சென்னை அருகே துணை நகரம்: முதல்வர் ஜெயலலிதா

சென்னை அருகே துணை நகரம்: முதல்வர் ஜெயலலிதா
First Published : 09 Sep 2011 02:45:26 AM IST

சென்னை,
செப். 8: சென்னை அருகே ஐந்து கிராமங்களை உள்ளடக்கி 12 ஆயிரம்
குடியிருப்புகளுடன் துணை நகரம் அமைக்கப்படும் என்று முதல்வர் ஜெயலலிதா
அறிவித்துள்ளார்.வீட்டுவசதி வாரியத்தின் திட்டங்களில் மாற்றுத்
திறனாளிகளுக்கான இடஒதுக்கீடு 1 சதவீதத்தில் இருந்து 3 சதவீதமாக
உயர்த்தப்படுவதாகவும் முதல்வர் அறிவித்துள்ளார்.இதுகுறித்து, சட்டபேரவையில் விதி எண் 110-ன் கீழ் வியாழக்கிழமை அவர் படித்த அறிக்கை:

சென்னை-பெங்களூர்
நெடுஞ்சாலையில் உள்ள திருமழிசை அருகே, தமிழ்நாடு வீட்டு வசதி வாரியத்திடம்
311.05 ஏக்கர் நிலம் உள்ளது. அந்த நிலத்துக்கு முறையான அணுகு சாலை
அமைப்பதற்கு தேவைப்படும் 12.87 ஏக்கர் நிலம், நிலத்தின் உரிமையாளர்களிடம்
உரிய ஆலோசனை செய்து பெறப்பட உள்ளது.இந்த நிலம் பெறப்பட்ட பிறகு,
தமிழ்நாடு வீட்டு வசதி வாரியம் சார்பில் ரூ.2,160 கோடி செலவில், 311.05
ஏக்கர் பரப்பில் செம்பரம்பாக்கம், குத்தம்பாக்கம், பர்வதராஜபுரம்,
நரசிங்கபுரம், வெள்ளவேடு கிராமங்களை உள்ளடக்கிய ""திருமழிசை துணைக்கோள்
நகரம்'' அமைக்கப்படும்.இந்தத் துணை நகரம் குடிநீர் வசதி, கழிவுநீர்
அகற்றும் வசதி, சாலைகள், மழைநீர் வடிகால், தெரு விளக்குகள், சமுதாயக்
கூடம், பள்ளி, மருத்துவமனை, பஸ் நிலையம், பூங்கா, விளையாட்டுத் திடல் போன்ற
அனைத்து அடிப்படை வசதிகளும் கொண்டு அமைக்கப்படும்.இந்த நகரத்தில்
12 ஆயிரம் அடுக்குமாடி குடியிருப்புகள் கட்டப்பட்டு பொருளாதாரத்தில் நலிந்த
பிரிவினர், குறைந்த மற்றும் நடுத்தர வருவாய் பிரிவினர் எளிதில் வாங்கக்
கூடிய விலையில் வழங்கப்படும்.
சென்னை அசோக் பில்லர் அருகில்
தமிழ்நாடு வீட்டுவசதி வாரியத்துக்குச் சொந்தமான 3.73 ஏக்கர் நிலப்பரப்பில்
வாரியத்துக்குத் தேவையான மர உற்பத்தி தொழிற்சாலை அமைக்கப் பெற்று,
பின்னாளில் அந்தத் தொழிற்சாலை பயன்பாடு இன்றி போனதால் இந்த இடம் சுமார் 15
ஆண்டுகளாக எந்தவித பயன்பாடும் இல்லாமல் இருந்து வருகிறது.காலியாக
உள்ள இந்த 3.73 ஏக்கர் நிலப் பரப்பில் ரூ.100 கோடி மதிப்பில் 554
குடியிருப்புகள் கொண்ட பன்னடுக்கு அடுக்குமாடி குடியிருப்புகள்
கட்டப்படும்.

சென்னை கோயம்பேடு தெற்காசிய விளையாட்டு கூட்டமைப்பு
கிராமத்தில் 5.6 ஏக்கர் காலி நிலம் தமிழ்நாடு வீட்டு வசதி வாரியத்தின் வசம்
உள்ளது. இப்போது இந்தக் காலியிடத்தில் தமிழ்நாடு வீட்டு வசதி வாரியத்தின்
சார்பில் ரூ.116 கோடி மதிப்பில் 4.66 லட்சம் சதுர அடி பரப்பில் பன்னடுக்கு
வணிக வளாகம் கட்டப்படும். மேலும், ரூ.33 கோடி மதிப்பில் 1.44 லட்சம் சதுர
அடி பரப்பில் 120 குடியிருப்புகள் கட்டப்படும்.
மாற்றுத் திறனாளிகள்:
2011-ம் ஆண்டு தமிழ்நாடு வீட்டு வசதி வாரியத்தின் பொன்விழா ஆண்டாகும்.
இதையொட்டி, தமிழ்நாடு வீட்டு வசதி வாரியத் திட்டங்களின் மனை, வீடு,
அடுக்குமாடி குடியிருப்பு ஒதுக்கீட்டில், மாற்றுத் திறனாளிகளுக்கு
வழங்கப்படும் ஒரு சதவீத இடஒதுக்கீடு 3 சதவீதமாக உயர்த்தப்படும்.தமிழ்நாடு
குடிசைப் பகுதி மாற்று வாரியம் வசம், சென்னை நந்தனத்தில் காலி மனை உள்ளது.
இந்த இடத்தில் ரூ.100 கோடி செலவில் பசுமைத் திட்ட அம்சங்களுடன் 2 லட்சம்
சதுர அடி பரப்பில் 17 மாடிகள் கொண்ட அலுவலக வளாகம் கட்டப்படும் என்று
முதல்வர் ஜெயலலிதா அறிவித்துள்ளார்.

தினமணி