ஆயிரம் விளக்கு - திரை விமர்சனம்

மதுரையே நடுங்கும் பெரிய தாதா சத்யராஜ், மனைவி, குழந்தை, சொந்தங்கள் இல்லாத அவருக்கு அனாதை என்ற மனக்குறை. இதனால் ஒரு இளைஞனை தத்தெடுத்து மகனாக்கி கொள்ள பிரியப்படுகிறார். ஆனால் தாதா என்பதால் அவருக்கு வளர்ப்பு பிள்ளையாய் போக பலரும் பயந்து ஓடுகிறார்கள். சத்யராஜ் கூட்டாளி என பொய் சொல்லி மிரட்டித் திரிகிறார் சாந்தனு.

அவர் நடவடிக்கைகள் சத்யராஜூக்கு பிடித்து போகிறது. வேறு பெயரில் சாந்தனுவுடன் பழகுகிறார். இருவரும் ஒருவர் மீது ஒருவர் அன்பு வைக்கின்றனர். இன்னொரு புறம் சாந்தனுவுக்கும் சனாகானுக்கும் காதல் மலர்கிறது. அவர்களை பிரிக்க இன்னொரு தாதாவான சுமன் முயற்சிக்கிறார்.

சத்யராஜ் காதல் ஜோடிக்கு துணையாக வருகிறார். வெல்வது யார்? என்பது கிளைமாக்ஸ்... பாசத்துக்கு ஏங்கும் வித்தியாசமான தாதா கேரக்டரில் சத்யராஜ் அம்சமாய் பொருந்துகிறார். சாந்தனுவுடன் ஐக்கியமானதும் அவர் அன்புக்காக அடங்கி ஒடுங்குவது அழுத்தம்.

வில்லன்களுடன் மோதுவதில் வேகம். சாந்தனு துறுதுறுவென வருகிறார். சனாகான் டைரியை படித்து அவருக்கு பிடித்த மாதிரி நடந்து காதல் கணை வீசுவது, ரகளை. சனாகான் குளிர்ச்சியும் கிளு கிளுப்புமாய் வருகிறார். ரைஸ்மில் மேஸ்திரிவாக வரும் கஞ்சா கருப்பு, தீப்பெட்டி கணேசன் சிரிக்க வைக்கின்றனர்.

சுமன் வில்லத்தனத்தில் மிரட்டுகிறார். வேறுபட்ட களத்தில் காட்சிகளை பிரமாண்டமாக நகர்த்துகிறார் இயக்குனர் ஹோசிமின். கதையை உயிரோட்டமாக்கி இருந்தால் இன்னும் பளிச்சிட்டு இருக்கும். தாதாவின் பாசப் போராட்ட நிகழ்வுகளிலும் ஜீவன் ஏற்றி இருக்கலாம்.

டி.கண்ணன் ஒளிப்பதிவும், ஸ்ரீகாந்த்தேவா இசையும் நிறைவு.

மாலைமலர்

கடி படம். செம போரு