித்தது இவருக்கு பிடிப்பதில்லை. இவர் கொள்கைகள், அவருக்கு பிடிப்பதில்லை. பிடிக்காமல் போவது தான் எல்லா சீர்குலைவுகளுக்கும் காரணம். ஒருவர் மீது மற்றவர்க்கு வெறுப்பு வருவது கூட, இந்த பிடிக்காமல் போவது தான்.

அதனால் எந்த சந்தர்ப்பதிலும் யாரையும் பிடிக்கல என்று சொல்லி விட வேண்டாம். எதையும் பிடிக்கல என்று சொல்வதற்கு முன் ஒரு நிமிஷம் யோசிப்போம். அதனால் யார் யாருக்கெல்லாம் வலிக்கக் கூடும் என்று யோசிப்போம். கட்டாயம் பிடிக்கல என்று சொல்லித்தான் ஆக வேண்டும் என்றாலும் கூட சொல்லாமலே இருப்போம்.

http://tamiluthayam.blogspot.com/2010/01/blog-post_09.html

பிடித்தவைகளை கூற பிறப்புரிமை அனைவருக்கும் உண்டு இங்கு... பிடிக்காதவைகளை கூற .................................

(கோடிட்ட இடத்தை நிரப்புக...)